AD

AD

AD

ຖ້ຽວບິນຫຼາຍສິບຖ້ຽວທົ່ວເອີຣົບ ຖືກຂູ່ວາງລະເບີດ ຈົນຕ້ອງປ່ຽນເສັ້ນທາງ ແລະລົງຈອດສຸກເສີນ ຂະນະຍັງບໍ່ຮູ້ວ່າຝ່າຍໃດຢູ່ເບື້ອງຫຼັງ

ຖ້ຽວບິນໂດຍສານຫຼາຍຖ້ຽວທົ່ວເອີຣົບ ປະເຊີນກັບຄຳຂູ່ວາງລະເບີດ ຈົນຕ້ອງປ່ຽນເສັ້ນທາງ ຫຼືລົງຈອດສຸກເສີນຢູ່ຫຼາຍປະເທດ ໃນຊ່ວງເຊົ້າວັນພະຫັດ ນັບເປັນເຫດການລ່າສຸດຂອງກະແສການຂູ່ວາງລະເບີດທີ່ແນໃສ່ຖ້ຽວບິນໃນພາກພື້ນເອີຣົບຢ່າງຕໍ່ເນື່ອງ.

ສາຍການບິນ Aer Lingus ຂອງໄອແລນ ເປີດເຜີຍວ່າ ຖ້ຽວບິນ EI402 ທີ່ເດີນທາງຈາກກຸງດັບລິນ ປະເທດໄອແລນ ໄປຍັງກຸງໂຣມ ປະເທດອິຕາລີ ສາມາດລົງຈອດໄດ້ຢ່າງປອດໄພທີ່ສະໜາມບິນ Évreux ປະເທດຝຣັ່ງ ຊຶ່ງຢູ່ຫ່າງຈາກກຸງປາຣີໄປທາງຕາເວັນຕົກປະມານ 100 ກິໂລແມັດ ຫຼັງຈາກຖືກປ່ຽນເສັ້ນທາງເພື່ອມາດຕະການຄວາມປອດໄພ.

ຂະນະດຽວກັນ ສື່ເບວຢຽມລາຍງານວ່າ ເຮືອບິນໂດຍສານອີກລຳໜຶ່ງທີ່ຖືກສັ່ງໃຫ້ລົງຈອດທີ່ສະໜາມບິນ Zaventem ກຸງບຣຸກແຊນ ເປັນເຮືອບິນຂອງສາຍການບິນ LOT Polish Airlines ຂອງໂປແລນ.

ສ່ວນຖ້ຽວບິນຂອງສາຍການບິນ Finnair ທີ່ເດີນທາງຈາກກຸງເຮວຊິງກິ ປະເທດຟິນແລນ ໄປຍັງກຸງໂຣມ ກໍສາມາດລົງຈອດໄດ້ຕາມກຳນົດຢ່າງປອດໄພ ຫຼັງຈາກໄດ້ຮັບການຄຸ້ມກັນຈາກກອງທັບອາກາດອິຕາລີ ຕາມການເປີດເຜີຍຂອງແຫຼ່ງຂ່າວທີ່ໃກ້ຊິດກັບເຫດການ.

3 ຖ້ຽວບິນຂອງບັນແກເລຍ ລົງຈອດສຸກເສີນຍ້ອນຄຳຂູ່ວາງລະເບີດ

ເຈົ້າໜ້າທີ່ບັນແກເລຍລາຍງານວ່າ ມີເຮືອບິນ 3 ລຳ ຕ້ອງລົງຈອດສຸກເສີນ ເນື່ອງຈາກໄດ້ຮັບຄຳຂູ່ວາງລະເບີດ.

ລັດຖະມົນຕີວ່າການກະຊວງພາຍໃນບັນແກເລຍ ເປີດເຜີຍຜ່ານສະຖານີໂທລະພາບ bTV ວ່າ ເຮືອບິນທີ່ເດີນທາງມາຈາກກຸງໂຄເປນເຮເກນ ປະເທດເດນມາກ ແລະກຸງມາດຣິດ ປະເທດສະເປນ ຕ້ອງລົງຈອດທີ່ກຸງໂຊເຟຍ ສ່ວນເຮືອບິນອີກລຳໜຶ່ງທີ່ເດີນທາງມາຈາກກຸງລອນດອນ ປະເທດອັງກິດ ລົງຈອດທີ່ເມືອງພລອຟດິບ.

ເຫດການດັ່ງກ່າວເກີດຂຶ້ນພຽງ 2 ມື້ ຫຼັງຈາກວັນອັງຄານກ່ອນໜ້ານັ້ນ ມີຖ້ຽວບິນຢ່າງໜ້ອຍ 7 ຖ້ຽວ ແລະເຮືອສຳລານອີກ 1 ລຳ ໄດ້ຮັບຄຳຂູ່ວາງລະເບີດ ສົ່ງຜົນໃຫ້ສະໜາມບິນຫຼາຍແຫ່ງທົ່ວເອີຣົບເກີດຄວາມວຸ້ນວາຍ ແລະຕ້ອງຢຸດຊະງັກການດຳເນີນງານຊົ່ວຄາວ.

ແນວໃດກໍຕາມ ເຈົ້າໜ້າທີ່ບໍ່ພົບວັດຖຸລະເບີດຈາກຄຳຂູ່ດັ່ງກ່າວ.

ຍັງບໍ່ມີປະເທດໃດຖືກລະບຸວ່າຢູ່ເບື້ອງຫຼັງ

ຈົນເຖິງຂະນະນີ້ ຍັງບໍ່ມີປະເທດໃດ ຫຼືຝ່າຍໃດຖືກລະບຸຢ່າງຊັດເຈນວ່າເປັນຜູ້ຢູ່ເບື້ອງຫຼັງຄຳຂູ່ວາງລະເບີດທີ່ເກີດຂຶ້ນຢ່າງຕໍ່ເນື່ອງ.

ແນວໃດກໍຕາມ ເຫດການເຫຼົ່ານີ້ເກີດຂຶ້ນໃນຊ່ວງທີ່ເຈົ້າໜ້າທີ່ເອີຣົບກ່າວຫາຣັດເຊຍ ແລະອີຣ່ານ ວ່າມີສ່ວນກ່ຽວຂ້ອງກັບສິ່ງທີ່ເອີ້ນວ່າ “ການໂຈມຕີແບບປະສົມ” (Hybrid Attacks) ລວມເຖິງການກໍ່ວິນາດສະກຳໃນຮູບແບບຕ່າງໆ.

ຂະນະດຽວກັນ ທັງລັດຖະບານມົສກູ ແລະເຕຫະຣ່ານ ຕ່າງກໍປະຕິເສດວ່າ ບໍ່ໄດ້ດຳເນີນປະຕິບັດການໃນລັກສະນະດັ່ງກ່າວ.

ນອກຈາກນີ້ ໃນອາທິດດຽວກັນ ຍັງເກີດເຫດການແຮັກເກີທີ່ບໍ່ຮູ້ຕົວຕົນ ໂຈມຕີລະບົບຄວບຄຸມຈົນເຮັດໃຫ້ຕູ້ເຢັນ ແລະຕູ້ແຊ່ສິນຄ້າໃນຊຸບເປີມາເກັດຫຼາຍປະເທດທົ່ວເອີຣົບຢຸດເຮັດວຽກ.

ຜູ້ຊ່ຽວຊານບາງລາຍຕັ້ງຂໍ້ສັງເກດວ່າ ການຂູ່ວາງລະເບີດປອມທີ່ເກີດຂຶ້ນຢ່າງຕໍ່ເນື່ອງ ອາດເປັນສ່ວນໜຶ່ງຂອງຮູບແບບການກໍ່ກວນທີ່ໃຊ້ຕົ້ນທຶນຕ່ຳ ແຕ່ສາມາດສ້າງຄວາມເສຍຫາຍ ແລະຄວາມປັ່ນປ່ວນໄດ້ໃນວົງກວ້າງ ພ້ອມທັງຍາກຕໍ່ການລະບຸວ່າໃຜເປັນຜູ້ຢູ່ເບື້ອງຫຼັງ.

ທີ່ມາ: Reuters/Reuters