ຈັບໂຕຊາຍຄົນລາວ ຕາມໝາຍຈັບຄະດີຟອກເງິນ ມີການລົງທຶນ ຄຣິບໂຕ ແລະ ຟໍເຣັກ

AD

AD

AD

ຕຳຫຼວດກວດຄົນເຂົ້າເມືອງຈັງຫວັດໜອງຄາຍ (ຕມ.ໜອງຄາຍ) ຈັບກຸມຊາຍຊາວລາວ ຜູ້ຈັດການໂຄງການກໍ່ສ້າງສະຖານທີ່ລາຊະການຂອງໜ່ວຍງານລັດໃນ ສປປ ລາວ ຫຼັງຖືກສານອາຍາອອກໝາຍຈັບໃນຂໍ້ຫາຮ່ວມກັນຟອກເງິນ ແລະສົມຄົບກັນຕັ້ງແຕ່ 2 ຄົນຂຶ້ນໄປເພື່ອກະທຳຄວາມຜິດຖານຟອກເງິນ ໂດຍມີການກະທຳຄວາມຜິດຖານຟອກເງິນເກີດຂຶ້ນຈາກການສົມຄົບດັ່ງກ່າວ.

ວັນທີ 2 ພະຈິກ 2026 ພັນຕຳຫຼວດເອກ ນົບພະດົນ ຮັກຊາດ ຜູ້ກຳກັບການຕຳຫຼວດກວດຄົນເຂົ້າເມືອງຈັງຫວັດໜອງຄາຍ, ພັນຕຳຫຼວດໂທ ທິຍາພັດ ຣັງສິພຣາມະນະກຸນ ຮອງຜູ້ກຳກັບການ ແລະພັນຕຳຫຼວດໂທ ອະພິຊາດ ຄົນທາ ສາລະວັດ ພ້ອມດ້ວຍເຈົ້າໜ້າທີ່ ຕມ.ໜອງຄາຍ ພາຍໃຕ້ນະໂຍບາຍຂອງ ພົນຕຳຫຼວດເອກ ສຳລານ ນວນມາ ຜູ້ບັນຊາການຕຳຫຼວດແຫ່ງຊາດໄທ ແລະການອຳນວຍການຂອງບັນດາຜູ້ບັນຊາການລະດັບສູງຂອງສຳນັກງານຕຳຫຼວດກວດຄົນເຂົ້າເມືອງ ໄດ້ຈັບກຸມ MR. DARAVIENG CHANTHALANGSY ສັນຊາດລາວ ອາຍຸ 46 ປີ ປະຊາຊົນບ້ານໜອງບົວທອງ ເມືອງສີໂຄດຕະບອງ ແຂວງວຽງຈັນ ຕາມໝາຍຈັບສານອາຍາເລກທີ 5679/2569 ລົງວັນທີ 2 ກັນຍາ 2026 ໃນຂໍ້ຫາຮ່ວມກັນຟອກເງິນ ແລະສົມຄົບກັນຕັ້ງແຕ່ 2 ຄົນຂຶ້ນໄປເພື່ອກະທຳຄວາມຜິດຖານຟອກເງິນ ແລະມີການກະທຳຄວາມຜິດຖານຟອກເງິນເກີດຂຶ້ນຈາກການສົມຄົບດັ່ງກ່າວ.

ພັນຕຳຫຼວດໂທ ທິຍາພັດ ຣັງສິພຣາມະນະກຸນ ຮອງຜູ້ກຳກັບການ ຕມ.ໜອງຄາຍ ເປີດເຜີຍວ່າ ຈາກການສອບສວນຜູ້ຕ້ອງຫາ ຊາບວ່າປັດຈຸບັນລາວເຮັດວຽກຢູ່ ສປປ ລາວ ໃນຕຳແໜ່ງຜູ້ຈັດການໂຄງການກໍ່ສ້າງສະຖານທີ່ລາຊະການຂອງໜ່ວຍງານຕຳຫຼວດ ໃນແຂວງວຽງຈັນ. ນອກຈາກນັ້ນ ຍັງໄດ້ລົງທຶນຊື້ຂາຍແລກປ່ຽນສະກຸນເງິນໃນ ສປປ ລາວ ໂດຍເຮັດທຸລະກຳແລກປ່ຽນເງິນຕາເພື່ອນຳໄປລົງທຶນຊື້ຂາຍສິນຊັບດິຈິຕອນ (Cryptocurrency) ແລະຊື້ຂາຍເງິນຕາຕ່າງປະເທດ (Forex) ຄວບຄູ່ກັນໄປ.

ພ້ອມກັນນີ້ ລາວຍັງກຳລັງຈະລົງທຶນເປັນຕົວແທນນຳສິນຄ້າຜະລິດຕະພັນອາຫານເພື່ອສຸຂະພາບຂອງ ດຣ.ອ໋ອຍ ຈາກຈັງຫວັດຊຽງໃໝ່ ໄປຈຳໜ່າຍໃນ ສປປ ລາວ. ໃນວັນທີ 2 ພະຈິກ 2026 ລາວໄດ້ເດີນທາງເຂົ້າມາໃນປະເທດໄທ ເພື່ອຈະເດີນທາງຕໍ່ໄປຍັງຈັງຫວັດຊຽງໃໝ່ ໂດຍຜ່ານຂົວມິດຕະພາບໄທ-ລາວ ແຫ່ງທີ 1 ໃນເຂດເມືອງໜອງຄາຍ ຈັງຫວັດໜອງຄາຍ ກ່ອນຈະຊາບວ່າຕົນເອງມີໝາຍຈັບຂອງສານອາຍາໃນປະເທດໄທ ແລະຖືກຈັບກຸມຕາມໝາຍຈັບດັ່ງກ່າວ.

ພາຍຫຼັງການສອບສວນ ເຈົ້າໜ້າທີ່ຈະຄວບຄຸມຕົວສົ່ງໃຫ້ພະນັກງານສອບສວນ ກອງກຳກັບການ 5 ກອງບັງຄັບການປ້ອງກັນແລະປາບປາມການທຸຈະລິດ (ບກ.ປປປ.) ສຳນັກງານຕຳຫຼວດສອບສວນກາງ (ບຊ.ກ.) ເພື່ອດຳເນີນຄະດີຕາມກົດໝາຍຕໍ່ໄປ.

ທີ່ມາ: nongkhainewsonline