ອີລອນ ມັສກ໌ ຍອມຮັບພ່າຍແພ້ ຫຼັງທຸ່ມ 445 ລ້ານໂດລາ ຊ່ວຍຣີພັບລິກັນ ແຕ່ເສຍໃຫ້ເດໂມແຄຣັດ

AD

AD

AD

ອີລອນ ມັສກ໌ ມະຫາເສດຖີເຈົ້າຂອງ Tesla ແລະ SpaceX ອອກມາເຄື່ອນໄຫວເປັນຄັ້ງທຳອິດ ໂດຍຍອມຮັບຄວາມພ່າຍແພ້ຜ່ານຂໍ້ຄວາມເຊີງປະຊົດປະຊັນ ຫຼັງທຸ່ມເງິນກວ່າ 445 ລ້ານໂດລາສະຫະລັດ ເພື່ອສະໜັບສະໜູນພັກຣີພັບລິກັນ ໃນການເລືອກຕັ້ງກາງສະໄໝປີ 2026 ແຕ່ບໍ່ສາມາດຊ່ວຍໃຫ້ພັກຄອງສຽງຂ້າງຫຼາຍໃນສະພາຄອງເກຣສໄດ້ ຂະນະທີ່ພັກເດໂມແຄຣັດຄວ້າໄຊຊະນະທັງໃນສະພາສູງ ແລະສະພາຜູ້ແທນລາຊະດອນ.

ມັສກ໌ໂພສຂໍ້ຄວາມຜ່ານແພລດຟອມ X ໂດຍລະບຸວ່າ “ສູນຂໍ້ມູນໃນອະວະກາດເບິ່ງໜ້າສົນໃຈຂຶ້ນມາທັນທີ” ແລະອີກຂໍ້ຄວາມໜຶ່ງວ່າ “ເບິ່ງຄືວ່າເລເຊີຈາກອະວະກາດທີ່ຂ້ອຍໃຊ້ແຊກແຊງການເລືອກຕັ້ງ ຈະບໍ່ໄດ້ຜົນໃນຄັ້ງນີ້” ເຊິ່ງເປັນການກ່າວເຖິງຄວາມພະຍາຍາມໃຊ້ເງິນສະໜັບສະໜູນຜູ້ສະໝັກ ແລະກຸ່ມການເມືອງຂອງພັກຣີພັບລິກັນ ເພື່ອຮັກສາອຳນາດໃນສະພາຄອງເກຣສ ແຕ່ສຸດທ້າຍກໍບໍ່ປະສົບຜົນສຳເລັດ

ຄວາມເຄື່ອນໄຫວດັ່ງກ່າວເກີດຂຶ້ນບໍ່ຮອດ 1 ຊົ່ວໂມງ ຫຼັງຈາກ ເຈມສ໌ ທາລາຣິໂກ ວ່າທີສະມາຊິກສະພາສູງຈາກພັກເດໂມແຄຣັດ ລັດເທັກຊັດ ຂຶ້ນເວທີໃນເມືອງອອສຕິນ ເພື່ອສະຫຼອງໄຊຊະນະ ພ້ອມກ່າວວິຈານມັສກ໌ ແລະປະທານາທິບໍດີ ໂດນັລ ທຣຳ ໂດຍລະບຸວ່າ ຕົນເອງ ແລະທີມຫາສຽງຕ້ອງປະເຊີນກັບຄູ່ແຂ່ງທີ່ມີເງິນສະໜັບສະໜູນຫຼາຍກວ່າ 300 ລ້ານໂດລາ ເຊິ່ງຖືເປັນຈຳນວນສູງທີ່ສຸດໃນປະຫວັດສາດການຫາສຽງເລືອກຕັ້ງສະມາຊິກສະພາສູງສະຫະລັດ ລວມທັງຕ້ອງຮັບມືກັບໂຄສະນາໂຈມຕີ, ການໃສ່ຮ້າຍ, ບັນຊີປອມຈາກຕ່າງປະເທດ ແລະຮູບພາບ ຫຼືວິດີໂອປອມທີ່ສ້າງຂຶ້ນດ້ວຍປັນຍາປະດິດ ຫຼື AI

ທາລາຣິໂກກ່າວວ່າ ເຖິງແມ່ນປະຊາຊົນຈະມີຄວາມຄິດເຫັນແຕກຕ່າງກັນ ແຕ່ທຸກຄົນຕ່າງກໍຕ້ອງການສິ່ງດຽວກັນ ຂະນະທີ່ມະຫາເສດຖີຜູ້ຄວບຄຸມອັລກໍຣິທຶມຂອງສື່ສັງຄົມອອນລາຍ, ເຄືອຂ່າຍໂທລະພາບ ແລະນັກການເມືອງທີ່ປາກົດຢູ່ໜ້າຈໍ ກັບພະຍາຍາມເຮັດໃຫ້ປະຊາຊົນແຕກແຍກ ແລະຫັນມາຕໍ່ສູ້ກັນເອງ. ພ້ອມຢ້ຳວ່າ ຄວາມຂັດແຍ່ງທີ່ແທ້ຈິງຂອງປະເທດ ບໍ່ແມ່ນການຕໍ່ສູ້ລະຫວ່າງຝ່າຍຊ້າຍກັບຝ່າຍຂວາ ແຕ່ແມ່ນການຕໍ່ສູ້ລະຫວ່າງຄົນຊັ້ນນຳກັບປະຊາຊົນສ່ວນໃຫຍ່ຂອງປະເທດ ໂດຍຄວາມສາມັກຄີຂອງປະຊາຊົນຖືເປັນໄພຄຸກຄາມຕໍ່ຄວາມຮັ່ງມີ ແລະອຳນາດຂອງກຸ່ມຄົນຊັ້ນນຳ

ລາວຍັງກ່າວວ່າ ຜູ້ມີອຳນາດພະຍາຍາມແບ່ງແຍກປະຊາຊົນຕາມພັກການເມືອງ, ເຊື້ອຊາດ, ເພດ, ສາສະໜາ ແລະວັດທະນະທຳ ເພື່ອບໍ່ໃຫ້ປະຊາຊົນຮັບຮູ້ວ່າຕົນເອງກຳລັງຖືກເອົາປຽບ ພ້ອມປະກາດວ່າ ໄຊຊະນະໃນຄັ້ງນີ້ເປັນຂໍ້ຄວາມທີ່ຊັດເຈນວ່າ ປະຊາຊົນຈະບໍ່ຍອມໃຫ້ໃຜມາຄອບງຳ

ເຖິງແມ່ນທາລາຣິໂກຈະບໍ່ໄດ້ເອີ່ຍຊື່ທຣຳໂດຍກົງ ແຕ່ລາວໄດ້ວິຈານວັດທະນະທຳທາງການເມືອງໃນຊ່ວງ 10 ປີຜ່ານມາ ທີ່ເຕັມໄປດ້ວຍການໃຊ້ຄວາມຂັດແຍ່ງເປັນເຄື່ອງມື, ການຍຸແຍ່ ແລະເຍາະເຍີ້ຍຝ່າຍກົງຂ້າມ ຕະຫຼອດຈົນການເມືອງທີ່ປຽບເໝືອນມວຍປ້ຳອາຊີບ ພ້ອມລະບຸວ່າ ປະຊາຊົນຈາກທຸກແນວຄິດທາງການເມືອງກຳລັງຕ້ອງການການເມືອງຮູບແບບໃໝ່ ທີ່ຕັ້ງຢູ່ເທິງຄວາມຮັກ ແລະຄວາມເຂົ້າໃຈ

ການແຂ່ງຂັນຊິງຕຳແໜ່ງສະມາຊິກສະພາສູງໃນລັດເທັກຊັດຄັ້ງນີ້ ຖືເປັນການເລືອກຕັ້ງທີ່ໃຊ້ຈ່າຍສູງທີ່ສຸດໃນປະຫວັດສາດສະຫະລັດ ໂດຍມີການໃຊ້ຈ່າຍສຳລັບໂຄສະນາລວມກັນຫຼາຍກວ່າ 500 ລ້ານໂດລາ ຕາມຂໍ້ມູນຕິດຕາມການໃຊ້ຈ່າຍດ້ານໂຄສະນາ. ການແຂ່ງຂັນເປັນການຊິງໄຊລະຫວ່າງ ເຄນ ແພັກສຕັນ ໄອຍະການສູງສຸດລັດເທັກຊັດຈາກພັກຣີພັບລິກັນ ກັບ ເຈມສ໌ ທາລາຣິໂກ ຜູ້ສະໝັກຈາກພັກເດໂມແຄຣັດ

ກຸ່ມການເມືອງພາຍນອກທີ່ສະໜັບສະໜູນແພັກສຕັນ ທຸ່ມເງິນປະມານ 239 ລ້ານໂດລາ ຫຼາຍກວ່າເງິນປະມານ 45 ລ້ານໂດລາທີ່ກຸ່ມໃຫຍ່ທີ່ສຸດຊຶ່ງສະໜັບສະໜູນພັກເດໂມແຄຣັດໃຊ້ຈ່າຍ ຫຼາຍກວ່າ 5 ເທົ່າ. ໂດຍກຸ່ມ Texas PAC ເຊິ່ງເປັນ Super PAC ຂອງພັກຣີພັບລິກັນ ໃຊ້ເງິນໄປເກືອບ 149 ລ້ານໂດລາ. ກຸ່ມນີ້ຖືກຈັດຕັ້ງຂຶ້ນໂດຍ Senate Leadership Fund ເຊິ່ງເປັນ Super PAC ຫຼັກທີ່ສະໜັບສະໜູນຜູ້ສະໝັກສະມາຊິກສະພາສູງຂອງພັກຣີພັບລິກັນ

ເອກະສານດ້ານການເງິນການເລືອກຕັ້ງຂອງລັດຖະບານກາງລະບຸວ່າ ມັສກ໌ຜູ້ພັກອາໄສຢູ່ລັດເທັກຊັດ ແລະໄດ້ຍ້າຍສຳນັກງານໃຫຍ່ຂອງທຸລະກິດຫຼາຍແຫ່ງ ລວມທັງ SpaceX, Tesla ແລະ X ມາຍັງລັດນີ້ ໄດ້ບໍລິຈາກເງິນໃຫ້ Senate Leadership Fund ຈຳນວນ 158 ລ້ານໂດລາ ກ່ອນທີ່ກຸ່ມດັ່ງກ່າວຈະໂອນເງິນຈຳນວນໃກ້ຄຽງກັນໄປສະໜັບສະໜູນ Texas PAC

ເງິນສະໜັບສະໜູນຈຳນວນມະຫາສານຈາກຝ່າຍຣີພັບລິກັນໄຫຼເຂົ້າສູ່ການແຂ່ງຂັນໃນຊ່ວງທ້າຍຂອງການຫາສຽງ ໂດຍ Super PAC MAGA Inc. ຂອງທຣຳ ເລີ່ມໃຊ້ເງິນກ້ອນໃຫຍ່ຕັ້ງແຕ່ຕົ້ນເດືອນກັນຍາ. ແດນ ເອເບີຮາດ ນັກທຸລະກິດນ້ຳມັນ ແລະຜູ້ບໍລິຈາກເງິນໃຫ້ພັກຣີພັບລິກັນ ກ່າວວ່າ ເງິນສະໜັບສະໜູນຈາກກຸ່ມຜູ້ມີອຳນາດເຂົ້າມາໃນຈັງຫວະທີ່ເໝາະສົມພໍດີສຳລັບແພັກສຕັນ

ແນວໃດກໍຕາມ ທາລາຣິໂກສາມາດຊົດເຊີຍຄວາມເສຍປຽບດ້ານເງິນສະໜັບສະໜູນຈາກກຸ່ມພາຍນອກໄດ້ ດ້ວຍການລະດົມທຶນຈາກປະຊາຊົນທົ່ວໄປ. ທີມຫາສຽງຂອງລາວລະບຸວ່າ ໃນລະຫວ່າງເດືອນກໍລະກົດຫາກັນຍາ ສາມາດລະດົມທຶນໄດ້ 64 ລ້ານໂດລາ ຫຼາຍກວ່າຝ່າຍແພັກສຕັນກວ່າ 3 ເທົ່າ ແລະເງິນບໍລິຈາກ 97% ມາຈາກຜູ້ບໍລິຈາກທີ່ໃຫ້ເງິນຕ່ຳກວ່າ 100 ໂດລາ

ຂໍ້ມູນຈາກ AdImpact ລະບຸວ່າ ທາລາຣິໂກໃຊ້ເງິນຊື້ໂຄສະນາໄປແລ້ວ 61 ລ້ານໂດລາ ຈົນເຖິງເດືອນກັນຍາ ຂະນະທີ່ Lone Star Rising PAC ເຊິ່ງເປັນກຸ່ມສະໜັບສະໜູນພັກເດໂມແຄຣັດທີ່ໃຊ້ເງິນຫຼາຍທີ່ສຸດ ໃຊ້ຈ່າຍໄປ 19.3 ລ້ານໂດລາ

ກ່ອນການເລືອກຕັ້ງ ທາລາຣິໂກມີຄະແນນນິຍົມນຳແພັກສຕັນເລັກນ້ອຍຢ່າງຕໍ່ເນື່ອງ ແຕ່ຄະແນນຍັງຢູ່ໃນຂອບເຂດຄວາມຄາດເຄື່ອນທາງສະຖິຕິ ເຮັດໃຫ້ການແຂ່ງຂັນຄັ້ງນີ້ເປັນການເລືອກຕັ້ງລະດັບລັດທີ່ສູສີທີ່ສຸດຂອງເທັກຊັດ ນັບຕັ້ງແຕ່ປີ 1994 ຕາມຄຳກ່າວຂອງຜູ້ຊ່ຽວຊານດ້ານການເມືອງຂອງລັດ

ເງິນຈຳນວນມະຫາສານຖືກນຳໄປໃຊ້ກັບໂຄສະນາໂຈມຕີ ໂດຍພະຍາຍາມນຳສະເໜີວ່າ ແນວຄິດຂອງທາລາຣິໂກບໍ່ສອດຄ່ອງກັບຄ່ານິຍົມຂອງຜູ້ມີສິດອອກສຽງໃນລັດເທັກຊັດ ໂດຍສະເພາະປະເດັນຄວາມຂັດແຍ່ງທາງວັດທະນະທຳ ແລະສິດຂອງຄົນຂ້າມເພດ. ແນວໃດກໍຕາມ ອົງກອນກວດສອບຂໍ້ເທັດຈິງອິດສະຫຼະລະບຸວ່າ ໂຄສະນາຫຼາຍຊິ້ນບິດເບືອນຈຸດຢືນຂອງທາລາຣິໂກ ຂະນະທີ່ຜູ້ຊ່ຽວຊານມອງວ່າ ເປົ້າໝາຍຂອງໂຄສະນາເຫຼົ່ານີ້ແມ່ນການກະຕຸ້ນຄວາມຮູ້ສຶກຕໍ່ຕ້ານໃນກຸ່ມຜູ້ມີສິດອອກສຽງຝ່າຍຣີພັບລິກັນ ເພື່ອເພີ່ມຈຳນວນຜູ້ອອກມາໃຊ້ສິດ

ໂຄສະນາຂອງ Texas PAC ລະບຸວ່າ ທາລາຣິໂກສະໜັບສະໜູນຄົນຂ້າມເພດຫຼາຍກວ່າປະຊາຊົນທົ່ວໄປ ແລະກ່າວຫາວ່າລາວສະໜັບສະໜູນການຜ່າຕັດປ່ຽນເພດໃຫ້ແກ່ຜູ້ເຍົາໄວ ໂດຍໃຊ້ເງິນພາສີຂອງປະຊາຊົນ. ແຕ່ເວັບໄຊກວດສອບຂໍ້ເທັດຈິງ PolitiFact ຕັດສິນວ່າຂໍ້ກ່າວຫາດັ່ງກ່າວເປັນເທັດ ໂດຍຊີ້ວ່າ ເຖິງແມ່ນທາລາຣິໂກຈະຄັດຄ້ານກົດໝາຍຫ້າມການດູແລຮັກສາທີ່ກ່ຽວຂ້ອງກັບການປ່ຽນຜ່ານທາງເພດສຳລັບຜູ້ເຍົາໄວໃນປີ 2023 ແຕ່ລາວເຄີຍລະບຸຢ່າງຊັດເຈນວ່າຕົນເອງຄັດຄ້ານການຜ່າຕັດປ່ຽນເພດໃນເດັກ

ໃນລະດັບປະເທດ ກຸ່ມການເມືອງຂອງພັກຣີພັບລິກັນໃຊ້ເງິນຫຼາຍກວ່າ 100 ລ້ານໂດລາ ນັບຕັ້ງແຕ່ວັນທີ 1 ສິງຫາ ເພື່ອເຜີຍແຜ່ໂຄສະນາຫຼາຍກວ່າ 200 ຊິ້ນ ທີ່ກ່າວຫາວ່າພັກເດໂມແຄຣັດສະໜັບສະໜູນການຜ່າຕັດປ່ຽນເພດໃຫ້ແກ່ເດັກ ຕາມການວິເຄາະຂໍ້ມູນຂອງ AdImpact ໂດຍ FactCheck.org

ໂຄສະນາຊິ້ນໜຶ່ງຂອງທີມແພັກສຕັນໃຊ້ຮູບພາບທາລາຣິໂກທີ່ສ້າງດ້ວຍ AI ໃຫ້ລາວກຳລັງອ່ານຂໍ້ຄວາມຈາກຄຳພີໄບເບິນສະບັບສົມມຸດທີ່ມີຊື່ວ່າ “King James (Talarico) Bible” ໂດຍນຳເອົາຄຳເວົ້າບາງສ່ວນຂອງລາວໃນອະດີດມາລວມກັນ ລວມທັງຂໍ້ຄວາມທີ່ກ່າວເຖິງພະເຈົ້າວ່າບໍ່ມີເພດທີ່ກຳນົດຕາຍຕົວ. ແນວໃດກໍຕາມ FactCheck.org ລະບຸວ່າ ໂຄສະນາດັ່ງກ່າວຂາດບໍລິບົດສຳຄັນທີ່ຈຳເປັນຕໍ່ການເຂົ້າໃຈຄຳເວົ້າຂອງລາວ

ທາລາຣິໂກຕອບໂຕ້ດ້ວຍການເອີ້ນແພັກສຕັນວ່າເປັນນັກການເມືອງທີ່ສໍ້ໂກງທີ່ສຸດໃນລັດເທັກຊັດ. ໂດຍແພັກສຕັນເຄີຍຖືກສະພາຜູ້ແທນລາຊະດອນຂອງລັດ ເຊິ່ງໃນເວລານັ້ນພັກຣີພັບລິກັນຄອງສຽງຂ້າງຫຼາຍ ມີມະຕິຖອນຖອນອອກຈາກຕຳແໜ່ງໃນປີ 2023 ຈາກຂໍ້ກ່າວຫາວ່າໃຊ້ອຳນາດໃນຕຳແໜ່ງໂດຍມິຊອບ ແຕ່ຕໍ່ມາວຸດທິສະພາຂອງລັດໄດ້ມີມະຕິຍົກຟ້ອງ. ສ່ວນຂໍ້ຫາສໍ້ໂກງຫຼັກຊັບອີກຄະດີໜຶ່ງ ເຊິ່ງມີມາຕັ້ງແຕ່ປີ 2015 ຖືກຍົກເລີກໃນປີ 2024 ພາຍໃຕ້ຂໍ້ຕົກລົງທີ່ກຳນົດໃຫ້ລາວເຮັດວຽກບໍລິການສັງຄົມ, ເຂົ້າຮັບການອົບຮົມດ້ານຈັນຍາບັນ ແລະຊົດໃຊ້ຄ່າເສຍຫາຍ. ທັງນີ້ ແພັກສຕັນປະຕິເສດການກະທຳຜິດທຸກຂໍ້ກ່າວຫາ

ຂໍ້ມູນການບໍລິຈາກທີ່ເປີດເຜີຍຕໍ່ສາທາລະນະລະບຸວ່າ ມັສກ໌ໄດ້ບໍລິຈາກເງິນສະໜັບສະໜູນການເລືອກຕັ້ງໄປແລ້ວ 445.6 ລ້ານໂດລາ ຈົນເຖິງວັນທີ 14 ຕຸລາ ເຊິ່ງເປັນວັນທີລ່າສຸດທີ່ມີຂໍ້ມູນການບໍລິຈາກ. ຕົວເລກດັ່ງກ່າວລວມເຖິງເງິນຈາກອົງກອນບໍ່ແສວງຫາຜົນກຳໄລ United States of America Inc. ທີ່ຢູ່ພາຍໃຕ້ການຄວບຄຸມຂອງລາວອີກດ້ວຍ

ແນວໃດກໍຕາມ ຍອດການໃຊ້ຈ່າຍຕົວຈິງມີແນວໂນ້ມສູງກວ່ານີ້ ເນື່ອງຈາກຕົວເລກດັ່ງກ່າວຍັງບໍ່ລວມເງິນບໍລິຈາກອີກຫຼາຍສິບລ້ານໂດລາ ທີ່ມອບໃຫ້ຫຼັງວັນທີ 14 ຕຸລາ ຫຼືບໍລິຈາກຜ່ານອົງກອນທີ່ບໍ່ໄດ້ຍື່ນລາຍງານຕໍ່ຄະນະກຳມະການການເລືອກຕັ້ງກາງຂອງສະຫະລັດ. ຂະນະທີ່ການປະເມີນຈາກແຫຼ່ງຂໍ້ມູນອື່ນລະບຸວ່າ ມັສກ໌ໃຊ້ເງິນໄປແລ້ວ 474 ລ້ານໂດລາ ແລະຖ້າຫາກຕົວເລກນີ້ຖືກຕ້ອງ ຈະຖືເປັນຍອດເງິນທີ່ຜູ້ບໍລິຈາກລາຍດຽວໃຊ້ສະໜັບສະໜູນການເລືອກຕັ້ງຫຼາຍທີ່ສຸດໃນປະຫວັດສາດການເລືອກຕັ້ງສະຫະລັດໜຶ່ງຮອບ

ກ່ອນໜ້ານີ້ ມັສກ໌ເຄີຍໃຫ້ຄຳໝັ້ນວ່າຈະຫຼຸດການໃຊ້ຈ່າຍດ້ານການເມືອງລົງ ໂດຍກ່າວເມື່ອເດືອນພຶດສະພາ 2025 ວ່າ ລາວຈະໃຊ້ເງິນສະໜັບສະໜູນກິດຈະກຳທາງການເມືອງໃຫ້ໜ້ອຍລົງໃນອະນາຄົດ ຫຼັງຈາກຕ້ອງສູນເສຍເງິນຈຳນວນຫຼາຍຈາກການເລືອກຕັ້ງຜູ້ພິພາກສາສານສູງສຸດຂອງລັດວິສຄອນຊິນ. ແນວໃດກໍຕາມ ໃນເວລານັ້ນລາວຍັງກ່າວວ່າ ຖ້າເຫັນວ່າມີເຫດຜົນທີ່ເໝາະສົມ ກໍພ້ອມກັບມາໃຊ້ເງິນສະໜັບສະໜູນການເມືອງອີກຄັ້ງ

ຈົນມາຮອດເດືອນຕຸລາ 2026 ຍອດເງິນທີ່ມັສກ໌ໃຊ້ສະໜັບສະໜູນການເລືອກຕັ້ງ ກໍສູງກວ່າຈຳນວນເງິນທີ່ລາວເຄີຍໃຊ້ໃນການເລືອກຕັ້ງປີ 2024 ແລ້ວ

ທີ່ມາ: The Independent