ປິດຕຳນານ (CR7)! ຄຣິສຕຽນໂນ ໂຣນັລໂດ້ ປະກາດອຳລາທີມຊາດໂປຕຸເກດ

AD

AD

AD

ໂດຍກອງໜ້າໄວ 41 ປີ ໄດ້ເປີດເຜີຍການຕັດສິນໃຈຜ່ານຄລິບວິດີໂອ ແລະ ຖະແຫຼງການຜ່ານສື່ສັງຄົມສ່ວນຕົວ ຖືເປັນການປິດສາກເສັ້ນທາງການຄ້າແຂ່ງໃນນາມທີມຊາດທີ່ເຕັມໄປດ້ວຍຄວາມສຳເລັດ.

ໂດຍມີການລາຍງານໃນວັນທີ 5 ພະຈິກ 2026.

ໂຣນັລໂດ້ ກ່າວໃນຖະແຫຼງການວ່າ:

“ປະເທດໂປຕຸເກດຈະຢູ່ໃນຕົວຂ້ອຍສະເໝີ… ມັນເຖິງເວລາແລ້ວທີ່ຂ້ອຍຕ້ອງປົດເສື້ອໝາຍເລກ 7 ຂອງທີມຊາດ. ຂ້ອຍບໍ່ເຄີຍຄິດວ່າເສື້ອໝາຍເລກນີ້ເປັນຂອງຂ້ອຍພຽງຜູ້ດຽວ ແຕ່ຕະຫຼອດ 23 ປີທີ່ຜ່ານມາ ຂ້ອຍໄດ້ຮັບກຽດ ແລະ ຄວາມຮັບຜິດຊອບໃນການສວມໃສ່ມັນ”

ການອຳລາທີມຊາດໃນຄັ້ງນີ້ ເຮັດໃຫ້ ໂຣນັລໂດ້ ຍຸດຕິເສັ້ນທາງໃນຖານະເຈົ້າຂອງສະຖິຕິສູງສຸດຕະຫຼອດການ ທັງຈຳນວນນັດລົງສະໜາມ ແລະ ຈຳນວນປະຕູໃນບານເຕະທີມຊາດຊາຍ ໂດຍມີຜົນງານດັ່ງນີ້:

• ລົງສະໜາມ 234 ນັດ
• ຍິງໄດ້ 146 ປະຕູ
• ສ້າງ 46 ແອສຊິສ
• ຄວ້າແຊັມລາຍການໃຫຍ່ 3 ລາຍການ ປະກອບມີ ຢູໂຣ 2016 ແລະ ຢູຟ່າ ເນຊັນລີກ 2019 ແລະ 2025

ການປະກາດຄັ້ງນີ້ເກີດຂຶ້ນຫຼັງຈາກຜ່ານຊ່ວງເວລາທີ່ມີຄວາມວຸ່ນວາຍຫຼາຍຢ່າງໃນການຮັບໃຊ້ທີມຊາດ ລວມເຖິງບັນຫາໃນຊ່ວງການແຂ່ງຂັນບານໂລກ 2026 ທີ່ ໂຣນັລໂດ້ ເຄີຍອອກຈາກແຄ້ມເກັບຕົວທີມຊາດຊົ່ວຄາວ ເນື່ອງຈາກບໍ່ພໍໃຈກັບໂອກາດລົງສະໜາມ ແລະ ມີຄວາມເຫັນບໍ່ກົງກັນກັບ ຈໍເກ ເຊຊຸສ ຫົວໜ້າຄູຝຶກທີມຊາດ.

ເຖິງແມ່ນໃນໄລຍະທຳອິດເຈົ້າຕົວຈະຍັງມີແຜນຮັບໃຊ້ທີມຊາດຕໍ່ໄປ ແຕ່ຫຼັງຈາກໃຊ້ເວລາທົບທວນຢ່າງຮອບຄອບ ໃນທີ່ສຸດກໍຕັດສິນໃຈຍຸດຕິບົດບາດການລົງຫຼິ້ນໃຫ້ທີມຊາດໂປຕຸເກດ.

ຄຳຖະແຫຼງອຳລາຂອງ ໂຣນັລໂດ້

ຜ່ານຄລິບວິດີໂອທີ່ປະກາດລົງໃນ Instagram ເພື່ອແຈ້ງການສິ້ນສຸດເສັ້ນທາງການຮັບໃຊ້ທີມຊາດ ໂຣນັລໂດ້ ໄດ້ກ່າວວ່າ:

“ເຖິງປະຊາຊົນຊາວໂປຕຸເກດ ມື້ນີ້ໄດ້ມາຮອດແລ້ວ ມື້ທີ່ຂ້ອຍຕ້ອງສົ່ງຄືນເສື້ອໝາຍເລກ 7 ຂອງທີມຊາດພວກເຮົາ.

ຂ້ອຍບໍ່ເຄີຍຮູ້ສຶກວ່າເສື້ອໝາຍເລກນີ້ເປັນຂອງຂ້ອຍພຽງຜູ້ດຽວ ແຕ່ຕະຫຼອດ 23 ປີທີ່ຜ່ານມາ ຂ້ອຍໄດ້ຮັບກຽດ ແລະ ຄວາມຮັບຜິດຊອບໃນການສວມໃສ່ມັນ ປົກປ້ອງມັນ ແລະ ນຳມັນຕິດຕົວໄປລົງສະໜາມກິລາທົ່ວໂລກ.

ມື້ນີ້ເຖິງເວລາແລ້ວທີ່ຈະສົ່ງຕໍ່ມັນໃຫ້ກັບຄົນຮຸ່ນຕໍ່ໄປ. ມັນບໍ່ແມ່ນການຕັດສິນໃຈທີ່ງ່າຍດາຍ ເພາະບາງການຕັດສິນໃຈບໍ່ໄດ້ໃຊ້ພຽງແຕ່ເຫດຜົນໃນການຕັດສິນໃຈເທົ່ານັ້ນ ແຕ່ຍັງຕ້ອງໃຊ້ຫົວໃຈອີກດ້ວຍ.

ເສັ້ນທາງທີ່ເລີ່ມຕົ້ນໃນເດືອນສິງຫາ ປີ 2003 ແລະ ໄດ້ປ່ຽນຊີວິດຂ້ອຍໄປຕະຫຼອດການ ບັດນີ້ໄດ້ເດີນທາງມາຮອດຈຸດສິ້ນສຸດແລ້ວ.”

ຢ່າງໃດກໍຕາມ ໂຣນັລໂດ້ ຍັງຄົງເດີນໜ້າຄ້າແຂ່ງໃນລະດັບສະໂມສອນຕໍ່ໄປ ໂດຍຮັບໜ້າທີ່ເປັນກັບຕັນທີມ ແລະ ເປັນກຳລັງສຳຄັນໃນແນວຮຸກຂອງ ອັນນັສເຊີ ຂະນະທີ່ກຳລັງໃກ້ຈະຮອດວັນເກີດຄົບຮອບ 42 ປີ.

ທີ່ມາຂ່າວ: fifa / Reuters