ທຣຳກ່າວວ່າ FBI ສືບສວນຄວາມສຳພັນສ່ວນຕົວຂອງ CEO Nvidia ກັບສາວຈີນທີ່ຖືກກ່າວຫາວ່າເປັນສາຍລັບ ຂະນະຫຸ້ນບໍລິສັດຕົກ 2.5 ແສນລ້ານໂດລາ

AD

AD

AD

ປະທານາທິບໍດີ ໂດນັລ ທຣຳ ແຫ່ງສະຫະລັດฯ ເປີດເຜີຍວ່າ ສຳນັກງານສືບສວນກາງສະຫະລັດ (FBI) ກຳລັງກວດສອບຄວາມສຳພັນລະຫວ່າງ ເຈນເຊນ ຫວງ (Jensen Huang) ປະທານບໍລິຫານຂອງ Nvidia ກັບນັກທຸລະກິດຍິງຊາວຈີນ ທີ່ຖືກກ່າວຫາວ່າເປັນສາຍລັບໃຫ້ແກ່ລັດຖະບານປັກກິ່ງ.

ທຣຳ ລະບຸວ່າ ລາວໄດ້ໂທລະສັບລົມກັບຫວງໃນວັນຈັນຜ່ານມາ ໂດຍໄດ້ຖາມວ່າ ຮູ້ຫຼືບໍ່ວ່າຜູ້ຍິງຄົນດັ່ງກ່າວເປັນສາຍລັບ. ເຊິ່ງຫວງຕອບວ່າບໍ່ຮູ້ເລື່ອງນີ້ ຂະນະທີ່ທຣຳສະແດງຄວາມເຊື່ອໝັ້ນວ່າ ຫວງຈະສາມາດຜ່ານການສືບສວນໄປໄດ້ດ້ວຍດີ.

ຜູ້ຍິງຄົນດັ່ງກ່າວຊື່ ອາລິສ ຫວງ ຫຼື ຫວງ ເລີ້ ອະດີດຜູ້ບໍລິຫານບໍລິສັດ Megaspeed ໃນສິງກະໂປ ເຊິ່ງມີຄວາມສຳພັນທາງທຸລະກິດກັບ Nvidia. ໜ່ວຍຂ່າວກອງສະຫະລັດເຊື່ອວ່າ ນາງອາດມີສ່ວນກ່ຽວຂ້ອງກັບປະຕິບັດການຈາລະກຳຂອງຈີນ. ທັງນີ້ ນາງບໍ່ໄດ້ມີສາຍສຳພັນທາງເຄືອຍາດກັບ ເຈນເຊນ ຫວງ.

ດ້ານກະຊວງການຕ່າງປະເທດຈີນ ໄດ້ປະຕິເສດຂໍ້ກ່າວຫາດັ່ງກ່າວ ໂດຍລະບຸວ່າ ເປັນຂໍ້ກ່າວຫາທີ່ບໍ່ມີມູນຄວາມຈິງ ເປັນພຽງການຄາດເດົາ ແລະມີເຈດຕະນາໃສ່ຮ້າຍຈີນ.

ຂະນະທີ່ Nvidia ເປີດເຜີຍວ່າ ຄະນະກຳມະການບໍລິສັດໄດ້ຈັດຕັ້ງຄະນະສືບສວນອິດສະຫຼະ ເພື່ອກວດສອບວ່າ ຫວງຕົກເປັນເປົ້າໝາຍຂອງປະຕິບັດການຂ່າວກອງຈາກຕ່າງປະເທດຫຼືບໍ່ ພ້ອມຢືນຢັນວ່າ ບໍ່ມີຫຼັກຖານທີ່ຊີ້ວ່າ ຄວາມລັບຂອງບໍລິສັດ ຫຼືຄວາມໝັ້ນຄົງແຫ່ງຊາດຖືກລະເມີດ.

ແນວໃດກໍຕາມ ຂ່າວດັ່ງກ່າວໄດ້ສົ່ງຜົນກະທົບຕໍ່ລາຄາຫຸ້ນ Nvidia ໂດຍຫຸ້ນປັບຕົວຫຼຸດລົງຫຼາຍກວ່າ 4% ໃນວັນຈັນ ທີ 9 ພະຈິກ ສົ່ງຜົນໃຫ້ມູນຄ່າຕະຫຼາດຂອງບໍລິສັດຫາຍໄປປະມານ 250,000 ລ້ານໂດລາສະຫະລັດພາຍໃນມື້ດຽວ.

ນອກຈາກນີ້ ເຈນເຊນ ຫວງ ແລະ Nvidia ຍັງຖືກຜູ້ຖືຫຸ້ນຍື່ນຟ້ອງຄະດີແບບກຸ່ມໃນລັດຄາລິຟໍເນຍ ໂດຍກ່າວຫາວ່າ ມີການປິດບັງຄວາມສຳພັນກັບຜູ້ຍິງທີ່ຕ້ອງສົງໄສວ່າເປັນສາຍລັບ ແລະຫຼອກລວງຜູ້ຖືຫຸ້ນ. ຂະນະທີ່ສະມາຊິກສະພານິຕິບັນຍັດສະຫະລັດຮຽກຮ້ອງໃຫ້ມີການກວດສອບເພີ່ມເຕີມ ແລະອາດຜັກດັນມາດຕະການຈຳກັດການສົ່ງອອກຊິບ AI ໄປຍັງຈີນໃຫ້ເຂັ້ມງວດຍິ່ງຂຶ້ນ.

ກ່ອນໜ້ານີ້ ຫວງໄດ້ຍອມຮັບວ່າ ຕົນເອງເຄີຍນອກໃຈພັນລະຍາ ພ້ອມກ່າວຂໍໂທດຄອບຄົວ ແລະ ຢືນຢັນວ່າ ຈະໃຫ້ຄວາມຮ່ວມມືກັບການສືບສວນ ເພື່ອປົກປ້ອງ Nvidia ແລະສະໜັບສະໜູນຄວາມໝັ້ນຄົງຂອງສະຫະລັດ.ກໍລະນີດັ່ງກ່າວຍັງເພີ່ມແຮງກົດດັນຕໍ່ Nvidia ເຊິ່ງເປັນບໍລິສັດຜະລິດຊິບທີ່ມີມູນຄ່າສູງເປັນອັນດັບ 2 ຂອງໂລກ ຮອງຈາກ Apple ແລະເປັນຜູ້ມີບົດບາດສຳຄັນໃນການແຂ່ງຂັນດ້ານປັນຍາປະດິດ (AI) ລະຫວ່າງສະຫະລັດກັບຈີນ.

ກ່ອນໜ້ານີ້ ເຈົ້າໜ້າທີ່ສະຫະລັດໄດ້ຈຳກັດການສົ່ງອອກຊິບ AI ປະສິດທິພາບສູງຂອງ Nvidia ໄປຍັງຈີນ ໂດຍຊິບລຸ້ນ H200 ໄດ້ຮັບອະນຸຍາດໃຫ້ຈຳໜ່າຍພາຍໃຕ້ເງື່ອນໄຂບາງປະການ ຂະນະທີ່ຊິບທີ່ມີປະສິດທິພາບສູງສຸດຢ່າງ GB200 Blackwell ຍັງຄົງຖືກຫ້າມສົ່ງອອກໄປຈຳໜ່າຍໃນຕະຫຼາດຈີນ.ຂະນະດຽວກັນ ຫວງໄດ້ຮັບຄຳເຊີນໃຫ້ເຂົ້າຊີ້ແຈງລັບຕໍ່ຄະນະກຳມາທິການຫຼາຍຊຸດຂອງສະພາຄອງເກຣສ ໃນອາທິດໜ້າ ກ່ຽວກັບມາດຕະການປ້ອງກັນການຈາລະກຳ ແລະຄວາມສຳພັນກັບ ອາລິສ ຫວງ ແຕ່ຍັງບໍ່ມີຄວາມຊັດເຈນວ່າ ຫວງຈະເຂົ້າຮ່ວມຫຼືບໍ່.

ລາຍງານຂ່າວຍັງລະບຸວ່າ ທຣຳໄດ້ຮັບຂໍ້ມູນກ່ຽວກັບຄວາມສຳພັນດັ່ງກ່າວມາກ່ອນແລ້ວ ແລະເມື່ອເດືອນຕຸລາຜ່ານມາ ຍັງໄດ້ມອບລາງວັນກຽດຕິຍົດສູງສຸດດ້ານວິທະຍາສາດຂອງສະຫະລັດໃຫ້ແກ່ຫວງ ເຊິ່ງເປັນໜຶ່ງໃນພັນທະມິດຄົນສຳຄັນຂອງປະທານາທິບໍດີໃນຊິລິຄອນແວລີ.ດ້ານນັກວິເຄາະມອງວ່າ ເຖິງແມ່ນການສືບສວນຈະສ້າງຄວາມບໍ່ແນ່ນອນໃຫ້ແກ່ Nvidia ແຕ່ກໍຍັງບໍ່ໜ້າຈະສົ່ງຜົນໃຫ້ຫວງຕ້ອງລົງຈາກຕຳແໜ່ງ CEO ເນື່ອງຈາກລາວມີບົດບາດສຳຄັນຢ່າງຍິ່ງຕໍ່ກົນລະຍຸດ ແລະທິດທາງການດຳເນີນງານຂອງບໍລິສັດ ທີ່ກໍ່ຕັ້ງມາຕັ້ງແຕ່ປີ 1993.

ທີ່ມາ: Reuters / BBC