ການປະທ້ວງໃນທົ່ວເອີຣົບ ເມື່ອຄົນຮຸ່ນໃໝ່ບໍ່ເຊື່ອວ່າ ອະນາຄົດຈະດີກວ່າປັດຈຸບັນ

AD

AD

AD

ຈາກຝຣັ່ງ, ແບນຊິກ, ອິຕາລີ ໄປຈົນເຖິງສະເປນ ແລະ ໂປຕຸເກດ ການປະທ້ວງທີ່ເກີດຂຶ້ນໃນຫຼາຍປະເທດຂອງເອີຣົບ ອາດມີຈຸດເລີ່ມຕົ້ນທີ່ແຕກຕ່າງກັນ ແຕ່ກຳລັງສະທ້ອນໃຫ້ເຫັນເຖິງຄວາມບໍ່ພໍໃຈທີ່ຄ້າຍຄືກັນ ນັ້ນຄື ຄ່າຄອງຊີບທີ່ສູງຂຶ້ນ, ການຫາທີ່ຢູ່ອາໄສທີ່ຍາກຂຶ້ນ, ລະບົບການສຶກສາທີ່ຕ້ອງການງົບປະມານເພີ່ມຂຶ້ນ ແລະ ຕະຫຼາດແຮງງານທີ່ບໍ່ສາມາດຮັບປະກັນໄດ້ວ່າ ຄົນຮຸ່ນໃໝ່ຈະມີຊີວິດທີ່ໝັ້ນຄົງກວ່າຄົນຮຸ່ນກ່ອນ

“ຂ້ອຍເຫັນຄວາມຄ້າຍຄືກັນຫຼາຍກວ່າຄວາມແຕກຕ່າງ” ໜຶ່ງໃນຜູ້ໃຫ້ສຳພາດກ່າວກັບ CNN ໂດຍຊີ້ວ່າ ສຽງຮຽກຮ້ອງຈາກຄົນຮຸ່ນໃໝ່ບໍ່ໄດ້ຈຳກັດຢູ່ພຽງບັນຫາການສຶກສາ ແລະ ມະຫາວິທະຍາໄລເທົ່ານັ້ນ ແຕ່ຍັງລວມເຖິງຄ່າຄອງຊີບ ແລະ ທີ່ຢູ່ອາໄສ ຊຶ່ງກາຍເປັນບັນຫາສຳຄັນໃນຊີວິດປະຈຳວັນ

ສຽງຮຽກຮ້ອງໃນລັກສະນະດຽວກັນນີ້ ຍັງປາກົດໃນການຊຸມນຸມຂອງນັກສຶກສາອິຕາລີ ເມື່ອ ຊາບຣິນາ ບຣິຊໂຊລາ ຜູ້ນຳສະຫະພັນການສຶກສາ ຮຽກຮ້ອງໃຫ້ປະຊາຊົນຮ່ວມກັນສົ່ງສຽງຮຽກຮ້ອງເພື່ອໂຮງຮຽນທີ່ປອດໄພ, ການເຮັດວຽກທີ່ມີກຽດສັກສີ, ລະບົບສາທາລະນະສຸກ ແລະ ຄວາມເປັນທຳໃນສັງຄົມ

ຈູລຽສ ຟິນເທລມັນ ຜູ້ຮ່ວມກໍ່ຕັ້ງ ແລະ ບັນນາທິການບໍລິຫານຂອງຈົດໝາຍຂ່າວ The European Correspondent ໃຫ້ທັດສະນະວ່າ ການປະທ້ວງຄັ້ງນີ້ສະທ້ອນໃຫ້ເຫັນເຖິງຄວາມອັດອັ້ນຕັນໃຈປະການໜຶ່ງ ນັ້ນຄື ຄວາມຮູ້ສຶກວ່າ ການເມືອງຂອງເອີຣົບລົ້ມເຫຼວໃນການສ້າງຜົນລັບທີ່ດີໃຫ້ແກ່ຄົນຮຸ່ນຕໍ່ໄປ

“ສິ່ງທີ່ພວກເຮົາກຳລັງເຜີຍພົບຢູ່ໃນຂະນະນີ້ ຄືການທີ່ຄຳໝັ້ນສັນຍາຂອງລະບອບປະຊາທິປະໄຕເສລີ ທີ່ເຄີຍບອກວ່າ ຄົນຮຸ່ນຕໍ່ໄປຈະມີຊີວິດຄວາມເປັນຢູ່ທີ່ດີກວ່າຄົນຮຸ່ນປັດຈຸບັນ ບັດນີ້ຄຳໝັ້ນສັນຍາດັ່ງກ່າວກັບບໍ່ເປັນຄວາມຈິງອີກຕໍ່ໄປ”

ນອກຈາກນີ້ ຍັງມີບັນຫາດ້ານການສຶກສາ, ຄ່າເຊົ່າ ແລະ ລາຄາທີ່ຢູ່ອາໄສ ຕະຫຼອດຮອດຕະຫຼາດແຮງງານທີ່ຂາດຄວາມໝັ້ນຄົງ ຊຶ່ງສ່ວນໜຶ່ງເປັນຜົນມາຈາກການທີ່ປັນຍາປະດິດ (AI) ເຂົ້າມາມີບົດບາດຫຼາຍຂຶ້ນ ຈົນເຮັດໃຫ້ຄວາມຕ້ອງການຕຳແໜ່ງວຽກລະດັບເລີ່ມຕົ້ນຫຼຸດລົງ ນອກຈາກນັ້ນ ຍັງມີວິກິດການດ້ານສະພາບອາກາດ ທີ່ສົ່ງຜົນໃຫ້ສະພາບອາກາດທົ່ວໂລກປ່ຽນແປງຜິດປົກກະຕິ ປັດໄຈເຫຼົ່ານີ້ລ້ວນແຕ່ສົ່ງຜົນໃຫ້ຄົນໜຸ່ມສາວໃນລຸ້ນ Gen Z ອອກມາຮ່ວມການປະທ້ວງ

ປັດຈຸບັນ ຫຼາຍປະເທດໃນເອີຣົບກຳລັງເກີດການປະທ້ວງ ບໍ່ວ່າຈະເປັນ ຝຣັ່ງ, ອານບານີ, ອິຕາລີ, ສະເປນ ແລະ ໂປຕຸເກດ ຄວາມບໍ່ພໍໃຈໃນສັງຄົມກຳລັງເກີດຂຶ້ນໃນຊ່ວງເວລາທີ່ລັດຖະບານຂອງຫຼາຍປະເທດກຳລັງປະເຊີນຂໍ້ຈຳກັດດ້ານງົບປະມານ ໂດຍປະເທດທີ່ເກີດການປະທ້ວງຕ່າງກໍກຳລັງປະເຊີນກັບແຮງກົດດັນທາງເສດຖະກິດ ແລະ ພາລະໜີ້ສາທາລະນະທີ່ຢູ່ໃນລະດັບສູງ ເຮັດໃຫ້ການເພີ່ມງົບປະມານເພື່ອແກ້ໄຂບັນຫາສັງຄົມເຮັດໄດ້ຍາກຂຶ້ນ

ດັ່ງນັ້ນ ໂຈດທ້າທາຍຂອງລັດຖະບານເອີຣົບ ຈຶ່ງມີຄວາມສັບຊ້ອນຫຼາຍກວ່າພຽງແຕ່ການຮັບມືກັບຜູ້ຊຸມນຸມ ເພາະຕ້ອງຈັດການທັງຄວາມຄາດຫວັງຂອງປະຊາຊົນ, ຄວາມໝັ້ນຄົງທາງເສດຖະກິດ ແລະ ຂໍ້ຈຳກັດໃນການໃຊ້ຈ່າຍຂອງພາກລັດໄປພ້ອມໆ ກັນ