ເລື່ອງຂອງແມວ? ຍ້ອນຫຍັງແມວຈຶ່ງມັກເຂົ້າໄປຢູ່ໃນລັງແກັດຫຼາຍກວ່າຂອງຫຼິ້ນລາຄາແພງ!

AD

AD

AD

ໜຶ່ງໃນພຶດຕິກຳທີ່ຄົນລ້ຽງແມວຫຼາຍຄົນຄຸ້ນເຄີຍ ຄືການເຫັນນ້ອງແມວມັກຟ້າວເຂົ້າໄປສຳຫຼວດກ່ອງພັດສະດຸທັນທີ ເມື່ອພົບເຫັນກ່ອງແກັດ ບໍ່ວ່າຈະເປັນກ່ອງໃຫຍ່ ຫຼື ກ່ອງນ້ອຍໆທີ່ເບິ່ງແລ້ວບໍ່ໜ້າຈະເໝາະກັບຂະໜາດຕົວຂອງມັນ ແຕ່ແມວກໍຍັງພະຍາຍາມມຸດເຂົ້າໄປໃຫ້ໄດ້.

ເຖິງແມ່ນວ່າຈະມີບ່ອນນອນລາຄາແພງ ຫຼື ເບາະນຸ່ມໆວາງຢູ່ໃກ້ໆ ແຕ່ກ່ອງເຈ້ຍກັບກາຍເປັນສະຖານທີ່ຖືກໃຈເປັນພິເສດຂອງແມວໄດ້ຢ່າງໜ້າປະຫຼາດໃຈ. ພຶດຕິກຳນີ້ບໍ່ໄດ້ເກີດຈາກຄວາມຂີ້ຫຼິ້ນພຽງຢ່າງດຽວ ແຕ່ຍັງກ່ຽວຂ້ອງກັບສັນຊາດຕະຍານ ແລະ ຄວາມຕ້ອງການຕາມທຳມະຊາດຂອງແມວອີກດ້ວຍ.

5 ເຫດຜົນທີ່ແມວມັກເຂົ້າໄປລີ້ຊ່ອນຢູ່ໃນກ່ອງເຈ້ຍ

1. ກ່ອງເປັນພື້ນທີ່ປອດໄພ ຊ່ວຍໃຫ້ຮູ້ສຶກອຸ່ນໃຈ

ແມວເປັນສັດທີ່ມັກມີບ່ອນລີ້ຊ່ອນ ເພາະຊ່ວຍໃຫ້ມັນຮູ້ສຶກປອດໄພຈາກສິ່ງລົບກວນອ້ອມຂ້າງ. ກ່ອງເຈ້ຍທີ່ມີຂອບລ້ອມຮອບຈຶ່ງປຽບເໝືອນພື້ນທີ່ສ່ວນຕົວ ທີ່ຊ່ວຍຫຼຸດການຖືກລົບກວນ. ນອກຈາກນີ້ ແມວຍັງສາມາດມອງເຫັນສິ່ງຕ່າງໆອ້ອມຕົວຜ່ານຊ່ອງເປີດໄດ້ ໂດຍບໍ່ຈຳເປັນຕ້ອງເຜີຍຕົວອອກມາທັງໝົດ.

2. ຊ່ວຍຜ່ອນຄາຍຄວາມຄຽດ ແລະ ຫຼຸດຄວາມກັງວົນ

ເມື່ອແມວຮູ້ສຶກຄຽດ, ຫວາດກົວ ຫຼື ຢູ່ໃນສະພາບແວດລ້ອມທີ່ບໍ່ຄຸ້ນເຄີຍ ການໄດ້ເຂົ້າໄປລີ້ຢູ່ໃນກ່ອງອາດຊ່ວຍໃຫ້ມັນຮູ້ສຶກສະຫງົບຂຶ້ນ ເພາະເປັນພື້ນທີ່ທີ່ສາມາດຄວບຄຸມສິ່ງລົບກວນອ້ອມຕົວໄດ້ງ່າຍຂຶ້ນ. ດັ່ງນັ້ນ ຈຶ່ງບໍ່ແປກທີ່ແມວບາງໂຕມັກເຂົ້າໄປຢູ່ໃນກ່ອງເມື່ອມີແຂກມາຢາມ ຫຼື ເມື່ອມີການປ່ຽນແປງພາຍໃນເຮືອນ.

3. ເປັນຈຸດຊຸ່ມໂຈມຕີຕາມສັນຊາດຕະຍານນັກລ່າ

ເຖິງແມ່ນຈະເປັນແມວລ້ຽງທີ່ບໍ່ຈຳເປັນຕ້ອງອອກໄປລ່າອາຫານເອງ ແຕ່ສັນຊາດຕະຍານນັກລ່າຂອງມັນຍັງຄົງຢູ່. ກ່ອງຈຶ່ງກາຍເປັນຈຸດລີ້ຊ່ອນທີ່ດີສຳລັບການເຝົ້າເບິ່ງ ແລະ ລໍຖ້າຈັງຫວະກະໂຈນໂດດເຂົ້າໃສ່ເຫຍື່ອ ບໍ່ວ່າຈະເປັນໝາກບານ, ຂອງຫຼິ້ນ ຫຼື ແມ່ນແຕ່ຕີນຂອງເຈົ້າຂອງທີ່ຍ່າງຜ່ານໄປມາ!

4. ຊ່ວຍຮັກສາຄວາມອົບອຸ່ນໃຫ້ຮ່າງກາຍ

ແມວມັກອຸນຫະພູມທີ່ອົບອຸ່ນສະບາຍ ແລະ ກ່ອງເຈ້ຍສາມາດຊ່ວຍຫຼຸດການສູນເສຍຄວາມຮ້ອນຂອງຮ່າງກາຍໄດ້ໃນລະດັບໜຶ່ງ ໂດຍສະເພາະກ່ອງທີ່ມີຂະໜາດພໍດີກັບຕົວ. ເມື່ອແມວຂົດຕົວຢູ່ພາຍໃນ ກໍຈະກາຍເປັນພື້ນທີ່ພັກຜ່ອນທີ່ອົບອຸ່ນ ແລະ ສະບາຍຕົວຫຼາຍຂຶ້ນ.

5. ຄວາມຢາກຮູ້ຢາກເຫັນ ແລະ ການສຳຫຼວດສິ່ງໃໝ່

ແມວເປັນສັດທີ່ມັກສຳຫຼວດສິ່ງແວດລ້ອມ. ເມື່ອມີກ່ອງໃບໃໝ່ເຂົ້າມາໃນເຮືອນ ທັງກິ່ນ, ຜິວສຳຜັດ ແລະ ສຽງຂອງເຈ້ຍເວລາຂະຍັບ ຫຼື ສຽດສີກັນ ລ້ວນແຕ່ເປັນສິ່ງກະຕຸ້ນຄວາມສົນໃຈຂອງມັນໄດ້. ດັ່ງນັ້ນ ກ່ອງຈຶ່ງບໍ່ແມ່ນພຽງບ່ອນນອນ ແຕ່ຍັງເປັນຂອງຫຼິ້ນອັນໃໝ່ທີ່ຊ່ວຍໃຫ້ແມວໄດ້ສຳຫຼວດ ແລະ ໃຊ້ເວລາຢ່າງມ່ວນຊື່ນອີກດ້ວຍ.