ກົມປ່າໄມ້ ຮ່ວມກັບ AFoCO ກຽມຈັດການຝຶກອົບຮົມຄູຝຶກດັບໄຟປ່າໃນເຂດຮ້ອນ ຄັ້ງທີ 5 ທີ່ເມືອງວັງວຽງ

ກົມປ່າໄມ້ ກະຊວງກະສິກຳ ແລະ ສິ່ງແວດລ້ອມ ຮ່ວມກັບອົງການຮ່ວມມືປ່າໄມ້ແຫ່ງອາຊີ (AFoCO) ກະກຽມຈັດການຝຶກອົບຮົມຄູຝຶກດ້ານການດັບໄຟປ່າໃນເຂດຮ້ອນ ຄັ້ງທີ 5 (TOTFFS) ໃນລະຫວ່າງວັນທີ 18–29 ມັງກອນ 2027 ທີ່ເມືອງວັງວຽງ ແຂວງວຽງຈັນ ໂດຍໄດ້ຮັບການສະໜັບສະໜູນຈາກກະຊວງເອີຣົບ ແລະ ການຕ່າງປະເທດ ແຫ່ງສາທາລະນະລັດຝຣັ່ງ (MOEFA) ແລະ ກົມປ່າໄມ້ແຫ່ງສາທາລະນະລັດເກົາຫຼີ (KFS).

ການຝຶກອົບຮົມຄັ້ງນີ້ ແມ່ນກິດຈະກຳສຳຄັນພາຍໃຕ້ໄລຍະຫຼັກ 2026–2030 ຂອງຂໍ້ລິເລີ່ມການຄຸ້ມຄອງໄຟປ່າໃນອາຊີ (FFMA) ເຊິ່ງມີເປົ້າໝາຍເພື່ອຍົກລະດັບຄວາມຮູ້ ແລະ ທັກສະຂອງບຸກຄະລາກອນດ້ານການປ້ອງກັນ ແລະ ດັບໄຟປ່າ ພ້ອມທັງເສີມສ້າງການຮ່ວມມືແລກປ່ຽນປະສົບການລະຫວ່າງບັນດາປະເທດໃນພາກພື້ນ.
ສຳລັບການຝຶກອົບຮົມຄັ້ງນີ້ ຈະມີຜູ້ເຂົ້າຮ່ວມຈາກ 7 ປະເທດ ປະກອບມີ ບູຖານ, ກຳປູເຈຍ, ສປປ ລາວ, ມຽນມາ, ຟີລິບປິນ, ໄທ ແລະ ຫວຽດນາມ. ການທີ່ ສປປ ລາວ ໄດ້ຮັບກຽດເປັນເຈົ້າພາບ ນອກຈາກຈະເປັນໂອກາດໃຫ້ເຈົ້າໜ້າທີ່ລາວໄດ້ພັດທະນາຄວາມສາມາດໂດຍກົງແລ້ວ ຍັງເປັນການສົ່ງເສີມບົດບາດຂອງລາວໃນການຮ່ວມມືດ້ານການຈັດການໄຟປ່າລະດັບພາກພື້ນ.

ຫຼັກສູດການຝຶກອົບຮົມໄລຍະ 2 ອາທິດ ຈະປະກອບມີການຮຽນທິດສະດີ, ການຈຳລອງສະຖານະການ ແລະ ການຝຶກປະຕິບັດຕົວຈິງໃນພາກສະໜາມ ໂດຍເນັ້ນໃສ່ການວິເຄາະພຶດຕິກຳຂອງໄຟປ່າ, ມາດຕະການຄວາມປອດໄພ, ເຕັກນິກການດັບໄຟປ່າ, ການຈູດໄຟຄວບຄຸມ (Prescribed Burning) ລວມທັງການນຳໃຊ້ເຕັກໂນໂລຊີສະໜັບສະໜູນ ເຊັ່ນ ແຜນທີ່ພູມສັນຖານ ແລະ ໂດຣນສຳລັບວຽກງານດັບໄຟປ່າ.
ນອກຈາກນັ້ນ ຜູ້ເຂົ້າຮ່ວມຍັງຈະໄດ້ແລກປ່ຽນບົດຮຽນ ແລະ ປຶກສາຫາລືກ່ຽວກັບການນຳຄວາມຮູ້ໄປຖ່າຍທອດ ແລະ ຂະຫຍາຍຜົນພາຍໃນປະເທດຂອງຕົນ ເພື່ອສ້າງຄູຝຶກທີ່ມີຄວາມຊຳນານ ແລະ ເພີ່ມປະສິດທິຜົນໃນການຮັບມືກັບໄຟປ່າ.

ການຈັດຝຶກອົບຮົມຄັ້ງນີ້ ຈຶ່ງເປັນອີກກ້າວສຳຄັນໃນການເສີມສ້າງທ່າແຮງບຸກຄະລາກອນ, ພັດທະນາຄວາມຮ່ວມມືລະດັບພາກພື້ນ ແລະ ຍົກລະດັບການປ້ອງກັນ ແລະ ຄວບຄຸມໄຟປ່າໃຫ້ມີຄວາມປອດໄພ ແລະ ມີປະສິດທິຜົນ ອັນຈະປະກອບສ່ວນໃນການອະນຸລັກຊັບພະຍາກອນປ່າໄມ້ ແລະ ຮັກສາສິ່ງແວດລ້ອມໃຫ້ຍືນຍົງ.

ຂ່າວໂດຍ: ກົມປ່າໄມ້
ເຜີຍແຜ່ໂດຍ: ພະແນກເຕັກໂນໂລຊີຂໍ້ມູນ-ຂ່າວສານ, ຫ້ອງການກະຊວງກະສິກຳ ແລະ ສິ່ງແວດລ້ອມ.
ຂ່າວນີ້ມີປະໂຫຍດບໍ່?
ສົ່ງຕໍ່ໃຫ້ໝູ່ ແລະ ຄອບຄົວ ທີ່ຄວນຮູ້ — ກົດດຽວກໍແບ່ງປັນໄດ້
ອ່ານຕໍ່






