ລາວພົບຜູ້ຕິດເຊື້ອ HIV ສະສົມກວ່າ 2.6 ໝື່ນຄົນ ສົ່ງຜົນກະທົບໜັກ 3 ດ້ານຕໍ່ເສດຖະກິດ-ສັງຄົມ

AD

AD

AD

ນະຄອນຫຼວງວຽງຈັນ – ສູນຕ້ານເອດສ໌ ແລະ ພະຍາດຕິດຕໍ່ທາງເພດສຳພັນ ເປີດເຜີຍສະຖິຕິການແຜ່ລະບາດຂອງ HIV/AIDS ທົ່ວ ສປປ ລາວ ນັບແຕ່ປີ 1990 ຫາ ເດືອນສິງຫາ 2026 ພົບວ່າ ມີຜູ້ຕິດເຊື້ອ HIV ສະສົມສູງເຖິງ 26,693 ຄົນ, ໃນນັ້ນມີຜູ້ປ່ວຍເປັນໂລກເອດສ໌ (AIDS) 7,975 ຄົນ ແລະ ມີຜູ້ເສຍຊີວິດສະສົມແລ້ວ 6,335 ຄົນ ຈາກຈຳນວນຜູ້ເຂົ້າຮັບການກວດເລືອດທັງໝົດ 1,835,503 ຄົນ.

ວິກິດການດັ່ງກ່າວ ໄດ້ສົ່ງຜົນກະທົບຢ່າງຮຸນແຮງໃນ 3 ມິຕິຫຼັກ ດັ່ງນີ້:

• ດ້ານເສດຖະກິດ ແລະ ແຮງງານ: ສູນເສຍກຳລັງແຮງງານຫຼັກຂອງປະເທດ ເນື່ອງຈາກຜູ້ຕິດເຊື້ອສ່ວນໃຫຍ່ຢູ່ໃນໄວສ້າງຕົວ (ໄວໜຸ່ມ). ຫາກເຂົ້າບໍ່ເຖິງການປິ່ນປົວທັນເວລາ ຈະສົ່ງຜົນໃຫ້ປະສິດທິພາບການເຮັດວຽກຫຼຸດລົງ ແລະ ສູນເສຍລາຍໄດ້.
• ດ້ານສາທາລະນະສຸກ ແລະ ງົບປະມານ: ພາລະຄ່າໃຊ້ຈ່າຍຂອງລັດເພີ່ມຂຶ້ນ ໃນການຈັດຊື້ຢາຕ້ານໄວຣັດ (ART), ຢາປ້ອງກັນ (PrEP), ຖົງຢາງອະນາໄມ ແລະ ຄ່າໃຊ້ຈ່າຍທາງຫ້ອງວິເຄາະ, ພ້ອມທັງເພີ່ມຄວາມກົດດັນໃຫ້ແກ່ບຸກຄະລາກອນທາງການແພດໃນການດູແລໄລຍະຍາວ.
• ດ້ານຄອບຄົວ ແລະ ສັງຄົມ: ຫຼາຍຄອບຄົວຕ້ອງຂາດລາຍໄດ້ ແລະ ແບກຮັບຄ່າໃຊ້ຈ່າຍໃນການເບິ່ງແຍງ. ນອກນີ້ ຍັງມີຄວາມສ່ຽງໃນການສົ່ງເຊື້ອຈາກແມ່ສູ່ລູກໃນກຸ່ມເຍົາວະຊົນຍິງທີ່ຖືພາ, ລວມທັງບັນຫາການຕີຕາ ແລະ ຈຳແນກໃນສັງຄົມ ທີ່ເຮັດໃຫ້ຜູ້ຕິດເຊື້ອບໍ່ກ້າເປີດເຜີຍຕົວຕົນ ຫຼື ເຂົ້າຮັບການປິ່ນປົວ.

ມາດຕະການຮັບມື: ພາກສ່ວນກ່ຽວຂ້ອງຕ້ອງເລ່ງຍົກລະດັບການໃຫ້ຄວາມຮູ້ດ້ານສຸຂະພາບທາງເພດໃນກຸ່ມໄວໜຸ່ມ, ຂະຫຍາຍການບໍລິການກວດເຊື້ອ ແລະ ແຈກຢາ PrEP ຟຣີໃຫ້ທົ່ວເຖິງ, ພ້ອມທັງຮຽກຮ້ອງໃຫ້ສັງຄົມຢຸດຕິການຈຳແນກ ເພື່ອດຶງຜູ້ຕິດເຊື້ອເຂົ້າສູ່ລະບົບການປິ່ນປົວໃຫ້ໄວທີ່ສຸດ ພາຍໃຕ້ຄຳຂວັນ “ກວດໄວ ຮູ້ໄວ ປິ່ນປົວໄວ!”

ທີ່ມາ: ສູນຕ້ານເອດສ໌ ແລະ ພະຍາດຕິດຕໍ່ທາງເພດ