ຕມ.ໜອງຄາຍ ຈັບກຸມຍິງຊາວລາວ ຕາມໝາຍຈັບສານອາຍາໄທ ຂໍ້ຫາພົວພັນເຄືອຂ່າຍບັນຊີມ້າຂາຍຢາເຖື່ອນ

AD

AD

AD

ຕຳຫຼວດກວດຄົນເຂົ້າເມືອງຈັງຫວັດໜອງຄາຍ ປະເທດໄທ ໄດ້ຈັບກຸມຍິງຊາວລາວ ຕາມໝາຍຈັບຂອງສານອາຍາ ໃນຂໍ້ຫາຮ່ວມກັນຈຳໜ່າຍຢາແຜນປັດຈຸບັນໂດຍບໍ່ໄດ້ຮັບອະນຸຍາດ, ຈຳໜ່າຍຢາທີ່ບໍ່ໄດ້ຂຶ້ນທະບຽນຕຳຮັບຢາ ແລະ ມີຄວາມເຊື່ອມໂຍງກັບເຄືອຂ່າຍບັນຊີມ້າ.

ເຫດການດັ່ງກ່າວເກີດຂຶ້ນໃນວັນທີ 28 ຕຸລາ 2026 ໂດຍມີພັນຕຳຫຼວດເອກ ນົບພະດົນ ຮັກຊາດ ຜູ້ກຳກັບການກວດຄົນເຂົ້າເມືອງຈັງຫວັດໜອງຄາຍ ພ້ອມດ້ວຍຮອງຜູ້ກຳກັບການ ແລະ ເຈົ້າໜ້າທີ່ທີ່ກ່ຽວຂ້ອງ ດຳເນີນການຈັບກຸມຕາມໝາຍຈັບສານອາຍາເລກທີ 3289/2569 ລົງວັນທີ 11 ມິຖຸນາ 2026.

ຜູ້ຖືກຈັບແມ່ນ ນາງ ລັດສະໝີ ເນົາວະລາດ (MRS. LATSAMY NAOVALAT) ອາຍຸ 40 ປີ ມີທີ່ຢູ່ບ້ານນາຊັບ ເມືອງນາຊາຍທອງ ນະຄອນຫຼວງວຽງຈັນ ສປປ ລາວ. ໂດຍມີພະນັກງານສອບສວນກອງກຳກັບການ 4 ກອງບັງຄັບການປາບປາມການກະທຳຜິດກ່ຽວກັບຜະລິດຕະພັນ ແລະ ການບໍລິໂພກ ເປັນເຈົ້າຂອງຄະດີ.

ພັນຕຳຫຼວດໂທ ທີຍາພັດ ຣັງສິພຣາມະກຸນ ຮອງຜູ້ກຳກັບການກວດຄົນເຂົ້າເມືອງຈັງຫວັດໜອງຄາຍ ເປີດເຜີຍວ່າ ກ່ອນໜ້ານີ້ ເຈົ້າໜ້າທີ່ກອງກຳກັບການ 4 ໄດ້ຈັບກຸມຜູ້ຕ້ອງຫາລັກລອບຈຳໜ່າຍຢາແຜນປັດຈຸບັນ ໂດຍບໍ່ໄດ້ຮັບອະນຸຍາດ ແລະ ຈຳໜ່າຍຢາທີ່ບໍ່ໄດ້ຂຶ້ນທະບຽນຕຳຮັບຢາ.

ຈາກການກວດສອບພົບວ່າ ຜູ້ຂາຍຢາດັ່ງກ່າວໄດ້ໃຫ້ລູກຄ້າໂອນເງິນຄ່າຊື້ຢາເຂົ້າບັນຊີທະນາຄານກຸງເທບ ເຊິ່ງມີ ນາງ ລັດສະໝີ ເນົາວະລາດ ເປັນເຈົ້າຂອງບັນຊີ.

ຈາກການສອບປາກຄຳ ນາງ ລັດສະໝີ ໃຫ້ການວ່າ ຕົນປະກອບອາຊີບຄ້າຂາຍ ໂດຍເປີດຮ້ານຂາຍເຄື່ອງຊຳໃນ ສປປ ລາວ. ຕໍ່ມາໄດ້ເປີດບັນຊີທະນາຄານກຸງເທບ ເພື່ອຮັບເງິນໂອນຈາກຍາດພີ່ນ້ອງ ແລະ ຄົນຮູ້ຈັກໃນພື້ນທີ່ໃກ້ຄຽງ ທີ່ເດີນທາງໄປຢູ່ຝັ່ງໄທ ເພື່ອສົ່ງເງິນກັບບ້ານ ຫຼື ໃຊ້ຮັບຊຳລະຄ່າສິນຄ້າຂອງຮ້ານຕົນເອງ.

ນາງລັດສະໝີອ້າງວ່າ ບໍ່ຮູ້ວ່າເງິນບາງສ່ວນທີ່ໂອນເຂົ້າບັນຊີຂອງຕົນ ເປັນເງິນທີ່ມາຈາກການກະທຳຜິດກົດໝາຍຫຼືບໍ່. ພາຍຫຼັງການຈັບກຸມ ເຈົ້າໜ້າທີ່ຈະຄວບຄຸມຕົວສົ່ງໃຫ້ພະນັກງານສອບສວນກອງກຳກັບການ 4 ເພື່ອດຳເນີນຄະດີຕາມກົດໝາຍຕໍ່ໄປ.
ທີ່ມາ: nongkhainewsonline