ໂຈນ ລັກເຫລັກສານເສົາໄຟຟ້າແຮງສູງ ເສຍຫາຍຈໍານວນຫລາຍເສັ້ນ ຢູ່ເຂດເມືອງນາຊາຍທອງ

ລັດວິສາຫະກິດໄຟຟ້າລາວ ສາຂານະຄອນຫລວງວຽງຈັນ2 ລາຍງານວ່າ: ໃນລະຫວ່າງວັນທີ 29 ກັນຍາ ຫາ 02 ຕຸລາ 2026 ຫ້ອງການຄຸ້ມຄອງສາຍສົ່ງ ແລະ ສະຖານີໄຟຟ້າ ທີ່ຂື້ນກັບສາຂານະຄອນຫລວງວຽງຈັນ 2 ໄດ້ລົງປະຕິບັດວຽກກວດກາສະພາບເຕັກນິກຕົ້ນເສົາ, ສິ່ງແວດລ້ອມກ້ອງແລວ ແລະ ຕັດຕົ້ນໄມ້ທີ່ມີຄວາມສ່ຽງອອກຈາກ 2 ແລວສາຍສົ່ງ 115kV ຈຳນວນ 74 ຕົ້ນເສົາຄື:

1. Line1-2 ແສງສະຫວ່າງ ຫາ ນາຊາຍທອງ

2. Line ໂພນສູງ ຫາ ນາຊາຍທອງ

ການລົງປະຕິບັດວຽກໃນຄັ້ງນີ້ ໄດ້ອະນາໄມຕົ້ນໄມ້ ແລະ ກວດກາອຸປະກອນໄຟຟ້າ. ພ້ອມນີ້, ຍັງພົບເຫັນກຸ່ມຄົນບໍ່ດີ ລັກນ໋ອດ ແລະ ເຫລັກສານເສົາເສຍຫາຍຈຳນວນຫລາຍຕົ້ນ.

ອຸປະກອນໄຟຟ້າຖືເປັນຊັບສິນສ່ວນລວມຂອງຊາດການລັກ ແລະ ທຳລາຍອຸປະກອນໄຟຟ້າ ເປັນສິ່ງທີ່ຜິດກົດໝາຍ. ຖ້າຫາກທ່ານພົບເຫັນເຫດການດັ່ງກ່າວສາມາດແຈ້ງ ສາຍດ່ວນໄຟຟ້າລາວ 1199 ຕະຫລອດ 24 ຊົ່ວໂມງ ຫລື ເບີໂທ 020 28256536.