ອາຣບິລ — ຊາອຸດີອາຣະເບຍ ເຫັນດີເບື້ອງຕົ້ນໃນການຟື້ນຟູໂຄງການທໍ່ສົ່ງນ້ຳມັນຮ່ວມກັບອີຣັກ ແຕ່ຈຳເປັນຕ້ອງສ້າງທໍ່ສົ່ງນ້ຳມັນສາຍໃໝ່ ແລະແກ້ໄຂຂໍ້ຂັດແຍ່ງດ້ານກຳມະສິດທີ່ຍັງຄ້າງຄາ

AD

AD

AD

ເມື່ອບໍ່ດົນມານີ້ ຊາອຸດີອາຣະເບຍໄດ້ໃຫ້ການເຫັນດີໃນຫຼັກການຂັ້ນຕົ້ນ ຕໍ່ການຟື້ນຟູໂຄງການທໍ່ສົ່ງນ້ຳມັນເພື່ອການສົ່ງອອກຮ່ວມກັບອີຣັກ ແຕ່ແຜນການນີ້ຈະຕ້ອງມີການກໍ່ສ້າງທໍ່ສົ່ງນ້ຳມັນສາຍໃໝ່ ແລະແກ້ໄຂບັນຫາກຳມະສິດທີ່ຍັງບໍ່ສາມາດຕົກລົງກັນໄດ້.

ລັດຖະບານແບກແດດຂອງອີຣັກໄດ້ຍົກປະເດັນການຟື້ນຟູທໍ່ສົ່ງນ້ຳມັນຮ່ວມດັ່ງກ່າວຂຶ້ນມາຫາລືຫຼາຍຄັ້ງ ໂດຍຝ່າຍຣິຢາດສະແດງທ່າທີພ້ອມເຫັນດີໃນຫຼັກການ ທີ່ຈະປັບປຸງຂໍ້ຕົກລົງລະຫວ່າງສອງປະເທດ ຫຼັງຈາກມີການຈັດຕັ້ງຄະນະກຳມະການດ້ານເຕັກນິກຮ່ວມກັນ.

ແນວໃດກໍຕາມ ໂຄງການນີ້ຍັງຈຳເປັນຕ້ອງມີການຫາລືລະຫວ່າງສອງປະເທດ ກ່ຽວກັບວິທີການກໍ່ສ້າງ, ຄ່າໃຊ້ຈ່າຍ ແລະກຳມະສິດໃນໂຄງສ້າງພື້ນຖານດັ່ງກ່າວ.

ແຫຼ່ງຂ່າວລະບຸວ່າ ຊາອຸດີອາຣະເບຍໄດ້ອະນຸມັດຂໍ້ສະເໜີເບື້ອງຕົ້ນໃນການຟື້ນຟູທໍ່ສົ່ງນ້ຳມັນຮ່ວມກັບອີຣັກແລ້ວ. ດັ່ງນັ້ນ ລັດຖະບານຊາອຸດີອາຣະເບຍຈຶ່ງພ້ອມປັບປຸງຂໍ້ຕົກລົງສອງຝ່າຍ ຫຼັງຈາກທັງສອງປະເທດຈັດຕັ້ງຄະນະກຳມະການດ້ານເຕັກນິກ ເພື່ອຫາລືລາຍລະອຽດຂອງໂຄງການ.

ທໍ່ສົ່ງນ້ຳມັນສາຍນີ້ມີຄວາມຍາວປະມານ 1,568 ກິໂລແມັດ ຖືກກໍ່ສ້າງຂຶ້ນໃນຊຸມປີ 1980 ໂດຍເຊື່ອມຕໍ່ແຫຼ່ງນ້ຳມັນຊູໄບຣ໌ (Zubair) ໃນແຂວງບັສຣາ ທາງພາກໃຕ້ຂອງອີຣັກ ກັບທ່າເຮືອຢັນບູ (Yanbu) ຢູ່ຊາຍຝັ່ງທະເລແດງຂອງຊາອຸດີອາຣະເບຍ.

ທໍ່ສົ່ງນ້ຳມັນດັ່ງກ່າວໄດ້ຢຸດດຳເນີນການໃນເດືອນສິງຫາ ປີ 1990 ຫຼັງຈາກອີຣັກສົ່ງກອງທັບເຂົ້າບຸກຄູເວດ ແລະເກີດສົງຄາມອ່າວເປີເຊຍ.

ຄ່າຊ່ອມແປງສູງ ອາດຕ້ອງສ້າງທໍ່ໃໝ່ແທນ

ແນວໃດກໍຕາມ ການສ້ອມແປງທໍ່ສົ່ງນ້ຳມັນສາຍນີ້ບໍ່ແມ່ນເລື່ອງງ່າຍ.

ຊາອຸດີອາຣະເບຍເຫັນວ່າ ຄ່າໃຊ້ຈ່າຍໃນການສ້ອມແປງ ແລະປັບປຸງລະບົບເກົ່າ ອາດສູງເກືອບເທົ່າກັບການກໍ່ສ້າງລະບົບໃໝ່ທັງໝົດ.

ດັ່ງນັ້ນ ລັດຖະບານຊາອຸດີອາຣະເບຍຈຶ່ງສະເໜີໃຫ້ກໍ່ສ້າງທໍ່ສົ່ງນ້ຳມັນສາຍໃໝ່ຂຶ້ນມາແທນ ໂດຍໃຫ້ອີຣັກຮັບຜິດຊອບຄ່າໃຊ້ຈ່າຍບາງສ່ວນ ໂດຍສະເພາະສ່ວນຂອງທໍ່ທີ່ຕັ້ງຢູ່ພາຍໃນດິນແດນຂອງອີຣັກ.

ອີກບັນຫາໜຶ່ງຄື ຊາອຸດີອາຣະເບຍໄດ້ເຂົ້າຄວບຄຸມທໍ່ສົ່ງນ້ຳມັນສ່ວນທີ່ຢູ່ໃນດິນແດນຂອງຕົນໃນປີ 2001 ແລະໄດ້ນຳໂຄງສ້າງພື້ນຖານນັ້ນມາໃຊ້ຂົນສົ່ງນ້ຳມັນຈາກພາກຕາເວັນອອກຂອງປະເທດໄປຍັງທະເລແດງ.

ດັ່ງນັ້ນ ທັງສອງຝ່າຍຈຶ່ງຈຳເປັນຕ້ອງແກ້ໄຂບັນຫາກ່ຽວກັບກຳມະສິດ, ສິດໃນການນຳໃຊ້ ແລະຂໍ້ຕົກລົງທາງການເມືອງ ກ່ອນທີ່ໂຄງການຈະສາມາດເລີ່ມດຳເນີນການໄດ້.

ເປັນຫຍັງອີຣັກຈຶ່ງຕ້ອງການຟື້ນຟູເສັ້ນທາງນີ້?

ການຟື້ນຟູເສັ້ນທາງຂົນສົ່ງນ້ຳມັນຜ່ານຊາອຸດີອາຣະເບຍ ມີຄວາມສຳຄັນທາງຍຸດທະສາດຕໍ່ອີຣັກ ໃນຄວາມພະຍາຍາມກະຈາຍເສັ້ນທາງການສົ່ງອອກນ້ຳມັນ ແລະຫຼຸດການເພິ່ງພາການຂົນສົ່ງຜ່ານອ່າວເປີເຊຍ ແລະຊ່ອງແຄບຮໍມຸສ (Strait of Hormuz).

ເສັ້ນທາງໃໝ່ນີ້ຍັງອາດຊ່ວຍໃຫ້ລັດຖະບານອີຣັກມີຄວາມຍືດຫຍຸ່ນຫຼາຍຂຶ້ນໃນການຄວບຄຸມປະລິມານການສົ່ງນ້ຳມັນດິບໄປຍັງຕະຫຼາດສາກົນ.

ໂດຍສະເພາະໃນສະພາບການທີ່ຄວາມບໍ່ແນ່ນອນດ້ານຄວາມໝັ້ນຄົງໃນພາກພື້ນ ອາດສົ່ງຜົນກະທົບຕໍ່ກິດຈະກຳການຂົນສົ່ງທາງທະເລ ແລະພະລັງງານ.

ແຫ່ງທີ່ມາ: basnews/shafaq