ສາວໄວ 26 ປີ ຕົກຈາກຊັ້ນ 7 ໂຮງແຮມເສຍຊີວິດ ຫຼັງພິງຂອບປ່ອງຢ້ຽມທີ່ຫຼຸດອອກ ແມ່ຮຽກຮ້ອງຄວາມຍຸຕິທຳ

AD

AD

AD

ວັນທີ 4 ພະຈິກ 2026 ສື່ບຣາຊິນລາຍງານເຫດສະຫຼົດຂອງ ເຣນາຕາ ເຣເບກາ ດອສ ຊານໂຕສ ຍິງສາວໄວ 26 ປີ ເສຍຊີວິດຫຼັງພັດຕົກຈາກຊັ້ນ 7 ຂອງໂຮງແຮມໃນເມືອງເຊົາລູອິສ ລັດມາຣັນເຍົາ.

ເຫດເກີດວັນທີ 3 ພະຈິກ ເວລາປະມານ 01:30 ນົກ ຕາມເວລາທ້ອງຖິ່ນ ຫຼື 11:30 ນົກ ຕາມເວລາໄທ ຂະນະທີ່ລາວເດີນທາງມາພັກກັບແຟນໜຸ່ມເພື່ອຮ່ວມກິດຈະກຳການແຂ່ງຂັນໂປ້ກເກີ.

ພາບກ້ອງວົງຈອນປິດຕາມເຜີຍໃຫ້ເຫັນຍິງສາວໄວ 26 ປີ ເດີນມາພ້ອມກັບຊາຍໜຸ່ມເຊິ່ງເປັນແຟນຂອງລາວ ໂດຍມີທ່າທາງຄ້າຍຄົນມຶນເມົາ ແລະ ເດີນເຊ ກ່ອນເອນຕົວພິງຂອບປ່ອງຢ້ຽມບໍລິເວນທາງເດີນຊັ້ນ 7 ຂອງໂຮງແຮມ ຈັງຫວະນັ້ນຂອບປ່ອງຢ້ຽມເກີດຫຼຸດອອກ ເຮັດໃຫ້ລາວພັດຕົກລົງໄປເສຍຊີວິດ ທັງນີ້, ຍັງບໍ່ມີຜົນກວດຢືນຢັນວ່າລາວຢູ່ໃນອາການມຶນເມົາຫຼືບໍ່.

ຮ່າງຂອງລາວພັດຕົກລົງສູ່ຫຼັງຄາກັນສາດບໍລິເວນທາງເຂົ້າໂຮງແຮມ ແລະ ເເສຍຊີວິດ ເຈົ້າໜ້າທີ່ຕຳຫຼວດເຂົ້າກວດສອບທີ່ເກີດເຫດ ພ້ອມນຳແຟນໜຸ່ມໄປສອບປາກຄຳ ກ່ອນປ່ອຍຕົວ ເນື່ອງຈາກບໍ່ພົບຫຼັກຖານວ່າລາວຊຸກ (ຍູ້) ລາວ.

ຜູ້ເສຍຊີວິດເປັນນັກສຶກສາສາຂາບໍລິຫານທຸລະກິດ ແລະ ເປັນແມ່ຂອງລູກນ້ອຍ 2 ຄົນ ການເສຍຊີວິດສ້າງຄວາມໂສກເສົ້າຢ່າງໜັກແກ່ຄອບຄົວ.

ວັນທີ 4 ພະຈິກ ຮ່າງຂອງລາວຖືກສົ່ງກັບເຖິງເມືອງເບເລັງ ລັດປາຣາ ເພື່ອປະກອບພິທີໄວ້ອາໄລ ໂດຍມີຍາດຕິພີ່ນ້ອງ ແລະ ໝູ່ເພື່ອນເດີນທາງມາຮ່ວມອຳລາ.

ເບຕີ ເນເກຣາ ຜູ້ເປັນແມ່ ກ່າວທັງນ້ຳຕາວ່າ ຕ້ອງການຄວາມຍຸຕິທຳໃຫ້ລູກສາວ ແລະ ຮຽກຮ້ອງໃຫ້ກວດສອບຄວາມປອດໄພຂອງໂຮງແຮມຢ່າງລະອຽດ.

ຕຳຫຼວດຢູ່ໃນລະຫວ່າງກວດສອບສະພາບປ່ອງຢ້ຽມ ແລະ ໂຄງສ້າງອາຄານ ເພື່ອຫາສາເຫດທີ່ຂອບອາລູມີນຽມຫຼຸດອອກ ລວມເຖິງພິຈາລະນາວ່າມີຄວາມບົກພ່ອງດ້ານການບຳລຸງຮັກສາຫຼືບໍ່.

ດ້ານໂຮງແຮມສະແດງຄວາມເສຍໃຈ ແລະ ຢືນຢັນໃຫ້ຄວາມຮ່ວມມືກັບເຈົ້າໜ້າທີ່ ຂະນະທີ່ຜົນການກວດພິສູດທາງເຕັກນິກຍັງບໍ່ແລ້ວເສຍ ແລະ ຍັງບໍ່ມີຂໍ້ສະຫຼຸບກ່ຽວກັບຜູ້ຮັບຜິດຊອບ.

ທີ່ມາ: ສື່ບຣາຊິນ