ການາດາສັ່ງກຳຈັດໝີກຣິສລີ 4 ໂຕ ຫຼັງຜົນການສືບສວນພົບວ່າກໍ່ເຫດທຳຮ້າຍແມ່ລູກຈົນເສຍຊີວິດ ທີ່ລັດບຣິຕິຊ ໂຄລຳເບຍ

AD

AD

AD

ເຈົ້າໜ້າທີ່ການາດາໄດ້ດຳເນີນການກຳຈັດໝີກຣິສລີຈຳນວນ 4 ໂຕ ຫຼັງຜົນການສືບສວນພົບວ່າ ໝີກຸ່ມດັ່ງກ່າວມີສ່ວນກ່ຽວຂ້ອງກັບເຫດທຳຮ້າຍແມ່ລູກຄູ່ໜຶ່ງຈົນເສຍຊີວິດ ໃນລັດບຣິຕິຊ ໂຄລຳເບຍ ປະເທດການາດາ.

ຕາມລາຍງານຂ່າວຕ່າງປະເທດ ເມື່ອວັນທີ 11 ພະຈິກ 2026 ລະບຸວ່າ ນາງ ເຈນນິເຟີ ບັນຄາຣັສ ອາຍຸ 48 ປີ ແລະ ນາງ ເຊລາ ຣີດ ລູກສາວອາຍຸ 20 ປີ ຖືກພົບເປັນສົບ ຫຼັງຈາກອອກໄປຍ່າງຫຼິ້ນໃນຕອນບ່າຍ ຢູ່ບໍລິເວນເສັ້ນທາງຍ່າງປ່າ ໃນເມືອງເບລາຄູລາ (Bella Coola) ເມື່ອຕົ້ນເດືອນພະຈິກທີ່ຜ່ານມາ.

ພາຍຫຼັງເກີດເຫດ ສຳນັກງານບໍລິການເຈົ້າໜ້າທີ່ອະນຸລັກລັດບຣິຕິຊ ໂຄລຳເບຍ (BCCOS) ໄດ້ເລີ່ມສືບສວນຫາສາເຫດການເສຍຊີວິດ ໂດຍຜົນການກວດພິສູດຫຼັກຖານທາງນິຕິວິທະຍາ ລວມທັງການກວດ DNA ສາມາດຢືນຢັນໄດ້ວ່າ ໝີໂຕແມ່ ແລະລູກໝີອີກ 3 ໂຕ ເປັນກຸ່ມທີ່ກ່ຽວຂ້ອງກັບເຫດທຳຮ້າຍຄັ້ງນີ້.

ທ່ານ ເຈຟ ໄທຣ ເຈົ້າໜ້າທີ່ສືບສວນຂອງ BCCOS ໄດ້ລະບຸໃນການລາຍງານຄວາມຄືບໜ້າ ເມື່ອວັນທີ 10 ພະຈິກວ່າ ໝີກຣິສລີທັງ 4 ໂຕ ໄດ້ຖືກກຳຈັດຕາມມາດຕະການຮັບມືກັບສະຖານະການຂັດແຍ່ງລະຫວ່າງມະນຸດກັບສັດປ່າຂອງລັດ ເພື່ອຮັບປະກັນຄວາມປອດໄພຂອງປະຊາຊົນ.

ທ່ານ ໄທຣ ກ່າວເພີ່ມວ່າ ຫຼັກຖານຈາກການສືບສວນ ລວມທັງ DNA ຂອງສັດ ໄດ້ຖືກນຳມາວິເຄາະ ແລະສາມາດລະບຸໄດ້ຢ່າງຊັດເຈນວ່າ ເປັນໝີໂຕແມ່ແລະລູກຂອງມັນອີກ 3 ໂຕ. ສ່ວນສາເຫດຂອງການໂຈມຕີ ຄາດວ່າອາດກ່ຽວຂ້ອງກັບພຶດຕິກຳການລ່າເຫຍື່ອຂອງໝີ ເຊິ່ງເປັນພຶດຕິກຳທີ່ພົບໄດ້ບໍ່ເລື້ອຍ.

ນອກຈາກນີ້ ທ່ານ ໄທຣ ຍັງເປີດເຜີຍວ່າ ມີເຈົ້າໜ້າທີ່ອະນຸລັກຫຼາຍກວ່າ 12 ຄົນ ເຂົ້າຮ່ວມການສືບສວນຕະຫຼອດສັບປະດາຜ່ານມາ ເຖິງແມ່ນວ່າຈະຕ້ອງປະເຊີນກັບສະພາບພູມປະເທດ ແລະດິນຟ້າອາກາດທີ່ຫຍຸ້ງຍາກກໍຕາມ.

ຢ່າງໃດກໍຕາມ ຜົນການກວດ DNA ຍັງຢືນຢັນອີກວ່າ ໝີທັງ 4 ໂຕນີ້ ບໍ່ມີສ່ວນກ່ຽວຂ້ອງກັບເຫດໝີໂຈມຕີກຸ່ມນັກຮຽນ ໃນເດືອນພະຈິກ 2025 ທີ່ເມືອງເບລາຄູລາເຊັ່ນດຽວກັນ ເຊິ່ງໃນເຫດການຄັ້ງນັ້ນມີຜູ້ໄດ້ຮັບບາດເຈັບເຖິງ 11 ຄົນ.

ທີ່ມາ: bbc