ກຽມເປີດເກັບຄ່າຜ່ານທາງຫຼວງ ເລກ 9 ແຂວງສະຫວັນນະເຂດ ເລີ່ມວັນທີ 16 ພະຈິກ 2026 (ສະເພາະລົດນ້ຳໜັກ 12 ໂຕນຂຶ້ນໄປ)

AD

AD

AD

ເສັ້ນທາງຫຼວງແຫ່ງຊາດ ເລກ 9 ແຂວງສະຫວັນນະເຂດ ກຽມເປີດໃຫ້ບໍລິການເກັບຄ່າຜ່ານທາງຢ່າງເປັນທາງການ ນັບແຕ່ວັນທີ 16 ພະຈິກ 2026 ເປັນຕົ້ນໄປ ໂດຍຈະເກັບສະເພາະລົດຂົນສົ່ງສິນຄ້າ ແລະ ລົດໂດຍສານ ທີ່ມີນ້ຳໜັກລວມ 12 ໂຕນຂຶ້ນໄປ ເພື່ອນຳງົບປະມານມາບຳລຸງຮັກສາເສັ້ນທາງໃຫ້ໄດ້ມາດຕະຖານ ແລະ ຍືນຍົງ.

ເສັ້ນທາງເລກ 9 ຖືເປັນເສັ້ນເລືອດໃຫຍ່ທາງເສດຖະກິດທີ່ເຊື່ອມໂຍງການຄ້າ ແລະ ການຂົນສົ່ງລະຫວ່າງ ໄທ – ລາວ – ຫວຽດນາມ. ແຕ່ລະວັນມີລົດບັນທຸກໜັກສັນຈອນຈຳນວນຫຼາຍ ເຮັດໃຫ້ເສັ້ນທາງຊຸດໂຊມໄວກ່ອນກຳນົດ ແລະ ຕ້ອງໃຊ້ງົບປະມານມະຫາສານໃນການສ້ອມແປງ. ດັ່ງນັ້ນ, ອີງຕາມມະຕິຂອງສະພາແຫ່ງຊາດ ເລກທີ 165/ສພຊ (ລົງວັນທີ 26 ມິຖຸນາ 2025) ແລະ ມະຕິຂອງລັດຖະບານ ເລກທີ 10/ລບ (ລົງວັນທີ 01 ກັນຍາ 2025), ພາກລັດຈຶ່ງໄດ້ນຳໃຊ້ລະບົບການເກັບຄ່າຜ່ານທາງແບບດີຈີຕອນ (ຈ່າຍຜ່ານລະບົບທະນາຄານ ຕາມນ້ຳໜັກ ແລະ ໄລຍະທາງຕົວຈິງ).

ຜົນປະໂຫຍດທີ່ຈະໄດ້ຮັບຈາກການເກັບຄ່າຜ່ານທາງ:

• ສຳລັບຜູ້ປະກອບການຂົນສົ່ງ: ເສັ້ນທາງທີ່ຮາບພຽງ ແລະ ໄດ້ມາດຕະຖານ ຈະຊ່ວຍປະຢັດຄ່າສ້ອມແປງອາໄຫຼ່, ຢາງລົດ, ຫຼຸດການສິ້ນເປືອງນ້ຳມັນ ແລະ ຫຼຸດໄລຍະເວລາໃນການເດີນທາງ ເຮັດໃຫ້ຂົນສົ່ງສິນຄ້າໄດ້ຫຼາຍຮອບຂຶ້ນ.
• ສຳລັບຄວາມປອດໄພຂອງປະຊາຊົນ: ຫຼຸດຜ່ອນອຸບັດຕິເຫດທີ່ເກີດຈາກເສັ້ນທາງເປ່ເພ ແລະ ຊ່ວຍໃຫ້ການສັນຈອນໄປມາສະດວກສະບາຍຕະຫຼອດ 24 ຊົ່ວໂມງ.
• ສຳລັບເສດຖະກິດ ແລະ ປະເທດຊາດ: ຊຸກຍູ້ການຄ້າ, ການທ່ອງທ່ຽວ ແລະ ການລົງທຶນໃຫ້ຂະຫຍາຍຕົວ. ລາຍຮັບທັງໝົດຈະຖືກໂອນເຂົ້າບັນຊີສະເພາະຂອງງົບປະມານແຫ່ງລັດຢ່າງໂປ່ງໃສ ເພື່ອນຳມາໝູນໃຊ້ບຳລຸງຮັກສາເສັ້ນທາງເສັ້ນນີ້ໂດຍກົງ.

ພາກສ່ວນກ່ຽວຂ້ອງຈຶ່ງຂໍຄວາມຮ່ວມມືມາຍັງຜູ້ປະກອບການຂົນສົ່ງ ແລະ ຜູ້ໃຊ້ລົດໃຊ້ຖະໜົນທຸກທ່ານ ຮ່ວມກັນສະໜັບສະໜູນນະໂຍບາຍດັ່ງກ່າວ ເພື່ອສ້າງເສັ້ນທາງທີ່ໝັ້ນຄົງ ແລະ ປອດໄພໃຫ້ແກ່ປະເທດຊາດສືບຕໍ່ໄປ.

ທກະຊວງການເງິນ