ຫຼວງພະບາງເຂັ້ມງວດ! ເລີ່ມລົງກວດກາຮ້ານຄ້າທີ່ຕັ້ງກີດຂວາງທາງຍ່າງກີດຂວາງທາງສັນຈອນ

AD

AD

AD

ອີງຕາມແຈ້ງການຂອງຫ້ອງການອຸດສາຫະກຳ ແລະການຄ້າ ນະຄອນຫຼວງພະບາງ ສະບັບເລກທີ 323/ຫຄອນ-ຫຼບ ລົງວັນທີ 30 ຕຸລາ 2026, ໃນມື້ນີ້ ຄະນະວຽກງານຈາກຫ້ອງການອຸດສາຫະກຳ ແລະການຄ້າ ນະຄອນຫຼວງພະບາງ ໄດ້ສົມທົບກັບຫ້ອງການຄຸ້ມຄອງ ແລະບໍລິຫານຕົວເມືອງ ພ້ອມດ້ວຍຄະນະກຳມະການຈັດສັນຕົວເມືອງ ລົງກວດກາ ແລະຈັດລະບຽບພາຍໃນເຂດຕົວເມືອງ ເພື່ອປັບປຸງຄວາມສະອາດ ຄວາມສວຍງາມ ແລະຄວາມເປັນລະບຽບຮຽບຮ້ອຍ ສົມກັບການເປັນເມືອງມໍລະດົກໂລກ.

ການລົງກວດກາຄັ້ງນີ້ ໄດ້ເນັ້ນໃສ່ຫຼາຍບັນຫາສຳຄັນ ປະກອບມີ:

• ການວາງຂາຍສິນຄ້າຕາມທາງຍ່າງ ທີ່ກີດຂວາງການເດີນທາງຂອງປະຊາຊົນ ແລະນັກທ່ອງທ່ຽວ.
• ການຕໍ່ແງ້ມ ແລະຕໍ່ເທີບທີ່ບໍ່ຖືກຕ້ອງຕາມລະບຽບ.
• ການກໍ່ສ້າງສິ່ງປຸກສ້າງຕ່າງໆ ທີ່ບໍ່ປະຕິບັດຕາມລະບຽບການ.
• ການວາງ ແລະຖິ້ມຂີ້ເຫຍື້ອບໍ່ເປັນລະບຽບ.
• ບັນຫາອື່ນໆ ທີ່ສົ່ງຜົນກະທົບຕໍ່ພູມທັດ ຄວາມສະອາດ ແລະຄວາມງາມຂອງຕົວເມືອງ.

ພ້ອມນີ້ ຂໍຮຽກຮ້ອງເຖິງພໍ່ແມ່ພີ່ນ້ອງປະຊາຊົນ ຕະຫຼອດຮອດບັນດາຜູ້ປະກອບການທຸກທ່ານ ຈົ່ງຮ່ວມມືກັນປະຕິບັດຕາມລະບຽບກົດໝາຍ ບໍ່ວາງສິ່ງຂອງ ຫຼືສິນຄ້າກີດຂວາງທາງຍ່າງ ແລະຮ່ວມກັນຮັກສາຄວາມສະອາດ ຄວາມສວຍງາມ ພ້ອມທັງຄວາມເປັນລະບຽບຮຽບຮ້ອຍຂອງນະຄອນຫຼວງພະບາງ ໃຫ້ຄົງຄວາມງົດງາມ ແລະສ້າງຄວາມປະທັບໃຈໃຫ້ແກ່ຜູ້ມາຢ້ຽມຢາມ.

ຂ່າວ: ຄະນະໂຄສະນາອົບຮົມ ນະຄອນຫລວງພະບາງ