ທ່ານ ຄິມ ຈອງອຶນ ຜູ້ນຳເກົາຫຼີເໜືອປະກາດຍົກລະດັບກອງທັບເຮືອ ສັ່ງສ້າງເຮືອຮົບທີ່ມີອຳນາດການຮົບສູງທີ່ສຸດໃນໂລກ

AD

AD

AD

ທ່ານ ຄິມ ຈອງອຶນ ຜູ້ນຳສູງສຸດຂອງເກົາຫຼີເໜືອ ໄດ້ເດີນທາງໄປກວດຢ້ຽມອູ່ຕໍ່ເຮືອນັມໂພ ພ້ອມປະກາດເດີນໜ້າເສີມສ້າງກຳລັງທາງທະເລຄັ້ງໃຫຍ່ ໂດຍສັ່ງສ້າງ “ເຮືອຮົບທີ່ທັນສະໄໝ ແລະມີອຳນາດການຮົບສູງທີ່ສຸດ” ເຊິ່ງຄາດວ່າອາດເປັນເຮືອຮົບລຳໃໝ່ຂະໜາດ 10,000 ໂຕນ ເພື່ອຮັບມືກັບໄພຄຸກຄາມ ແລະຄວາມຕຶງຄຽດທາງພູມລັດສາດຈາກສະຫະລັດฯ ແລະເກົາຫຼີໃຕ້.

ທ່ານ ຄິມ ຈອງອຶນ ຜູ້ນຳເກົາຫຼີເໜືອ ປະກາດເປົ້າໝາຍໃນການສ້າງເຮືອຮົບທີ່ທັນສະໄໝ ແລະມີອຳນາດການຮົບສູງທີ່ສຸດ ພ້ອມເລັ່ງເສີມສ້າງກຳລັງທາງທະເລ ເພື່ອປົກປ້ອງອະທິປະໄຕຂອງປະເທດ ທ່າມກາງສິ່ງທີ່ເກົາຫຼີເໜືອລະບຸວ່າເປັນໄພຄຸກຄາມຈາກສະຫະລັດฯ ແລະເກົາຫຼີໃຕ້.

ສຳນັກຂ່າວກາງເກົາຫຼີ (KCNA) ລາຍງານວ່າ ທ່ານ ຄິມ ໄດ້ເດີນທາງໄປກວດຢ້ຽມອູ່ຕໍ່ເຮືອນັມໂພ ເພື່ອກວດກາຄວາມຄືບໜ້າໃນການປັບປຸງອູ່ຕໍ່ເຮືອ ແລະເຮືອຮົບລຳໃໝ່ທີ່ກຳລັງຢູ່ໃນຂັ້ນຕອນກໍ່ສ້າງ. ທ່ານ ຄິມ ສະແດງຄວາມພໍໃຈຢ່າງຫຼາຍ ພ້ອມລະບຸວ່າ ເຮືອຮົບລຳນີ້ມີຂະໜາດໃຫຍ່ ແລະມີຄວາມເໜືອກວ່າເຮືອພິຄາດທີ່ສ້າງຂຶ້ນໃນປີກາຍນີ້ຢ່າງຫຼາຍ.

ທ່ານ ຄິມ ກ່າວວ່າ ສະຖານະການທາງພູມລັດສາດ ແລະການກະທຳທີ່ເປັນປໍລະປັກຂອງຝ່າຍທີ່ເປັນສັດຕູໃນພາກພື້ນ ສະທ້ອນໃຫ້ເຫັນເຖິງຄວາມຈຳເປັນໃນການຄອບຄອງເຮືອຮົບທີ່ທັນສະໄໝ ແລະມີອຳນາດການຮົບສູງສຸດ ລວມທັງການເລັ່ງເພີ່ມຂີດຄວາມສາມາດດ້ານການຮົບທັງເທິງຜິວນ້ຳ ແລະໃຕ້ນ້ຳ ເພື່ອປົກປ້ອງອະທິປະໄຕທາງທະເລ.

ເຖິງແມ່ນວ່າລາຍງານຈະບໍ່ໄດ້ເປີດເຜີຍລາຍລະອຽດທາງເຕັກນິກຂອງເຮືອຮົບລຳໃໝ່ ແຕ່ພາບທີ່ເຜີຍແຜ່ອອກມາໄດ້ສະແດງໃຫ້ເຫັນບາງສ່ວນຂອງຕົວເຮືອ ເຊິ່ງຜູ້ຊ່ຽວຊານປະເມີນວ່າ ອາດເປັນເຮືອຂະໜາດ 10,000 ໂຕນ ຕາມແຜນການທີ່ທ່ານ ຄິມ ເຄີຍປະກາດໄວ້ກ່ອນໜ້ານີ້.

ທ່ານ ຊິນ ຈົງອູ ເລຂາທິການຂອງສະຖາບັນສຶກສາດ້ານການປ້ອງກັນປະເທດ ແລະຄວາມໝັ້ນຄົງຂອງເກົາຫຼີ ລະບຸວ່າ ພາບດັ່ງກ່າວອາດເປັນຄັ້ງທຳອິດທີ່ເກົາຫຼີເໜືອເປີດເຜີຍສະຖານທີ່ກໍ່ສ້າງເຮືອຂະໜາດໃຫຍ່ລະດັບ 10,000 ໂຕນ ເຊິ່ງມີຄວາມເປັນໄປໄດ້ວ່າອາດເປັນເຮືອລາດຕະເວນຮົບ.

ໃນເດືອນມິຖຸນາທີ່ຜ່ານມາ ທ່ານ ຄິມ ໄດ້ປະກາດເປົ້າໝາຍໃຫ້ເກົາຫຼີເໜືອສ້າງເຮືອຮົບຢ່າງໜ້ອຍປີລະ 2 ລຳ ໂດຍມີຂະໜາດເທົ່າກັບ ຫຼືໃຫຍ່ກວ່າເຮືອພິຄາດ Choe Hyon ຂະໜາດ 5,000 ໂຕນ ລວມເຖິງເຮືອຮົບຂະໜາດ 10,000 ໂຕນ.

ນອກຈາກນີ້ ທ່ານ ຄິມ ຈອງອຶນ ຍັງສັ່ງໃຫ້ປັບປຸງອູ່ຕໍ່ເຮືອນັມໂພ ໂດຍເນັ້ນການນຳລະບົບອັດຕະໂນມັດມາໃຊ້ໃນຂະບວນການຜະລິດ ພ້ອມທັງກໍ່ສ້າງອູ່ແຫ້ງແຫ່ງທີສອງ ເພື່ອໃຫ້ສາມາດຕໍ່ເຮືອ ແລະສ້ອມແປງເຮືອໄດ້ພ້ອມກັນ ລວມທັງປັບປຸງແຜນຜັງອາຄານທີ່ຍັງບໍ່ເໝາະສົມ.

ຜູ້ນຳເກົາຫຼີເໜືອລະບຸວ່າ ຖານການຕໍ່ເຮືອທີ່ທັນສະໄໝ ແລະນຳໃຊ້ເຕັກໂນໂລຊີຂັ້ນສູງ ເປັນປັດໄຈສຳຄັນໃນການສ້າງກອງທັບເຮືອທີ່ເຂັ້ມແຂງ ຈົນບໍ່ມີປະເທດໃດກ້າຄຸກຄາມ.

ເກົາຫຼີເໜືອກຳລັງເລັ່ງພັດທະນາເຮືອຮົບທີ່ສາມາດຮອງຮັບອາວຸດນິວເຄຼຍ ທັງຢູ່ຝັ່ງຕາເວັນຕົກ ແລະຝັ່ງຕາເວັນອອກ ໂດຍມີເຮືອພິຄາດ ຊເວ ຮຍອນ (Choe Hyon) ປະຈຳການຢູ່ທະເລເຫຼືອງ ແລະເຮືອພິຄາດ ຄັງ ກອນ (Kang Gon) ປະຈຳການຢູ່ທະເລຕາເວັນອອກ.

ເມື່ອເດືອນກັນຍາທີ່ຜ່ານມາ ເກົາຫຼີເໜືອປະກາດນຳເຮືອພິຄາດ ຄັງ ກອນ ຂະໜາດ 5,000 ໂຕນ ເຂົ້າປະຈຳການ ພ້ອມລະບຸວ່າ ເຮືອລຳນີ້ເປັນສ່ວນໜຶ່ງຂອງລະບົບຕອບໂຕ້ດ້ວຍອາວຸດນິວເຄຼຍ ແລະຈະເຮັດໜ້າທີ່ປົກປ້ອງອະທິປະໄຕທາງທະເລ ໃນຖານະກຳລັງປ້ອງປາມເພື່ອຍັບຢັ້ງສົງຄາມນິວເຄຼຍ.

ນອກຈາກນີ້ ການເດີນທາງໄປກວດຢ້ຽມອູ່ຕໍ່ເຮືອຂອງທ່ານ ຄິມ ຍັງເກີດຂຶ້ນພຽງໜຶ່ງມື້ ຫຼັງຈາກເກົາຫຼີເໜືອທົດສອບຍິງລູກສອນໄຟລ່ອງທາງຍຸດທະສາດ ແລະກ່ອນໜ້ານັ້ນຍັງໄດ້ທົດສອບຫົວລະເບີດແບບລູກຫວ່ານອີກດ້ວຍ.

ຂະນະດຽວກັນ ຄິມ ໂຢຈອງ ນ້ອງສາວຂອງ ຄິມ ຈອງອຶນ ໄດ້ອອກມາເຕືອນສະຫະລັດວ່າ ເກົາຫຼີເໜືອຈະຕອບໂຕ້ຮຸນແຮງຍິ່ງຂຶ້ນ ຕໍ່ສິ່ງທີ່ຕົນເອີ້ນວ່າ ນະໂຍບາຍທີ່ເປັນປໍລະປັກຕໍ່ເກົາຫຼີເໜືອຢ່າງບໍ່ປ່ຽນແປງຂອງລັດຖະບານສະຫະລັດ.

ທີ່ມາ: AFP