"ໝໍທີມຊາດເດນມາກ" ເຄື່ອນໄຫວແລ້ວ ຫຼັງ "ອີຣິກເຊັນ" ລົ້ມໝົດສະຕິໃນລະຫວ່າງແຂ່ງຂັນ
“ໝໍທີມຊາດເດນມາກ” ຢືນຢັນ “ອີຣິກເຊັນ” ຟື້ນຄືນສະຕິໄດ້ໄວ ເຄື່ອງກະຕຸ້ນຫົວໃຈເຮັດວຽກປົກກະຕິ
ວັນທີ 8 ມິຖຸນາ 2569 — ຫຼັງຈາກທີ່ ຄຣິດສຕຽນ ອີຣິກເຊັນ ກອງກາງທີມຊາດເດນມາກ ລົ້ມໝົດສະຕິໃນສະໜາມ ໃນຊ່ວງນາທີທີ 65 ຂອງເກມອຸ່ນເຄື່ອງນັດທີ່ ເດນມາກ ພົບ ຢູເຄຣນ ເມື່ອຄືນທີ່ຜ່ານມານັ້ນ
ທີມໝໍໄດ້ເຂົ້າໄປກວດອາການ ແລະ ຮີບນຳຕົວ ອີຣິດເຊັນ ສົ່ງໂຮງໝໍ ຂະນະທີ່ຜູ້ຕັດສິນເປົ່າຢຸດການແຂ່ງຂັນທັນທີ.
ມໍດເຕັນ ໂບເຊັນ ໝໍປະຈຳທີມຊາດເດນມາກ ເປີດເຜີຍວ່າ ອີຣິດເຊັນ ສຸຫຼົບສະຕິໄດ້ພຽງຊົ່ວຄູ່ ກ່ອນຈະຟື້ນຄືນສະຕິໄດ້ຢ່າງໄວວາ ແລະ ສາມາດຍ່າງອອກຈາກສະໜາມໄດ້ດ້ວຍຕົນເອງ ພ້ອມລະບຸວ່າ ເຄື່ອງກະຕຸ້ນຫົວໃຈ ທີ່ຝັງຢູ່ໃນຮ່າງກາຍຂອງນັກເຕະໄດ້ເຮັດວຽກໄດ້ຢ່າງຖືກຕ້ອງ.
“ຄຣິດສຕຽນຢູ່ໃນສະພາບທີ່ດີ ແລະ ຝາກຄວາມຄິດຮອດໄປຍັງນັກເຕະທຸກຄົນ ພ້ອມບອກວ່າລາວໂອເຄ” — ໂບເຊັນ ກ່າວ
ຂະນະນີ້ ອີຣິດເຊັນ ຢູ່ລະຫວ່າງການເຂົ້າຮັບການກວດທີ່ໂຮງໝໍ ເພື່ອຫາສາເຫດທີ່ແທ້ຈິງຂອງເຫດການທີ່ເກີດຂຶ້ນ ໂດຍທີມໝໍຍັງສືບຕໍ່ຕິດຕາມອາການຢ່າງໃກ້ຊິດ.
ທັງນີ້ ອີຣິກເຊັນ ເຄີຍປະສົບເຫດຫົວໃຈຢຸດເຕັ້ນມາແລ້ວ ລະຫວ່າງເກມ ຢູໂຣ 2020 ທີ່ ເດນມາກ ພົບ ຟິນແລນດ໌ ຊຶ່ງໃນຄັ້ງນັ້ນລາວໄດ້ຮັບການຊ່ວຍຊີວິດໃນສະໜາມ ແລະ ຟື້ນຄືນສະຕິໄດ້ສຳເລັດ
