ອຸບັດຕິເຫດຊ້ອນຄັ້ງໃຫຍ່! ທີ່ບັນແກເລຍໝອກໜາປົກຫຸ້ມທາງດ່ວນ ເຮັດໃຫ້ລົດຕຳກັນຕໍ່ເນື່ອງຫຼາຍກວ່າ 70 ຄັນ ເສຍຊີວິດແລ້ວ 12 ຄົນ ບາດເຈັບຈຳນວນຫຼາຍ

AD

AD

AD

ເກີດອຸບັດຕິເຫດຮຸນແຮງ 2 ຈຸດ ເທິງທາງດ່ວນມໍເຕີເວຂອງປະເທດບັນແກເລຍ ໂດຍມີລົດຕຳກັນລວມກວ່າ 70 ຄັນ ສົ່ງຜົນໃຫ້ມີຜູ້ເສຍຊີວິດແລ້ວຢ່າງໜ້ອຍ 12 ຄົນ ແລະບາດເຈັບອີກຫຼາຍສິບຄົນ

ສຳນັກຂ່າວຕ່າງປະເທດລາຍງານວ່າ ເກີດເຫດລົດຕຳກັນຫຼາຍກວ່າ 70 ຄັນ ໃນ 2 ຈຸດ ຂອງຖະໜົນທາງດ່ວນ “ທຣາເຄຍ ມໍເຕີເວ” (Trakia Motorway) ໃກ້ກັບເມືອງຊິມນິດຊາ (Zimnitsa) ທາງຕອນໃຕ້ຂອງປະເທດບັນແກເລຍ ໃນວັນທີ 10 ພະຈິກ 2026 ສົ່ງຜົນໃຫ້ມີຜູ້ເສຍຊີວິດແລ້ວຢ່າງໜ້ອຍ 12 ຄົນ ແລະບາດເຈັບອີກຫຼາຍກວ່າ 50 ຄົນ

ເຈົ້າໜ້າທີ່ບັນແກເລຍລະບຸວ່າ ສະພາບອາກາດມີໝອກລົງໜາແໜ້ນ ເຮັດໃຫ້ທັດສະນະວິໄສໃນການມອງເຫັນຫຼຸດລົງຢ່າງຫຼາຍ ເຊິ່ງຄາດວ່າເປັນສາເຫດຫຼັກຂອງອຸບັດຕິເຫດຈຸດທີ 1 ເທິງເສັ້ນທາງຝັ່ງມຸ່ງໜ້າໄປທາງຕາເວັນອອກ.

ສ່ວນອຸບັດຕິເຫດຈຸດທີ 2 ຢູ່ເສັ້ນທາງຝັ່ງມຸ່ງໜ້າໄປຍັງກຸງໂຊເຟຍ (Sofia) ຄາດວ່າເກີດຈາກໝອກໜາ ແລະການທີ່ຜູ້ຂັບຂີ່ເສຍສະມາທິ ເນື່ອງຈາກຫັນໄປສົນໃຈເບິ່ງເຫດລົດຕຳກັນໃນຈຸດທຳອິດ

ນອກຈາກນີ້ ເຈົ້າໜ້າທີ່ຍັງເປີດເຜີຍວ່າ ພື້ນຜິວຖະໜົນທີ່ປຽກ ແລະການໃຊ້ຄວາມໄວທີ່ບໍ່ເໝາະສົມກັບສະພາບອາກາດ ກໍເປັນອີກປັດໄຈທີ່ມີສ່ວນເຮັດໃຫ້ເກີດເຫດການດັ່ງກ່າວ ສົ່ງຜົນໃຫ້ທາງດ່ວນທຣາເຄຍ ຕ້ອງປິດການສັນຈອນຊົ່ວຄາວ ເພື່ອໃຫ້ເຈົ້າໜ້າທີ່ເຂົ້າເຄລຍພື້ນທີ່ ແລະຈັດການກັບຊາກລົດທີ່ເສຍຫາຍ

ນາງ ຄາເທຍ ອີຟໂຄວາ (Katia Ivkova) ລັດຖະມົນຕີວ່າການກະຊວງສາທາລະນະສຸກຂອງບັນແກເລຍ ລະບຸວ່າ ມີຜູ້ເສຍຊີວິດໃນຈຸດເກີດເຫດທັນທີ 11 ຄົນ ແລະເສຍຊີວິດເພີ່ມອີກ 1 ຄົນຢູ່ໂຮງໝໍ ລວມເປັນ 12 ຄົນ. ສ່ວນຜູ້ບາດເຈັບປະມານ 50 ຄົນ ຖືກນຳສົ່ງໄປປິ່ນປົວຢູ່ໂຮງໝໍໃນແຂວງຢຳໂບລ, ສະລີເວນ ແລະເບີກາສ.

ຂະນະທີ່ ທ່ານ ຈໍຈີ ຊາລາຄອຟ (Georgi Shalakov) ຜູ້ວ່າລາຊະການແຂວງຢຳໂບລ ເປີດເຜີຍວ່າ ໄດ້ຮັບແຈ້ງເຫດໃນເວລາ 07:10 ໂມງ ຂອງວັນອັງຄານ (10 ພະຈິກ) ຕາມເວລາທ້ອງຖິ່ນ. ເຈົ້າໜ້າທີ່ຈຳເປັນຕ້ອງຕັດແຜງກັ້ນຖະໜົນ ເພື່ອເຂົ້າໄປຊ່ວຍເຫຼືອຜູ້ທີ່ຕິດຄ້າງຢູ່ພາຍໃນລົດ. ນອກຈາກນັ້ນ ໝອກທີ່ລົງໜາແໜ້ນຫຼາຍ ຍັງເຮັດໃຫ້ບໍ່ສາມາດນຳໃຊ້ເຮລິຄອບເຕີໃນການລຳລຽງອົບພະຍົບຜູ້ບາດເຈັບໄດ້.

ດ້ານຜູ້ລອດຊີວິດຄົນໜຶ່ງເລົ່າວ່າ ໝອກໜາຫຼາຍຈົນບໍ່ສາມາດມອງເຫັນເສັ້ນທາງໄດ້ ແລະລາວຕ້ອງໄດ້ຊ່ວຍດຶງຊາຍຄົນໜຶ່ງອອກຈາກລົດທີ່ກຳລັງລຸກໄໝ້. ສ່ວນພະຍານຜູ້ເຫັນເຫດການອີກຄົນໜຶ່ງລະບຸວ່າ ມີລົດບັນທຸກຂັບຕາມຫຼັງລາວມາເຖິງ 4 ຄັນ ແລະຮູ້ສຶກໂຊກດີຫຼາຍທີ່ສາມາດລອດຊີວິດມາໄດ້.

ທັງນີ້ ໃນຂະນະເກີດເຫດ ທ່ານ ຣູເມນ ຣາເດຟ (Rumen Radev) ນາຍົກລັດຖະມົນຕີບັນແກເລຍ ກຳລັງຮ່ວມຖະແຫຼງຂ່າວກັບ ນາງ ເອີຊູລາ ວອນ ແດຣ ເລເຢນ (Ursula von der Leyen) ປະທານຄະນະກຳມະການເອີຣົບ. ເຮັດໃຫ້ທ່ານຕ້ອງຢຸດການຖະແຫຼງຂ່າວທັນທີ ເພື່ອເດີນທາງໄປຍັງພື້ນທີ່ເກີດເຫດ ພ້ອມທັງປະກາດໃຫ້ວັນພຸດ (11 ພະຈິກ) ເປັນ “ວັນໄວ້ອາໄລແຫ່ງຊາດ” ເພື່ອລຳລຶກເຖິງຜູ້ເສຍຊີວິດຈາກອຸບັດຕິເຫດຄັ້ງນີ້.

ທີ່ມາຂ່າວ: bbc/ap