ມີການກວດພົບສັນຍານວິທະຍຸ ປິດສະໜາຈາກທິດທາງລະບົບດາວ K2-155 ທີ່ຢູ່ຫ່າງຈາກໂລກ 238 ປີແສງ

AD

AD

AD

ທີມນັກວິໄຈທີ່ນຳໃຊ້ຂໍ້ມູນຈາກກ້ອງໂທລະທັດວິທະຍຸ FAST ຂອງຈີນ ກວດພົບສັນຍານວິທະຍຸທີ່ຜິດປົກກະຕິ ຈາກທິດທາງຂອງລະບົບດາວ K2-155 ເຊິ່ງຢູ່ຫ່າງຈາກໂລກປະມານ 238 ປີແສງ.

ພາບ: ສຳນັກຂ່າວຊິນຫົວ

ສັນຍານດັ່ງກ່າວຖືກກວດພົບໃນຂະນະທີ່ທີມວິໄຈກຳລັງທົດສອບໂປຣແກຣມຄອມພິວເຕີຊຸດໃໝ່ ກັບຂໍ້ມູນການສັງເກດການເກົ່າຂອງກ້ອງ FAST ເຊິ່ງເປັນກ້ອງໂທລະທັດວິທະຍຸແບບຈານຮັບສັນຍານດ່ຽວທີ່ໃຫຍ່ທີ່ສຸດໃນໂລກ.

ໂດຍສະເພາະ ລະບົບດາວ K2-155 ມີດາວເຄາະປະເພດຊຸບເປີເອີດ 3 ດວງ ໂດຍດາວເຄາະດວງນອກສຸດມີຊື່ວ່າ K2-155d ຕັ້ງຢູ່ໃກ້ເຂດທີ່ອາດເໝາະສົມຕໍ່ການດຳລົງຊີວິດຮອບດາວລິກາແມ່.

ສັນຍານທີ່ກວດພົບມີຊື່ວ່າ NBS 260108 ເປັນຄື້ນວິທະຍຸທີ່ມີຄວາມຄົງທີ່ ແລະມີຄວາມເຂັ້ມຂຸ້ນຢູ່ໃນຊ່ວງຄວາມຖີ່ທີ່ແຄບຫຼາຍ.

ສິ່ງທີ່ເຮັດໃຫ້ສັນຍານນີ້ໜ້າສົນໃຈເປັນພິເສດ ຄືປະກົດການທາງທຳມະຊາດໃນຈັກກະວານສ່ວນໃຫຍ່ ແທບຈະບໍ່ສ້າງສັນຍານທີ່ມີຄວາມເຂັ້ມຂຸ້ນຢູ່ໃນຊ່ວງຄວາມຖີ່ແຄບຂະໜາດນີ້. ໃນຂະນະທີ່ສັນຍານຈາກເຄື່ອງສົ່ງທີ່ມະນຸດສ້າງຂຶ້ນ ມັກຈະມີລັກສະນະຄ້າຍຄືກັນ.

ດັ່ງນັ້ນ ສັນຍານປະເພດນີ້ຈຶ່ງກາຍເປັນໜຶ່ງໃນເປົ້າໝາຍສຳຄັນຂອງການຄົ້ນຫາຮ່ອງຮອຍທາງເທັກໂນໂລຊີຈາກສິ່ງມີຊີວິດນອກໂລກ.

ຂໍ້ສັງເກດທີ່ໜ້າສົນໃຈອີກຢ່າງໜຶ່ງ ຄືສັນຍານປາກົດຂຶ້ນສະເພາະໃນຊ່ອງຮັບສັນຍານທີ່ຫັນໜ້າໄປຫາລະບົບດາວ K2-155 ເທົ່ານັ້ນ ໃນຂະນະທີ່ຊ່ອງຮັບສັນຍານອີກ 18 ຊ່ອງຂອງກ້ອງ FAST ບໍ່ພົບສັນຍານທີ່ສອດຄ່ອງກັນ.

ນອກຈາກນີ້ ຄວາມຖີ່ຂອງສັນຍານຍັງຄ່ອຍໆຫຼຸດລົງຕາມເວລາ ເຮັດໃຫ້ເກີດເສັ້ນລາຍທີ່ປ່ຽນແປງໄປໃນກຣາຟຂໍ້ມູນການສັງເກດການ.

ທີມວິໄຈກ່າວວ່າ ການສຶກສາຄັ້ງນີ້ມີເປົ້າໝາຍເພື່ອຊ່ວຍຕອບຄຳຖາມໜຶ່ງທີ່ມະນຸດສົງໄສມາຢ່າງຍາວນານ ນັ້ນຄື ນອກຈາກໂລກແລ້ວ ຍັງມີສິ່ງມີຊີວິດທີ່ມີສະຕິປັນຍາຢູ່ໃນຈັກກະວານອີກຫຼືບໍ່?

ແນວໃດກໍຕາມ ການກວດພົບສັນຍານທີ່ຜິດປົກກະຕິ ບໍ່ໄດ້ໝາຍຄວາມວ່າສາມາດລະບຸແຫຼ່ງກຳເນີດຂອງສັນຍານນັ້ນໄດ້ໂດຍທັນທີ. ໂປຣແກຣມສາມາດກວດຈັບ ແລະຄັດເລືອກສັນຍານທີ່ໜ້າສົນໃຈສຳລັບການວິໄຈໄດ້ ແຕ່ບໍ່ສາມາດຢືນຢັນໄດ້ເອງວ່າສັນຍານເຫຼົ່ານັ້ນເກີດຈາກປະກົດການທາງທຳມະຊາດ ຫຼືເກີດຈາກເທັກໂນໂລຊີທີ່ມະນຸດສ້າງຂຶ້ນ.

ນັກວິທະຍາສາດເຫັນວ່າ ຈຳເປັນຕ້ອງປຽບທຽບຂໍ້ມູນຈາກຊ່ອງຮັບສັນຍານທັງ 19 ຊ່ອງຂອງກ້ອງ FAST ເພີ່ມເຕີມ ເພື່ອກຳນົດຕຳແໜ່ງ ແລະການເຄື່ອນທີ່ຂອງແຫຼ່ງກຳເນີດສັນຍານໃຫ້ແມ່ນຍຳຫຼາຍຂຶ້ນ. ການກວດສອບເພີ່ມເຕີມອາດຊ່ວຍແຍກສັນຍານທີ່ມາຈາກອາວະກາດ ອອກຈາກສັນຍານລົບກວນທີ່ເກີດຈາກອຸປະກອນ ຫຼືເທັກໂນໂລຊີຂອງມະນຸດ.

ເບິ່ງພາບຂະໜາດໃຫຍ່. | ພາບກ້ອງໂທລະທັດວິທະຍຸ FAST ຂອງປະເທດຈີນ ຖ່າຍເມື່ອວັນທີ 10 ສິງຫາ 2025.

ພາບ: SCJiang / Wikimedia Commons

ກ້ອງ FAST ສາມາດກວດຈັບສັນຍານວິທະຍຸທີ່ອ່ອນຫຼາຍໄດ້ ເນື່ອງຈາກມີພື້ນທີ່ຮັບສັນຍານຂະໜາດໃຫຍ່. ກ້ອງໂທລະທັດນີ້ຖືກສ້າງຂຶ້ນໃນອ່າງພູມສັນຖານທຳມະຊາດທາງຕອນໃຕ້ຂອງປະເທດຈີນ ມີເສັ້ນຜ່າສູນກາງປະມານ 500 ແມັດ ແລະມີພື້ນທີ່ໃຫຍ່ເທົ່າກັບສະໜາມກິລາບານເຕະ 30 ສະໜາມ.

ຜົນງານວິໄຈຄັ້ງນີ້ ໄດ້ຮັບການຕີພິມໃນວາລະສານວິຊາການດາລາສາດ ໂດຍນຳໃຊ້ຂໍ້ມູນຈາກກ້ອງ FAST ທີ່ບັນທຶກໄວ້ໃນປີ 2021 ຈາກການສັງເກດລະບົບດາວເຄາະທັງໝົດ 33 ລະບົບ ເພື່ອທົດສອບໂປຣແກຣມຄອມພິວເຕີຊຸດໃໝ່.

ລະບົບດາວ K2-155 ຖືກເລືອກເປັນເປົ້າໝາຍທີ່ໜ້າສົນໃຈ ເນື່ອງຈາກດາວເຄາະ K2-155d ຕັ້ງຢູ່ໃກ້ເຂດທີ່ອາດເໝາະສົມຕໍ່ການດຳລົງຊີວິດ ເຊິ່ງເປັນບໍລິເວນຮອບດາວລິກາທີ່ມີອຸນຫະພູມເໝາະສົມ ເພື່ອໃຫ້ນ້ຳສາມາດຄົງຢູ່ໃນຮູບແບບຂອງແຫຼວເທິງພື້ນຜິວດາວເຄາະໄດ້.

ດາວເຄາະ K2-155d ມີລັດສະໝີປະມານ 1.6 ເທົ່າຂອງໂລກ ແລະໃຊ້ເວລາປະມານ 40.7 ວັນ ໃນການໂຄຈອນຮອບດາວລິກາແມ່ຄົບໜຶ່ງຮອບ.

ຄຳວ່າ ຊຸບເປີເອີດ ໝາຍເຖິງດາວເຄາະທີ່ມີຂະໜາດໃຫຍ່ກວ່າໂລກ ແຕ່ນ້ອຍກວ່າດາວເຄາະຍັກໃຫຍ່ທີ່ເປັນນ້ຳກ້ອນ ເຊັ່ນ ດາວເນບຈູນ ແລະດາວຢູເຣນັສ.

ແທນທີ່ຈະຄົ້ນຫາຮ່ອງຮອຍຂອງສິ່ງມີຊີວິດໂດຍກົງ ທີມວິໄຈມຸ່ງເນັ້ນໄປທີ່ການຄົ້ນຫາສັນຍານວິທະຍຸ ເຊິ່ງອາດເປັນຮ່ອງຮອຍຂອງເທັກໂນໂລຊີທີ່ສ້າງຂຶ້ນໂດຍອາລະຍະທຳທີ່ມີຄວາມກ້າວໜ້າ.

ການເຄື່ອນທີ່ສຳພັນລະຫວ່າງແຫຼ່ງກຳເນີດທີ່ຢູ່ໄກກັບໂລກ ອາດເຮັດໃຫ້ຄວາມຖີ່ຂອງສັນຍານປ່ຽນແປງໄປຕາມເວລາ. ສຳລັບສັນຍານ NBS 260108 ພົບວ່າຄວາມຖີ່ຄ່ອຍໆຫຼຸດລົງ ເຮັດໃຫ້ເກີດຮູບແບບການປ່ຽນແປງໃນຂໍ້ມູນທີ່ສັງເກດໄດ້.

ເບິ່ງພາບຂະໜາດໃຫຍ່. | ພາບປຽບທຽບຂະໜາດລະຫວ່າງດາວເຄາະ K2-155 d ແລະໂລກ (ພາບຈິນຕະນາການຂອງສິລະປິນ).ພາບ: Martin Vargic / Halcyon Maps / Wikimedia Commons

ເມື່ອວິເຄາະຊ່ອງສັນຍານແຍກຕາມທິດທາງການສັ່ນຂອງຄື້ນທັງສອງຊ່ອງຂອງກ້ອງໂທລະທັດ ນັກວິໄຈພົບວ່າ ສັນຍານປາກົດຢ່າງຊັດເຈນໃນຊ່ອງ YY ແຕ່ບໍ່ປາກົດໃນຊ່ອງ XX. ອັດຕາສ່ວນສັນຍານຕໍ່ສັນຍານລົບກວນໃນຊ່ອງ YY ຢູ່ທີ່ປະມານ 23 ແລະເມື່ອນຳຂໍ້ມູນຈາກທັງສອງຊ່ອງມາລວມກັນ ຕົວເລກນີ້ຫຼຸດລົງເຫຼືອປະມານ 15.

ສັນຍານດັ່ງກ່າວຖືກບັນທຶກໄດ້ໃນການສັງເກດການຫຼາຍຄັ້ງ ໃນວັນທີ 10 ກັນຍາ 2021 ໃນຂະນະທີ່ກ້ອງ FAST ກຳລັງຕິດຕາມສັງເກດດາວ K2-18, GJ-9066 ແລະ Ross 128.

ທີມວິໄຈຍັງກວດພົບສັນຍານວິທະຍຸຄວາມຖີ່ແຄບອີກຫຼາຍສັນຍານຈາກລະບົບດາວເຫຼົ່ານີ້ ແຕ່ມີລັກສະນະແຕກຕ່າງກັນ ຄື ສັນຍານຈາກ K2-18 ມີຄວາມອ່ອນຫຼາຍ, ສັນຍານຈາກ GJ-9066 ແທບບໍ່ມີການປ່ຽນແປງຄວາມຖີ່ ແລະສັນຍານຈາກ Ross 128 ປາກົດຢູ່ໃນຄວາມຖີ່ທີ່ແຕກຕ່າງອອກໄປເລັກນ້ອຍ.

ລັກສະນະເຫຼົ່ານີ້ເຮັດໃຫ້ສັນຍານ NBS 260108 ກາຍເປັນຫົວຂໍ້ທີ່ຄວນສຶກສາຄົ້ນຄວ້າຕໍ່ໄປ. ແນວໃດກໍຕາມ ຂໍ້ມູນທີ່ມີຢູ່ໃນປັດຈຸບັນຍັງບໍ່ພຽງພໍທີ່ຈະສະຫຼຸບໄດ້ວ່າ ສັນຍານດັ່ງກ່າວມາຈາກເທັກໂນໂລຊີຂອງສິ່ງມີຊີວິດນອກໂລກ ຫຼືເປັນພຽງສັນຍານລົບກວນເທົ່ານັ້ນ.

ທັງນີ້ໃນການກວດພົບສັນຍານວິທະຍຸທີ່ຜິດປົກກະຕິ ແຕ່ຍັງບໍ່ມີຫຼັກຖານຢືນຢັນວ່າມາຈາກສິ່ງມີຊີວິດນອກໂລກ/ສັນຍານນີ້ອາດເປັນສັນຍານລົບກວນຈາກໂລກ ແລະ ຍັງບໍ່ມີການຢືນຢັນວ່າເປັນສັນຍານຈາກມະນຸດຕ່າງດາວ

ທີ່ມາ: earthsky