ໝາກນັດເປັນເຫດ! ເຊັບອິຕາລີຍອມຕົກວຽກ ດີກວ່າຍອມໃສ່ໝາກນັດໃນພິຊຊ່າ!

AD

AD

AD

ເຊັບຊາວອິຕາລີລາຍໜຶ່ງຖືກໄລ່ອອກຈາກຮ້ານອາຫານໃນເມືອງບຣິສເບນ ປະເທດອົດສະຕຣາລີ ຫຼັງຈາກລາວປະຕິເສດບໍ່ຍອມໃສ່ໝາກນັດເທິງໜ້າພິຊຊ່າ ໂດຍໃຫ້ເຫດຜົນວ່າ ການກະທຳດັ່ງກ່າວເປັນການ “ດູໝິ່ນວັດທະນະທຳຂອງຕົນ”.

ດາວິເດ ຕຳບູເຣລລາ (Davide Tamburella) ຖືກໄລ່ອອກຈາກວຽກໃນເດືອນພຶດສະພາ ຈາກຮ້ານອາຫານ La Costa ເຊິ່ງປັດຈຸບັນໄດ້ປິດກິດຈະການໄປແລ້ວ.

ຫຼັງຈາກຝ່າຍບໍລິຫານຮ້ານເອີ້ນລາວເຂົ້າພົບ ເພື່ອສອບຖາມກ່ຽວກັບຂໍ້ຮ້ອງຮຽນຈຳນວນຫຼາຍກ່ຽວກັບພຶດຕິກຳຂອງລາວ ສອງອາທິດຕໍ່ມາ ເຊັບລາຍນີ້ກໍຖືກໄລ່ອອກຈາກວຽກ.

ໜຶ່ງໃນຂໍ້ຮ້ອງຮຽນທີ່ກ່ຽວກັບເຊັບລາຍນີ້ ແມ່ນກໍລະນີທີ່ລາວປະຕິເສດບໍ່ຍອມເຮັດພິຊຊ່າໜ້າແຮມແລະໝາກນັດ ເພື່ອເສີບໃຫ້ແຂກໃນງານລ້ຽງ. ໃນເວລານັ້ນ ເຊັບໄດ້ກ່າວວ່າ ຄຳສັ່ງໃດໆຈາກຝ່າຍບໍລິຫານ “ບໍ່ຈຳເປັນຕ້ອງປະຕິບັດຕາມ ຖ້າຫາກຂັດກັບວັດທະນະທຳຂອງລາວ”.

ລາຍລະອຽດຕ່າງໆຂອງເຫດການນີ້ ຖືກເປີດເຜີຍຫຼັງຈາກເຊັບລາຍດັ່ງກ່າວໄດ້ຍື່ນຄຳຮ້ອງຕໍ່ຄະນະກຳມະການແຮງງານທຳມະທີ່ອົດສະຕຣາລີ (Fair Work Commission) ໂດຍກ່າວຫາວ່າ ຕົນເອງຖືກໄລ່ອອກຈາກວຽກຢ່າງບໍ່ເປັນທຳ.

ໃນຄຳຕັດສິນທີ່ເຜີຍແຜ່ໃນວັນອັງຄານ (4 ພະຈິກ) ຄະນະກຳມະການລະບຸວ່າ ການທີ່ຕຳບູເຣລລາປະຕິເສດບໍ່ຍອມໃສ່ໝາກນັດໃນພິຊຊ່າ ເປັນເພາະລາວເຫັນວ່າ “ໃນຖານະຄົນອິຕາລີ ລາວຖືວ່າການໃສ່ໝາກນັດໃນພິຊຊ່າເປັນການດູໝິ່ນວັດທະນະທຳຂອງຕົນ”.

ນອກຈາກນີ້ ຍັງລະບຸວ່າ ນີ້ເປັນຄັ້ງທີ 3 ແລ້ວ ທີ່ຕຳບູເຣລລາປະຕິເສດການໃຊ້ໝາກນັດໃນການເຮັດພິຊຊ່າ ພາຍໃນໄລຍະເວລາ 4 ປີຜ່ານມາ.

ກ່ອນໜ້ານີ້ ລາວເຄີຍຂໍໃຫ້ເຈົ້ານາຍຊ່ວຍຄົ້ນຄວ້າຂໍ້ມູນເພີ່ມເຕີມວ່າ “ການທີ່ຄົນອິຕາລີບໍ່ໃສ່ໝາກນັດໃນພິຊຊ່າ ເປັນເລື່ອງສຳຄັນຫຼາຍປານໃດ”.

ລັດຄວີນສ໌ແລນ ເຊິ່ງເປັນທີ່ຕັ້ງຂອງຮ້ານອາຫານແຫ່ງນີ້ ຖືເປັນແຫຼ່ງປູກໝາກນັດທີ່ສຳຄັນຂອງອົດສະຕຣາລີ ແລະເປັນແຫຼ່ງຜະລິດໝາກນັດເພື່ອການຄ້າທັງໝົດຂອງປະເທດ.

ທີ່ເຂດຊັນໄຊໂຄສ (Sunshine Coast) ນັກທ່ອງທ່ຽວມັກແວະຖ່າຍຮູບຄູ່ກັບໝາກນັດຍັກ ເຊິ່ງເປັນຮູບຈຳລອງໝາກນັດທີ່ເຮັດຈາກໄຟເບີກລາສ ສູງເຖິງ 16 ແມັດ. ສະຖານທີ່ນີ້ໄດ້ຮັບການຂຶ້ນທະບຽນເປັນມໍລະດົກທາງວັດທະນະທຳ ແລະກາຍເປັນສັນຍາລັກສຳຄັນຂອງທ້ອງຖິ່ນ.

ນອກຈາກເລື່ອງໝາກນັດ ຍັງມີຂໍ້ຮ້ອງຮຽນດ້ານພຶດຕິກຳ

ຕຳບູເຣລລາຍັງຖືກຮ້ອງຮຽນໃນເລື່ອງອື່ນໆ ເຊັ່ນ ການໃຊ້ຄຳເວົ້າຫຍາບຄາຍ ວິທີການສື່ສານກັບຜູ້ອື່ນ ລວມເຖິງການສະແດງຄວາມບໍ່ພໍໃຈຢ່າງຮຸນແຮງຂຶ້ນໃນສະຖານທີ່ເຮັດວຽກ.

ຄຳຕັດສິນຂອງຄະນະກຳມະການແຮງງານ ຍັງໄດ້ລະບຸເຖິງເຫດການໜຶ່ງທີ່ເກີດຂຶ້ນໃນເດືອນເມສາຂອງປີນີ້ ເມື່ອຕຳບູເຣລລາໄດ້ຮັບບາດເຈັບຈົນກະດູກມືຫັກ ຫຼັງຈາກຊົກໃສ່ຮາວເຫຼັກ.

ນອກຈາກນີ້ ເຊັບລາຍນີ້ຍັງຫວັງວ່າຮ້ານອາຫານຈະຊ່ວຍດຳເນີນເອກະສານຂໍວີຊາໃຫ້ລາວ ເຊິ່ງເປັນວີຊາທີ່ເປີດໂອກາດໃຫ້ແຮງງານທີ່ມີທັກສະສາມາດຂໍສະຖານະຜູ້ພຳນັກຖາວອນໄດ້.

ແຕ່ຫຼັງຈາກລາວຖືກໄລ່ອອກຈາກວຽກ ຮ້ານອາຫານກໍໄດ້ຍຸຕິຂະບວນການດຳເນີນເອກະສານດັ່ງກ່າວ ເຊິ່ງຄະນະກຳມະການກໍໄດ້ຮັບຟັງຂໍ້ມູນນີ້ໃນການພິຈາລະນາ.

ຕາມຄຳຕັດສິນ ລາວບໍ່ປະສົບຜົນສຳເລັດໃນການຮ້ອງຂໍຄ່າຊົດເຊີຍຈາກການຖືກເລີກຈ້າງຢ່າງບໍ່ເປັນທຳ ເນື່ອງຈາກລາວຍື່ນຄຳຮ້ອງຊ້າເກີນກຳນົດເວລາ.

ທ່ານ ເອລລຽດ ອິງແກຣມ (Elliot Ingram) ຜູ້ຈັດການໃຫຍ່ຂອງຮ້ານອາຫານ ໃຫ້ສຳພາດກັບສຳນັກຂ່າວ Daily Mail ວ່າ:

“ເລື່ອງນີ້ມີຄວາມຊັບຊ້ອນຫຼາຍກວ່າພຽງແຕ່ເລື່ອງໜ້າພິຊຊ່າ”.

ປັດຈຸບັນເຊັບຍັງເຮັດວຽກຢູ່ຮ້ານອາຫານອີກແຫ່ງ

ໃນໂປຣໄຟລ໌ LinkedIn ຂອງຕຳບູເຣລລາ ລາວໄດ້ແນະນຳຕົນເອງວ່າ ຕະຫຼອດໄລຍະການເຮັດວຽກໃນວົງການອາຫານ ລາວມຸ່ງເນັ້ນ “ການສ້າງສັນອາຫານທີ່ຍອດຢ້ຽມ” ແລະ “ການພັດທະນາຜົນປະກອບການທາງທຸລະກິດໃຫ້ດີຂຶ້ນ”. ເມື່ອ 3 ເດືອນກ່ອນ ລາວຍັງໄດ້ໂພສ “ຈົດໝາຍເຖິງເຊັບ” ໃນຫົວຂໍ້ “ການເຄົາລົບວັດຖຸດິບ”.

ປັດຈຸບັນລາວກຳລັງເຮັດວຽກຢູ່ຮ້ານອາຫານອີກແຫ່ງໜຶ່ງໃນເມືອງບຣິສເບນ

ທີ່ມາ: bbc/theguardian