ສອງສ່ຽວ ຮ່ວມກັນສ້ໍໂກງຊັບ 651ລ້ານກວ່າກີບ ບໍ່ລອດຖືກດຳເນີນຄະດີ

AD

AD

AD

ວັນທີ 4 ພະຈິກ 2026, ພັທ ບຸນແອັດ ຊູບົວຈັນ ຮອງຫົວໜ້າກອງບັນຊາການ ປກສ ເມືອງໄຊເສດຖາ ນະຄອນ ຫຼວງວຽງຈັນ ຖະແຫຼງຕໍ່ສື່ມວນຊົນ ປກສ ກ່ຽວກັບການກັບຕົວຜູ້ກໍ່ເຫດສໍ້ໂກງຊັບພົນລະເມືອງ ປະເພດ ລົດຈັກໄຟຟ້າ ແລະ ເຄື່ອງໃຊ້ໄຟຟ້າ.

ພັທ ບຸນແອັດ ຊູບົວຈັນ ໃຫ້ຮູ້ວ່າ: ພາຍຫຼັງໄດ້ຮັບແຈ້ງ ຄວາມຈາກຜູ້ເສຍຫາຍວ່າຖືກສໍ້ໂກງຊັບພົບລະເມືອງ ຈາກນັ້ນ ເຈົ້າໜ້າທີ່ຕຳຫຼວດ ປກສ ເມືອງໄຊເສດຖາ ໄດ້ສືບ ສວນ-ສອນສວນ ຫາຜູ້ກະທໍາຜິດ ຮອດເວລາ 13:00 ໂມງ ຂອງວັນທີ 9 ກັນຍາ 2026 ເຈົ້າໜ້າທີ່ວິຊາສະເພາະ ປະ ສານສົມທົບກັບ ປກສ ກຸ່ມ 1 ບ້ານຈອມມະນີ ໄດ້ເຂົ້າກັກ ຕົວ ນາງ ໝີນ້ອຍ ອາຍຸ 42 ປີ ຢູ່ບ້ານຈອມມະນີ ເມືອງໄຊເສດຖາ ນະຄອນຫຼວງວຽງຈັນ ແລະ ນາງ ຄໍາປະສົງ ອາ ຍຸ 42 ປີ ຢູ່ບ້ານໂພນພະເນົາ ເມືອງ ໄຊເສດຖາ ນະຄອນຫຼວງວຽງຈັນ, ແລ້ວນໍາສົ່ງຕົວພວກກ່ຽວມາດໍາເນີນການສອບສວນ.

ຜ່ານການສອບສວນ ນາງ ໝີນ້ອຍ ແລະ ນາງ ຄຳປະ ສົງ ໄດ້ຮັບສາລະພາບວ່າ: ພວກກ່ຽວໄດ້ສໍ້ໂກງຊັບພົນລະ ເມືອງແທ້ ໂດຍການໃຊ້ເລ່ລ່ຽມຕົວະຍົວະຫຼອກລວງດ້ວຍການດາວລົດຈັກໄຟຟ້າ ແລະ ເຄື່ອງໃຊ້ໄຟຟ້າອີກຈຳນວນໜຶ່ງ ແລ້ວເອົາລົດ ແລະ ເຄື່ອງໃຊ້ທີ່ດາວມານັ້ນ (ຜ່ອນຈ່າຍຍັງບໍ່ໝົດ) ໄປຂາຍເອົາເງິນມາໃຊ້ຈ່າຍສ່ວນຕົວ; ເຊິ່ງຮ້ານທີ່ພວກກ່ຽວດາວລົດຈັກໄຟຟ້າທົ່ວນະຄອນຫຼວງວຽງຈັນ ລວມທັງໝົດມີ 13 ຮ້ານ ມີລົດທັງໝົດ 42 ຄັນ, ເເອ 5 ໜ່ວຍ ເເລະ ຕູ້ເຢັນ 2 ໜ່ວຍ, ລວມມູນຄ່າຄວາມເສຍ ຫາຍທັງໝົດ 651.836.000 ກີບ.

ປັດຈຸບັນ, ສາມາດເກັບກູ້ລົດຈັກ ຄືນມາໄດ້ ລົດຈັກ 17 ຄັນ, ເເອ 5 ໜ່ວຍ, ຕູ້ເຢັນ 1 ໜ່ວຍ ແລະ ໄດ້ສົ່ງຄືນເຈົ້າຂອງຊັບເດີມແລ້ວ, ພ້ອມນີ້ ເຈົ້າໜ້າທີ່ ປກສ ເມືອງໄຊເສດຖາ ຍັງສືບຕໍ່ເລັ່ງຊອກຫາລົດ ແລະ ເຄື່ອງທີ່ຜູ້ກະທຳຜິດນຳໄປຂາຍ ເພື່ອເກັບກູ້ຄືນເຈົ້າຂອງເດີມ.

ໂອກາດນີ້, ພັທ ບຸນແອັດ ຊູບົວຈັນ ຍັງໄດ້ຮຽກຮ້ອງມາຍັງ ຜູ້ປະກອບການ ຫຼື ຮ້ານຄ້າຂາຍລົດຕ່າງໆ ຈົ່ງມີສະຕິໃນການກວດສອບປະຫວັດລູກຄ້າຜູ້ທີ່ຈະມາຊື້-ຂາຍ ແລະ ດາວ ລົດໃຫ້ລະອຽດຖີ່ຖ້ວນ ເພື່ອປ້ອງກັນບໍ່ໃຫ້ເຫດການທີ່ມີລັກສະນະນີ້ເກີດຂຶ້ນອີກ; ຖ້າພົບເຫັນວ່າຕົນເອງຕົກຢູ່ໃນກໍລະນີດັ່ງກ່າວນີ້ ໃຫ້ລວບລວມຂໍ້ມູນຫຼັກຖານ ເຂົ້າມາເເຈ້ງຄວາມຕໍ່ເຈົ້າໜ້າທີ່ ປກສ ເມືອງໄຊເສດຖາ ເພື່ອຈະໄດ້ດຳເນີນການຕາມຂັ້ນຕອນຂອງກົດໝາຍຕໍ່ໄປ.

ທີ່ມາ: ຄວາມສະຫງົບ Lao Security News