ນັກເຕະສະເປນເສຍຊີວິດໃນອາຍຸ 30 ປີ ຫຼັງຖືກຫົວເຂົ່າຂອງຜູ້ຮັກສາປະຕູກະທົບໃສ່ໜ້າເອິກ ຈົນເກີດພາວະຫົວໃຈຢຸດເຕັ້ນກາງສະໜາມ

AD

AD

AD

ນັກເຕະສະເປນເສຍຊີວິດໃນອາຍຸ 30 ປີ ຫຼັງຖືກຫົວເຂົ່າຂອງຜູ້ຮັກສາປະຕູກະທົບໃສ່ໜ້າເອິກ ຈົນເກີດພາວະຫົວໃຈຢຸດເຕັ້ນກາງສະໜາມ

ຕຳຫຼວດສະເປນໄດ້ເປີດການສືບສວນກໍລະນີທີ່ອາດເຂົ້າຂ່າຍການເຮັດໃຫ້ຜູ້ອື່ນເສຍຊີວິດໂດຍບໍ່ເຈດຕະນາ ຫຼັງຈາກນັກເຕະບານຄົນໜຶ່ງເສຍຊີວິດ ຈາກເຫດປະທະກັນກັບຜູ້ຮັກສາປະຕູຂອງທີມຄູ່ແຂ່ງ ໃນການແຂ່ງຂັນບານເຕະລີກລະດັບສອງຂອງສະເປນ.

ສະໂມສອນເຕເນຣິເຟໄດ້ແຈ້ງໃນວັນອັງຄານວ່າ ເຮຊຸສ ເດ ມິເກວ ກອງໜ້າຂອງທີມ ໄດ້ເສຍຊີວິດຫຼັງຈາກເກີດພາວະຫົວໃຈຢຸດເຕັ້ນ ພາຍຫຼັງເຫດປະທະກັນກາງສະໜາມ. ມີອາຍຸ 30 ປີ.

ໃນວັນຈັນ ເດ ມິເກວ ກຳລັງຍາດບານຢູ່ໃກ້ເສັ້ນກາງສະໜາມ ກ່ອນຈະຖືກຫົວເຂົ່າຂອງຜູ້ຮັກສາປະຕູທີມອັນໂດຣາ ກະທົບໃສ່ໜ້າເອິກ. ຜູ້ຮັກສາປະຕູຄົນດັ່ງກ່າວແລ່ນອອກມາຈາກອີກທິດທາງໜຶ່ງ ໂດຍຄາດວ່າພະຍາຍາມອອກມາສະກັດບານ.

ຜູ້ຮັກສາປະຕູຄົນດັ່ງກ່າວຖືກກຳມະການຊູໃບແດງໄລ່ອອກຈາກສະໜາມໂດຍກົງ ເນື່ອງຈາກເຫດປະທະກັນທີ່ເກີດຂຶ້ນໃນຊ່ວງທົດເວລາບາດເຈັບ.

ຕຳຫຼວດແຫ່ງຊາດສະເປນແຈ້ງໃນວັນອັງຄານວ່າ ໄດ້ເປີດການສືບສວນກໍລະນີນີ້ແລ້ວ. ຕາມກົດໝາຍຂອງສະເປນ ການເສຍຊີວິດທີ່ບໍ່ໄດ້ເກີດຈາກສາເຫດທາງທຳມະຊາດ ລວມທັງການເສຍຊີວິດຈາກອຸບັດຕິເຫດ ຈະຕ້ອງຜ່ານການສືບສວນທາງຕຸລາການ.

ຫົວໜ້າໄອຍະການເມືອງ ຊານຕາ ກຣູຊ ເດ ເຕເນຣິເຟ ໄດ້ໃຫ້ສຳນັກຂ່າວຂອງສະເປນວ່າ ໂອກາດທີ່ຈະມີການດຳເນີນຄະດີອາຍາມີໜ້ອຍ ເນື່ອງຈາກເຫດປະທະກັນເກີດຂຶ້ນໃນລະຫວ່າງການແຂ່ງຂັນ.

ເດ ມິເກວ ຖືກນຳສົ່ງໂຮງໝໍ ແລະການແຂ່ງຂັນທີ່ມີຜົນສະກໍ 2-2 ກໍຖືກຍຸດຕິລົງຫຼັງເກີດເຫດການ.

ສະໂມສອນເຕເນຣິເຟ ທີ່ຕັ້ງຢູ່ໃນໝູ່ເກາະການາຣີຂອງສະເປນ ລະບຸວ່າ ສະໂມສອນຮູ້ສຶກໂສກເສົ້າ ແລະໃຈສະຫຼາຍຢ່າງເລິກເຊິ່ງຕໍ່ການຈາກໄປຂອງນັກເຕະຄົນນີ້.

ໄຣໂກ ກາຣ໌ເຊຍ ຜູ້ຖືຫຸ້ນລາຍໃຫຍ່ຂອງສະໂມສອນເຕເນຣິເຟ ກ່າວຕໍ່ນັກຂ່າວວ່າ ສົບຂອງ ເດ ມິເກວ ຈະຖືກນຳສົ່ງໄປຍັງເມືອງນາວາເອີໂມຊາ ໃນແຂວງໂຕເລໂດ ຕາມຄວາມປະສົງຂອງຄອບຄົວ.

ລາວກ່າວວ່າ ເພື່ອນຮ່ວມທີມ ແລະຜູ້ບໍລິຫານຂອງສະໂມສອນ ຈະເດີນທາງໄປຮ່ວມສົ່ງລາວເປັນຄັ້ງສຸດທ້າຍ.

ທ່ານ ກາຣ໌ເຊຍ ຍັງກ່າວວ່າ ໃນວັນເສົານີ້ ແຟນບານຈະມາລວມຕົວກັນທີ່ສະໜາມຂອງທີມ ເພື່ອຈັດພິທີລະນຶກເຖິງນັກເຕະຜູ້ລ່ວງລັບຄົນນີ້.

ທີມບານເຕະໃນລາຍການ UEFA Champions League ຮ່ວມກັນສະແດງຄວາມອາໄລ ແລະລະນຶກເຖິງ De Miguel ຫຼັງຈາກລາວເສຍຊີວິດ (ພາບ: AP)

ບັນດາສະໂມສອນບານເຕະທີ່ລົງແຂ່ງຂັນໃນລາຍການຢູຟາ ແຊມປຽນລີກ ເມື່ອວັນອັງຄານ ໄດ້ຮ່ວມກັນສະແດງຄວາມອາໄລຕໍ່ ເຮຊຸສ ເດ ມິເກວ ກອງໜ້າຂອງສະໂມສອນເຕເນຣິເຟ ຫຼັງຈາກລາວເສຍຊີວິດຈາກເຫດປະທະກັນກາງສະໜາມ.

ສາມສະໂມສອນຈາກສະເປນທີ່ເປັນເຈົ້າພາບຈັດການແຂ່ງຂັນໃນຄືນນັ້ນ ປະກອບມີ ບາເຊໂລນາ, ແອັດເລຕິໂກ ມາດຣິດ ແລະ ບີຢາເຣອັນ ໄດ້ຕັດສິນໃຈງົດເປີດເພງປະຈຳລາຍການຢູຟາ ແຊມປຽນລີກ ຕາມທຳນຽມກ່ອນເລີ່ມການແຂ່ງຂັນ ເພື່ອສະແດງຄວາມອາໄລຕໍ່ ເດ ມິເກວ ອາຍຸ 30 ປີ ຜູ້ທີ່ເກີດພາວະຫົວໃຈຢຸດເຕັ້ນ ຫຼັງຈາກຖືກຫົວເຂົ່າຂອງ ເຮຊຸສ ໂອໂວໂນ ຜູ້ຮັກສາປະຕູສະໂມສອນອັນໂດຣາ ກະແທກໃສ່ໜ້າເອິກ ໃນການແຂ່ງຂັນລີກລະດັບສອງຂອງສະເປນ ເມື່ອວັນຈັນ.

ນອກຈາກສາມສະໜາມໃນສະເປນແລ້ວ ສະໜາມອື່ນໆທົ່ວເອີຣົບ ລວມທັງສະໜາມໂອລດ໌ ແທຣຟຟອດ ທີ່ສະໂມສອນແມນເຊສເຕີ ຢູໄນເຕັດ ລົງແຂ່ງຂັນກັບ ໂຣມາ ກໍໄດ້ຈັດພິທີຢືນສະຫງົບນິ່ງເປັນເວລາ 1 ນາທີ ເພື່ອໄວ້ອາໄລແກ່ນັກເຕະຜູ້ລ່ວງລັບ. ພ້ອມກັນນັ້ນ ພາບຂອງລາວຍັງຖືກສາຍຂຶ້ນຈໍໃຫຍ່ພາຍໃນສະໜາມອີກດ້ວຍ.

ຂະນະດຽວກັນ ມິເກວ ອາເຕຕາ ຜູ້ຈັດການທີມອາເຊນອນ ແລະ ມິເກວ ເມຣິໂນ ກອງກາງຂອງທີມ ເຊິ່ງທັງສອງເປັນຄົນປະເທດສະເປນ ກໍໄດ້ເລີ່ມຕົ້ນການແຖລງຂ່າວກ່ອນເກມພົບກັບ ສະລາເວຍ ປຣາກ ໃນວັນພຸດ ດ້ວຍການກ່າວສະແດງຄວາມອາໄລຕໍ່ ເດ ມິເກວ.

ທີ່ມາ: AP (AP)