ສປ ຈີນ ກຽມຈັດກອງປະຊຸມສຸດຍອດຫົວໜ້າຜູ້ບໍລິຫານ ເອເປັກ

ວິທະຍຸ ໂທລະພາບສູນກາງຈີນ, ກອງປະຊຸມສຸດຍອດຫົວ​ໜ້າ​ ຜູ້​ບໍ​ລິ​ຫານ​ ອົງ​ການ​ຮ່ວມ​ມື​ ເສດ​ຖະ​ກິດ​ ອາ​ຊີ-ປາ​ຊິ​ຟິກຫລື APEC ປີ 2026 ຈະຈັດຂຶ້ນຢູ່ນະຄອນ ເຊີ່ນເ​ຈີ້ນຂອງ ສປ ​ຈີນ ໃນ ລະຫວ່າງ ວັນທີ 17-18 ພະຈິກນີ້. ປັດຈຸບັນ, ເຫລືອ​ເວ​ລາ ​ອີກ​ບໍ່ຮອດໜຶ່ງອາທິດ, ການກະກຽມ ວຽກງານຕ່າງໆ ໄດ້ເຂົ້າສູ່ໄລຍະນັບຖອຍຫລັງແລ້ວ. ຕາມ​ຂໍ້​ມູນ ຈາກສະພາສົ່ງເສີມການຄ້າສາກົນຈີນ​ເຊິ່ງ​ເປັນເຈົ້າ​ພາບ ຈັດກອງປະຊຸມ​ຄັ້ງນີ້ ໃຫ້​ຮູ້​ວ່າ:ບຸກ​ຄົນ​ໃນ​ວົງການຕ່າງໆທີ່​ຈະເຂົ້າຮ່ວມກອງປະຊຸມຄັ້ງນີ້ ຄາດວ່າ ຈະ​ມີຫລາຍກວ່າ 2.000 ຄົນ. ​ໂດຍ​ຈະມີ​ຜູ້​ຕາງ​ໜ້າ ວິສາຫະກິດ​ຈາກ 21 ​​ເຂດເສດຖະກິດ ສະ​ມາ​ຊິກຂອງ APEC ເຂົ້າຮ່ວມ. ນອກຈາກນີ້, ວິສາຫະກິດ ຈາກຫລາຍປະເທດ ນອກພາກພື້ນ ເຊັ່ນ: ອັງກິດ, ຝຣັ່ງ ແລະ ເຢຍລະມັນ​ເປັນ​ຕົ້ນ ໄດ້ສະ​ເໜີ​ຕົວເຂົ້າຮ່ວມກອງປະຊຸມສຸດຍອດ​ຄັ້ງ​ນີ້ ຢ່າງ​ຫ້າວ​ຫັນ. ປັດຈຸບັນ, ​ບໍ​ລິ​ສັດ​ທີ່​ຈັດ​ຢູ່​ໃນ 500 ​ບໍ​ລິ​ສັດ ທີ່ເຂັ້ມ​ແຂງ​ຂອງ​ໂລກ ເຊັ່ນ: Google, Boeing, UBS (ທະນາຄານສະວີ​ສ), ກຸ່ມ CP ແລະ ອື່ນໆ ລວມ​ທັງວິສາຫະກິດທີ່ມີຊື່ສຽງ ຫລາຍແຫ່ງລ້ວນແຕ່ໄດ້ຍື່ນ ໃບສະ​ໝັກເຂົ້າຮ່ວມ ກອງປະຊຸມແລ້ວ./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ