ສີ ຈິ້ນຜິງ ຢ້ຳການລວມຊາດກັບໄຕ້ຫວັນເປັນສິ່ງທີ່ຫຼີກລ່ຽງບໍ່ໄດ້ ບໍ່ອາດຢຸດຢັ້ງກະແສປະຫວັດສາດ

AD

AD

AD

ປະທານາທິບໍດີ ສີ ຈິ້ນຜິງ ຂອງຈີນ ກ່າວຄຳປາໄສໃນໂອກາດຄົບຮອບ 160 ປີ ວັນຊາດກຳເນີດຂອງ ດຣ. ຊຸນ ຢັດເຊັນ ໂດຍຢ້ຳພາລະກິດທາງປະຫວັດສາດໃນການນຳໄຕ້ຫວັນກັບຄືນສູ່ມາດຕຸພູມຢ່າງສົມບູນ ພາຍໃຕ້ແນວທາງ “ໜຶ່ງປະເທດ ສອງລະບົບ” ພ້ອມຊີ້ວ່າກະແສປະຫວັດສາດບໍ່ອາດຢຸດຢັ້ງໄດ້ ແຕ່ບໍ່ໄດ້ກ່າວເຖິງການໃຊ້ກຳລັງທະຫານ.

ປະທານາທິບໍດີ ສີ ຈິ້ນຜິງ ຂອງຈີນ ກ່າວວ່າ ກະແສປະຫວັດສາດບໍ່ອາດຢຸດຢັ້ງໄດ້ ພ້ອມຮຽກຮ້ອງໃຫ້ລວມໄຕ້ຫວັນເຂົ້າກັບຈີນຢ່າງສົມບູນ ໂດຍຢືນຢັນວ່າການລວມຊາດຈະຕ້ອງເກີດຂຶ້ນ ແລະຈີນຈະດຳເນີນການດ້ວຍແນວທາງສັນຕິ ເຖິງແມ່ນວ່າລາວຈະບໍ່ໄດ້ກ່າວເຖິງການໃຊ້ກຳລັງກໍຕາມ

ສີ ຈິ້ນຜິງ ກ່າວຖະແຫຼງການດັ່ງກ່າວ ໃນພິທີລະນຶກຄົບຮອບ 160 ປີ ວັນຊາດກຳເນີດຂອງ ດຣ. ຊຸນ ຢັດເຊັນ ວີລະບຸລຸດແຫ່ງການປະຕິວັດ ແລະບຸກຄົນສຳຄັນທາງປະຫວັດສາດຂອງຈີນ ເຊິ່ງຈັດຂຶ້ນທີ່ຫໍປະຊາຊົນໃນກຸງປັກກິ່ງ. ໂດຍລະບຸວ່າ ການແກ້ໄຂບັນຫາໄຕ້ຫວັນ ແລະການບັນລຸການລວມຊາດຢ່າງສົມບູນ ແມ່ນພາລະກິດທາງປະຫວັດສາດທີ່ພັກຄອມມູນິດຈີນຍຶດໝັ້ນຢ່າງບໍ່ປ່ຽນແປງ ເປັນຄວາມປາຖະໜາຮ່ວມກັນຂອງຊາວຈີນ ແລະເປັນເງື່ອນໄຂທີ່ຈຳເປັນຕາມທຳມະຊາດ ສຳລັບການຟື້ນຟູຄວາມຍິ່ງໃຫຍ່ຂອງຊາດຈີນ

ສີ ຈິ້ນຜິງ ກ່າວວ່າ “ກະແສປະຫວັດສາດບໍ່ອາດຢຸດຢັ້ງໄດ້ ການລວມຊາດຂອງມາດຕຸພູມຢ່າງສົມບູນຈະຕ້ອງເກີດຂຶ້ນ ແລະຈະເກີດຂຶ້ນຢ່າງແນ່ນອນ”

ຜູ້ນຳຈີນຢ້ຳວ່າ ຈີນຍຶດໝັ້ນແນວທາງ “ການລວມຊາດຢ່າງສັນຕິ” ແລະນະໂຍບາຍ “ໜຶ່ງປະເທດ ສອງລະບົບ” ພ້ອມສະແດງຄວາມພ້ອມທີ່ຈະຫາລືກັບໄຕ້ຫວັນ ພາຍໃຕ້ຫຼັກການຈີນດຽວ ເຊິ່ງເປັນຈຸດຢືນຂອງຈີນທີ່ຖືວ່າ ສອງຝັ່ງຊ່ອງແຄບໄຕ້ຫວັນເປັນສ່ວນໜຶ່ງຂອງປະເທດດຽວກັນ

ສີ ຈິ້ນຜິງ ຮຽກຮ້ອງໃຫ້ຊາວຈີນທຸກຄົນ ລວມທັງປະຊາຊົນໃນໄຕ້ຫວັນ ຮ່ວມມືກັນຕໍ່ຕ້ານກຸ່ມທີ່ສະໜັບສະໜູນການແຍກໄຕ້ຫວັນເປັນເອກະລາດ ແລະຜັກດັນການພັດທະນາສາຍພົວພັນລະຫວ່າງສອງຝັ່ງຊ່ອງແຄບຢ່າງສັນຕິ ເພື່ອມຸ່ງໄປສູ່ການລວມຊາດຢ່າງສົມບູນ

ສີ ຈິ້ນຜິງ ກ່າວຍົກຍ້ອງ ຊຸນ ຢັດເຊັນ ວ່າເປັນວີລະບຸລຸດຜູ້ຍິ່ງໃຫຍ່ຂອງຊາດ ເປັນຜູ້ຮັກຊາດ ແລະເປັນຜູ້ບຸກເບີກການປະຕິວັດປະຊາທິປະໄຕຂອງຈີນ ພ້ອມຮຽກຮ້ອງໃຫ້ປະຊາຊົນສືບທອດເຈດຈຳນົງ ແລະມໍລະດົກທາງຄວາມຄິດຂອງຊຸນ ເພື່ອຮ່ວມກັນຜັກດັນການຟື້ນຟູຄວາມຍິ່ງໃຫຍ່ຂອງຊາດຈີນ

ຊຸນ ຢັດເຊັນ ເກີດໃນປີ 1866 ແລະເປັນຜູ້ນຳການປະຕິວັດໃນປີ 1911 ເຊິ່ງໄດ້ຍຸຕິລະບອບຈັກກະພັດທີ່ປົກຄອງຈີນມາຢ່າງຍາວນານຫຼາຍພັນປີ ແລະນຳໄປສູ່ການສະຖາປະນາສາທາລະນະລັດຈີນ ກ່ອນຈະເສຍຊີວິດໃນປີ 1925

ຜູ້ນຳຈີນລະບຸວ່າ ພັກຄອມມູນິດຈີນເປັນຜູ້ສະໜັບສະໜູນທີ່ໜັກແໜ້ນ ເປັນຜູ້ຮ່ວມງານທີ່ຊື່ສັດ ແລະເປັນຜູ້ສືບທອດພາລະກິດການປະຕິວັດທີ່ຊຸນ ຢັດເຊັນ ເປັນຜູ້ລິເລີ່ມ ພ້ອມກ່າວວ່າ ຕະຫຼອດໄລຍະກວ່າ 100 ປີຜ່ານມາ ພັກຄອມມູນິດຈີນໄດ້ນຳພາປະຊາຊົນຂຽນບົດທີ່ຍິ່ງໃຫຍ່ທີ່ສຸດໃນປະຫວັດສາດຂອງຊາດຈີນ

ສີ ຈິ້ນຜິງ ກ່າວວ່າ ວິທີທີ່ດີທີ່ສຸດໃນການລະນຶກເຖິງຊຸນ ຢັດເຊັນ ແມ່ນການຮຽນຮູ້ ສືບທອດ ແລະສານຕໍ່ຈິດວິນຍານອັນມີຄຸນຄ່າຂອງລາວ ເພື່ອກ້າວໄປໜ້າໃນການສ້າງປະເທດໃຫ້ເຂັ້ມແຂງ ແລະຟື້ນຟູຄວາມຍິ່ງໃຫຍ່ຂອງຊາດ

ລາວຍັງຮຽກຮ້ອງໃຫ້ປະຊາຊົນສົ່ງເສີມຄວາມຮັກຊາດ ມຸ່ງໝັ້ນສ້າງຈີນໃຫ້ເຂັ້ມແຂງ ແລະມັ່ງຄັ່ງ ຍຶດປະຊາຊົນເປັນສູນກາງ ໃຫ້ຄວາມສຳຄັນກັບການຍົກລະດັບຄຸນນະພາບຊີວິດ ຕະຫຼອດຈົນຄວາມຈະເລີນຮຸ່ງເຮືອງຮ່ວມກັນຂອງປະຊາຊົນທຸກຄົນ

ນອກຈາກນີ້ ຍັງເນັ້ນຢ້ຳເຖິງຄວາມຈຳເປັນໃນການພັດທະນາທິດສະດີ ແລະນະວັດຕະກຳທາງຄວາມຄິດຢ່າງກ້າຫານ ລວມທັງການປັບແນວຄິດມາກຊິດໃຫ້ເໝາະສົມກັບບໍລິບົດຂອງຈີນ ແລະຍຸກສະໄໝ ພ້ອມຮຽກຮ້ອງໃຫ້ປະຊາຊົນຢືນຢັດຕໍ່ສູ້ກັບອຸປະສັກ ແລະສິ່ງທ້າທາຍຕ່າງໆ

“ພວກເຮົາຕ້ອງສືບທອດຈິດວິນຍານແຫ່ງການຕໍ່ສູ້ ເສີມສ້າງຂີດຄວາມສາມາດ ກຽມພ້ອມຮັບມືກັບລົມແຮງ ຄື້ນສູງ ແລະແມ່ນແຕ່ພາຍຸທີ່ອັນຕະລາຍ ຕະຫຼອດຈົນເອົາຊະນະຄວາມສ່ຽງ ແລະສິ່ງທ້າທາຍທັງໝົດທີ່ຈະປະເຊີນໃນເສັ້ນທາງຂ້າງໜ້າ”

ຈີນຖືວ່າ ໄຕ້ຫວັນທີ່ປົກຄອງດ້ວຍລະບອບປະຊາທິປະໄຕ ເປັນດິນແດນສ່ວນໜຶ່ງຂອງຕົນ ເຖິງແມ່ນວ່າລັດຖະບານໄຕ້ຫວັນຈະປະຕິເສດຂໍ້ອ້າງດັ່ງກ່າວຢ່າງໜັກແໜ້ນກໍຕາມ. ໂດຍປັກກິ່ງໄດ້ສະເໜີຮູບແບບການປົກຄອງ “ໜຶ່ງປະເທດ ສອງລະບົບ” ໃຫ້ໄຕ້ຫວັນມີອຳນາດປົກຄອງຕົນເອງ ແຕ່ແນວທາງນີ້ບໍ່ໄດ້ຮັບການສະໜັບສະໜູນຈາກພັກການເມືອງຫຼັກໃດໆໃນໄຕ້ຫວັນ

ເຖິງແມ່ນສີ ຈິ້ນຜິງ ຈະບໍ່ໄດ້ກ່າວເຖິງການໃຊ້ກຳລັງ ແຕ່ຈີນບໍ່ເຄີຍຕັດທາງເລືອກດັ່ງກ່າວໃນການລວມໄຕ້ຫວັນ. ຂະນະທີ່ກອງທັບຈີນປະຕິບັດການອ້ອມເກາະໄຕ້ຫວັນເປັນປະຈຳທຸກມື້ ແລະຂະຫຍາຍຂອບເຂດການປະຕິບັດການອອກໄປໃນມະຫາສະໝຸດປາຊີຟິກຫຼາຍຂຶ້ນ. ສ່ວນລັດຖະບານໄຕ້ຫວັນຍັງບໍ່ໄດ້ສະແດງຄວາມເຫັນຕໍ່ຖະແຫຼງການຂອງຜູ້ນຳຈີນ

ກ່ອນໜ້ານີ້ ໃນເດືອນຜ່ານມາ ໄຕ້ຫວັນໄດ້ຮຽກຮ້ອງໃຫ້ປະຊາຊົນຫຼີກລ່ຽງກິດຈະກຳຕ່າງໆຂອງຈີນທີ່ຈັດຂຶ້ນເພື່ອລະນຶກເຖິງຊຸນ ຢັດເຊັນ ໂດຍກ່າວຫາວ່າປັກກິ່ງມີມຸມມອງທີ່ບິດເບືອນກ່ຽວກັບຕົວຊຸນ ແລະມໍລະດົກທາງປະຫວັດສາດຂອງລາວ

ໃນຈີນ ຊຸນ ຢັດເຊັນ ໄດ້ຮັບການຍົກຍ້ອງໃນຖານະວີລະບຸລຸດແຫ່ງຊາດ ແລະຜູ້ຮັກຊາດຜູ້ຍິ່ງໃຫຍ່ ລວມທັງເປັນຜູ້ບຸກເບີກການປະຕິວັດຄອມມູນິດໃນປີ 1949 ເຊິ່ງເຮັດໃຫ້ລັດຖະບານສາທາລະນະລັດຈີນທີ່ພ່າຍແພ້ ຕ້ອງຫຼົບໜີໄປຍັງໄຕ້ຫວັນ ແລະຍັງຄົງປົກຄອງເກາະແຫ່ງນີ້ມາຈົນເຖິງປັດຈຸບັນ

ສ່ວນໃນໄຕ້ຫວັນ ຊຸນ ຢັດເຊັນ ໄດ້ຮັບການຍົກຍ້ອງຢ່າງເປັນທາງການໃນຖານະ “ບິດາແຫ່ງຊາດ” ໂດຍມີຮູບຂອງລາວແຂວນຢູ່ໃນຫ້ອງການປະທານາທິບໍດີ ເຖິງແມ່ນວ່າຫຼັກປັດຊະຍາທາງການເມືອງ “ສາມຫຼັກການແຫ່ງປະຊາຊົນ” ຂອງລາວ ຈະບໍ່ໄດ້ເປັນວິຊາບັງຄັບສຳລັບນັກຮຽນອີກຕໍ່ໄປ

ປະທານາທິບໍດີ ໄລ່ ຊິງເຕີ ຂອງໄຕ້ຫວັນ ແລະພັກປະຊາທິປະໄຕກ້າວໜ້າ ເຊິ່ງເປັນພັກລັດຖະບານ ສະໜັບສະໜູນອັດຕະລັກທີ່ແຍກຕ່າງຫາກຂອງໄຕ້ຫວັນຈາກຈີນ ແລະໃນໄລຍະຜ່ານມາກໍໄດ້ສະແດງຈຸດຢືນທີ່ເຂັ້ມແຂງຂຶ້ນຕໍ່ປັກກິ່ງ ກ່ຽວກັບບົດບາດຂອງສາທາລະນະລັດຈີນ

ໄຕ້ຫວັນຍັງບໍ່ພໍໃຈຢ່າງຫຼາຍຕໍ່ຄວາມພະຍາຍາມຂອງຈີນໃນການອ້າງຄວາມຊອບທຳ ແລະອ້າງຜົນງານຈາກໄຊຊະນະໃນສົງຄາມໂລກຄັ້ງທີ 2 ໂດຍຢືນຢັນວ່າ ລັດຖະບານສາທາລະນະລັດຈີນເປັນຜູ້ທີ່ຕໍ່ສູ້ເຄຽງຂ້າງຝ່າຍສຳພັນທະມິດໃນສົງຄາມ ຂະນະທີ່ສາທາລະນະລັດປະຊາຊົນຈີນຍັງບໍ່ທັນຖືກສະຖາປະນາຂຶ້ນໃນເວລານັ້ນ

ຈີນກ່າວຫາ ໄລ່ ຊິງເຕີ ວ່າເປັນ “ຜູ້ແບ່ງແຍກດິນແດນ” ແລະປະຕິເສດທີ່ຈະເຈລະຈາກັບລາວ ຂະນະທີ່ໄລ່ຢືນຢັນວ່າ ອະນາຄົດຂອງໄຕ້ຫວັນແມ່ນສິດໃນການຕັດສິນໃຈຂອງປະຊາຊົນໄຕ້ຫວັນເທົ່ານັ້ນ

ຖະແຫຼງການຂອງສີ ຈິ້ນຜິງ ມີຂຶ້ນກ່ອນການປະຊຸມສຸດຍອດເອເປັກ (APEC) ທີ່ເມືອງເຊິນເຈິ້ນ ທາງພາກໃຕ້ຂອງຈີນ ໃນອີກ 1 ອາທິດຂ້າງໜ້າ ເຊິ່ງລາວມີກຳນົດພົບກັບປະທານາທິບໍດີ ໂດນັລ ທຣຳ ຂອງສະຫະລັດອີກຄັ້ງ ແລະກ່ອນການເລືອກຕັ້ງທ້ອງຖິ່ນຄັ້ງສຳຄັນຂອງໄຕ້ຫວັນ ໃນອີກກວ່າ 2 ອາທິດຂ້າງໜ້າ

ທີ່ມາ: Reuters / China Daily