ມາເລເຊຍ ມ້າງຄະດີຢາເສບຕິດ ຂ້າມຊາດລາຍໃຫຍ່

ຕາມຂ່າວວິທະຍຸ ໂທລະພາບ ສູນກາງຈີນ(CMG) ລາຍງານວ່າ: ເມື່ອບໍ່ດົນມານີ້, ສປ ຈີນ ໄດ້ຮ່ວມປະຕິບັດການ ກັບປະເທດອິນໂດເນເຊຍ ແລະ ມາເລເຊຍ ໂດຍສາມາດ ມ້າງຄະດີການຜະລິດ ແລະ ຄ້າຂາຍຢາເສບຕິດ ຂ້າມຊາດລາຍໃຫຍ່, ເຊິ່ງຍຶດໄດ້ຢາໄອສ໌ທາດແຫລວ ປະມານ 1.2 ໂຕນ, ຈັບກຸມຜູ້ຕ້ອງສົງໄສ ໄດ້ 11 ຄົນ. ເດືອນຕຸລາປີ 2025, ພາກສ່ວນ ປາບປາມຢາເສບຕິດຂອງ ສປ ຈີນ ໄດ້ຕິດຕາມ ແລະ ພົບເຫັນກຸ່ມຄົນບໍ່ດີດັ່ງກ່າວ ໄດ້ລັກລອບຂົນສົ່ງ ຢາໄອສ໌ທາດແຫລວ ເຂົ້າໄປປະເທດອິນໂດເນເຊຍ. ມາຮອດເດືອນກັນຍາປີ2026, ຫ້ອງການຄະນະກຳມະການປາບປາມຢາເສບຕິດແຫ່ງຊາດຈີນ ໄດ້ແຈ້ງສະພາບການກ່ຽວຂ້ອງຕໍ່ ອິນໂດເນເຊຍ, ສອງຝ່າຍຕົກລົງຮ່ວມກັນປາບປາມ. ພາຍໃຕ້ ການປະສານງານຈາກເຈົ້າໜ້າທີ່ຕຳຫລວດ ມາເລເຊຍ, ວັນທີ 21 ຕຸລາ 2026, ຄະນະກຳມະການປາບປາມ ຢາເສບຕິດ ແຫ່ງຊາດອິນໂດເນເຊຍ ໄດ້ມ້າງທຳລາຍບ່ອນຫລົບລີ້ ເພື່ອລັດສະກັດຢາເສບຕິດແຫ່ງໃຫຍ່ ຢູ່ນະຄອນບານດາອາເຊັກ ປະເທດຕົນ, ເຊິ່ງເປັນຄະດີຄ້າຂາຍ ຢາເສບຕິດລາຍໃຫຍ່ ທີ່ສປ ຈີນ ຮ່ວມປະຕິບັດການຂ້າມຊາດ ກັບປະເທດອື່ນ ຈົນສາມາດຈັບກຸມຜູ້ຕ້ອງສົງໄສ ຈຳນວນຫລາຍທີ່ສຸດ ແລະ ປາບປາມຕ່ອງໂສ້ ຄ້າຂາຍຢາເສບຕິດ ຄົບວົງຈອນທີ່ສຸດໃນຊຸມປີຜ່ານມານີ້​./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ