ຫວຽດນາມປັບຫຼຸດພາສີ “ນ້ຳມັນແອັດຊັງທຸກປະເພດ” ເຫຼືອ 0% ມີຜົນຍາວເຖິງເດືອນມີນາ 2027

AD

AD

AD

ຫວຽດນາມປະກາດປັບຫຼຸດອັດຕາພາສີຊົມໃຊ້ພິເສດສຳລັບນ້ຳມັນແອັດຊັງທຸກປະເພດ ເຫຼືອ 0% ໂດຍມີຜົນຕັ້ງແຕ່ວັນທີ 1 ພະຈິກ 2026 ໄປຈົນເຖິງວັນທີ 31 ມີນາ 2027.

ສຳນັກຂ່າວ VnExpress ລາຍງານໂດຍອ້າງອີງມະຕິໃໝ່ຂອງທາງການຫວຽດນາມ ເມື່ອວັນເສົາ (31 ຕຸລາ) ວ່າ ພາຍໃຕ້ກົດໝາຍພາສີຊົມໃຊ້ພິເສດ ທີ່ມີຜົນບັງຄັບໃຊ້ເມື່ອວັນທີ 1 ກໍລະກົດຂອງປີນີ້ ໄດ້ກຳນົດອັດຕາພາສີໄວ້ທີ່ 10% ສຳລັບນ້ຳມັນແອັດຊັງທົ່ວໄປ, 8% ສຳລັບນ້ຳມັນຊີວະພາບ E5 ແລະ 7% ສຳລັບນ້ຳມັນຊີວະພາບ E10.

ກ່ອນໜ້ານີ້ ລັດຖະບານຫວຽດນາມເຄີຍປັບຫຼຸດພາສີດັ່ງກ່າວເຫຼືອ 0% ມາແລ້ວ ໃນຊ່ວງທ້າຍເດືອນມີນາ ຈົນເຖິງເດືອນມິຖຸນາ 2026 ເພື່ອຊ່ວຍຮັກສາສະຖຽນລະພາບຂອງຕະຫຼາດພາຍໃນປະເທດ.

ຂະນະດຽວກັນ ພາສີສິ່ງແວດລ້ອມສຳລັບຜະລິດຕະພັນນ້ຳມັນແອັດຊັງ ແລະນ້ຳມັນເຊື້ອໄຟ ຍັງຄົງເກັບໃນອັດຕາ 0 ດົ່ງຫວຽດນາມຕໍ່ລິດ.

ນອກຈາກນີ້ ລາຍງານຍັງລະບຸວ່າ ຜະລິດຕະພັນດັ່ງກ່າວຍັງໄດ້ຮັບການຍົກເວັ້ນການຍື່ນແຈ້ງ ແລະການຊຳລະພາສີມູນຄ່າເພີ່ມ (VAT) ຕາມນະໂຍບາຍທີ່ໄດ້ຂະຫຍາຍໄລຍະເວລາອອກໄປຈົນເຖິງທ້າຍປີ 2026.