
ນັກດາລາສາດຄົ້ນພົບສັນຍານວິທະຍຸປິດສະໜາ ກະພິບທຸກໆ 8 ນາທີ ຈາກລະບົບດາວຄູ່ຫາຍາກ ຫ່າງຈາກໂລກກວ່າ 5,000 ປີແສງ

ສັນຍານວິທະຍຸປິດສະໜາທີ່ປາກົດສະຫຼັບຕິດໆ ດັບໆ ໃນທຸກໆ 8 ນາທີ ຖືກລະບຸວ່າມີຕົ້ນກຳເນີດມາຈາກລະບົບດາວຄູ່ທີ່ຫາຍາກ ເຊິ່ງຢູ່ຫ່າງຈາກໂລກຫຼາຍກວ່າ 5,000 ປີແສງ ໂດຍການຄົ້ນພົບຄັ້ງນີ້ເປັນຜົນງານຂອງທີມນັກດາລາສາດຈາກມະຫາວິທະຍາໄລ Curtin ແລະ ສູນຄົ້ນຄວ້າດາລາສາດວິທະຍຸສາກົນ (ICRAR) ໃນປະເທດອົດສະຕຣາລີ.

ພາບຈາກ: (ICRAR)
ລະບົບດາວຄູ່ດັ່ງກ່າວມີຊື່ວ່າ GPM J071507−114153 ປະກອບດ້ວຍດາວແຄະຂາວ (White Dwarf) ເຊິ່ງເປັນແກນກາງທີ່ເຫຼືອຈາກດາວທີ່ໝົດອາຍຸໄຂ ແລະ ດາວອີກດວງໜຶ່ງປະເພດ G ທີ່ມີລັກສະນະຄ້າຍຄືດວງອາທິດ ຫຼື ທີ່ເອີ້ນວ່າດາວແຄະເຫຼືອງ (Yellow Dwarf).
ຈຸດທີ່ໜ້າສົນໃຈຄື ດາວແຄະຂາວໃນລະບົບນີ້ໝູນຮອບຕົວເອງປະມານທຸກໆ 8 ນາທີ ແລະ ປ່ອຍສັນຍານວິທະຍຸອອກມາເປັນຈັງຫວະ. ນັກວິທະຍາສາດລະບຸວ່າ ນີ້ເປັນຄັ້ງທຳອິດທີ່ສາມາດກວດພົບສັນຍານວິທະຍຸລັກສະນະນີ້ຈາກລະບົບດາວທີ່ມີດາວແຄະຂາວໂຄຈອນຮ່ວມກັບດາວປະເພດ G.

ລະບົບດາວທີ່ມີລັກສະນະພິເສດນີ້ ປະກອບດ້ວຍດາວແຄະຂາວປະເພດພັລຊາ (White Dwarf Pulsar) ທີ່ມີຂະໜາດນ້ອຍ ແຕ່ມີພະລັງງານສູງ ໂຄຈອນຮອບດາວອີກດວງໜຶ່ງທີ່ມີຂະໜາດໃຫຍ່ກວ່າ ແລະ ມີລັກສະນະຄ້າຍຄືດວງອາທິດ. ພາບຈາກ: (ICRAR)
ດຣ. Sam McSweeney ນັກວິທະຍາສາດຜູ້ຄົ້ນພົບ ກ່າວວ່າ ສັນຍານທີ່ກວດພົບມີຄວາມຊັດເຈນຫຼາຍພໍທີ່ຈະສາມາດສັງເກດເຫັນດາວແຄະຂາວທີ່ກຳລັງໂຄຈອນຮອບດາວຄູ່ຂອງມັນໄດ້.
ເພື່ອຢືນຢັນການຄົ້ນພົບດັ່ງກ່າວ ທີມວິໄຈໄດ້ປະມວນຜົນຂໍ້ມູນຫຼາຍກວ່າ 100 ຊົ່ວໂມງ ໂດຍໃຊ້ລະບົບຊູເປີຄອມພິວເຕີທີ່ສູນຄົ້ນຄວ້າ Pawsey ໃນລັດ Western Australia. ການຄົ້ນພົບເລີ່ມຕົ້ນຈາກການໃຊ້ກ້ອງໂທລະທັດ Murchison Widefield Array ເພື່ອສຳຫຼວດທາງຊ້າງເຜືອກ ກ່ອນຈະໃຊ້ກ້ອງໂທລະທັດວິທະຍຸ MeerKAT ໃນປະເທດອາຟຣິກາໃຕ້ ເພື່ອກຳນົດຕຳແໜ່ງຂອງລະບົບດາວຄູ່ໃຫ້ແມ່ນຍຳຫຼາຍຂຶ້ນ.
ກ່ອນໜ້ານີ້ ນັກວິໄຈເຄີຍພົບລະບົບດາວບາງປະເພດທີ່ປ່ອຍສັນຍານວິທະຍຸໃນຮູບແບບຕິດໆ ດັບໆ ເປັນວົງຈອນຄ້າຍຄືກັນ ແຕ່ຍັງບໍ່ສາມາດລະບຸແຫຼ່ງກຳເນີດຂອງສັນຍານໄດ້ຢ່າງຊັດເຈນ. ການຄົ້ນພົບຄັ້ງນີ້ຈຶ່ງຖືເປັນກ້າວສຳຄັນໃນການສຶກສາປະກົດການສັນຍານວິທະຍຸຈາກຫ້ວງອະວະກາດ ແລະ ຊ່ວຍໃຫ້ນັກດາລາສາດເຂົ້າໃຈການປະຕິສຳພັນລະຫວ່າງດາວໃນລະບົບດາວຄູ່ໄດ້ດີຂຶ້ນ.
ທີ່ມາ: ICRAR
ຂ່າວນີ້ມີປະໂຫຍດບໍ່?
ສົ່ງຕໍ່ໃຫ້ໝູ່ ແລະ ຄອບຄົວ ທີ່ຄວນຮູ້ — ກົດດຽວກໍແບ່ງປັນໄດ້






