ປະທານຄະນະກວດກາສູນກາງພັກ ຢ້ຽມຢາມ ບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ

AD

AD

AD

ທ່ານ ວັນໄຊ ພອງສະຫວັນ ກຳມະການກົມການເມືອງສູນກາງພັກ ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫຼວງສູນກາງ ພ້ອມດ້ວຍຄະນະ ໄດ້ເຄື່ອນໄຫວລົງຊຸກຍູ້, ຕິດຕາມ ກວດກາ ການຈັດຕັ້ງປະຕິບັດວຽກງານ ຂອງບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈໍາກັດ ຢູ່ເມືອງລ້ອງແຈ້ງ ໃນວັນທີ 10 ພະຈິກຜ່ານມາ ໂດຍມີ ທ່ານ ພອຍຄໍາ ຮຸ່ງບຸນຍວງ ກຳມະການສູນກາງພັກ ເລຂາພັກແຂວງ ປະທານສະພາປະຊາຊົນ ແຂວງໄຊສົມບູນ ພ້ອມຄະນະຕິດຕາມນຳ

ທ່ານ ວັນດີ ກວາງວິວັນ ປະທານບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈໍາກັດ ໄດ້ລາຍງານສະພາບລວມຂອງບໍລິສັດ, ການດຳເນີນງານ ຂະບວນການຜະລິດ, ລະບົບໂຮງງານ, ມາດຕະການຮັກສາຄວາມປອດໄພ, ມາດຕະການຮັກສາສິ່ງແວດລ້ອມ, ການພັດທະນາຊຸມຊົນ ແລະ ການສະໜັບສະໜູນທ້ອງຖິ່ນ ພ້ອມທັງ ລາຍງານຂໍ້ສະດວກ, ຂໍ້ຫຍຸ້ງຍາກ ແລະ ບັນຫາທີ່ຍັງຄົງຄ້າງຕ່າງໆ ໃນການຈັດຕັ້ງປະຕິບັດວຽກງານ ຂອງບໍລິສັດ ໃຫ້ຮັບຊາບ.

ໃນໂອກາດດັ່ງກ່າວ, ທ່ານ ວັນໄຊ ພອງສະຫວັນ ໄດ້ເນັ້ນໜັກໃຫ້ ບໍລິສັດ ສືບຕໍ່ເອົາໃຈໃສ່ການຈັດຕັ້ງປະຕິບັດວຽກງານດ້ວຍຄວາມຮັບຜິດຊອບສູງ ໂດຍຍົກສູງປະສິດທິພາບໃນການຄຸ້ມຄອງ ແລະ ບໍລິຫານການຜະລິດ ໃຫ້ຖືກຕ້ອງຕາມມາດຕະຖານເຕັກນິກຕ່າງໆ ໂດຍສະເພາະແມ່ນມາດຕະການຮັກສາສິ່ງແວດລ້ອມ ເພື່ອບໍ່ໃຫ້ມີຜົນກະທົບຕໍ່ສິ່ງແວດລ້ອມ ແລະ ທໍາມະຊາດ, ນອກຈາກນີ້ ກໍໃຫ້ປະກອບສ່ວນພັດທະນາຊຸມຊົນ ແລະ ສະໜັບສະໜູນທ້ອງຖິ່ນ ໂດຍການນຳໃຊ້ແຮງງານຄົນໃນພື້ນທີ່ ກໍຄືແຮງງານລາວ ເພື່ອສ້າງວຽກເຮັດງານທໍາ ແລະ ສ້າງອາຊີບ ໃຫ້ແກ່ປະຊາຊົນ ພ້ອມທັງຊຸກຍູ້ ແລະສົ່ງເສີມປະຊາຊົນ ເຂດໃກ້ຄຽງ ໃຫ້ທຳການຜະລິດ ປູກຝັງ-ລ້ຽງສັດ ເຊັ່ນ: ລ້ຽງງົວ, ຄວາຍ, ໝູ, ໄກ່ ແລະ ປູກພືດຜັກຕ່າງໆ ເພື່ອສະໜອງໃຫ້ແກ່ບໍລິສັດ, ຫຼຸດຜ່ອນການຊື້ສະບຽງອາຫານຈາກແຫຼ່ງອື່ນ ເພື່ອເປັນການສ້າງລາຍຮັບໃຫ້ປະຊາຊົນໃນພື້ນທີ່, ສິ່ງສໍາຄັນເປັນການປະກອບສ່ວນໃນການແກ້ໄຂຄວາມທຸກຍາກ, ຍົກສູງລະດັບຊີວິດການເປັນຢູ່ຂອງປະຊາຊົນ ໃຫ້ດີຂຶ້ນຢ່າງເປັນກ້າວໆ.

ທີ່ມາ: ໄຊສົມບູນ