ຈາກເຮືອໂດຍສານລະດັບຕຳນານ ສູ່ບ້ານໃໝ່ໃຕ້ມະຫາສະໝຸດ! ເຮືອ SS United States ອຳລາຜິວນ້ຳ ກຽມເປັນແຫຼ່ງປະກາລັງທຽມໃຫຍ່ທີ່ສຸດໃນໂລກ

AD

AD

AD

ເຮືອ SS United States ເຮືອໂດຍສານປະຫວັດສາດທີ່ເຄີຍຄອງສະຖິຕິເປັນເຮືອໂດຍສານທີ່ແລ່ນໄວທີ່ສຸດໃນໂລກ ກຳລັງຈະປິດຕຳນານລົງ ຫຼັງມີແຜນນຳເຮືອລຳນີ້ຈົມລົງສູ່ພື້ນທະເລນອກແຄມຝັ່ງລັດຟລໍຣິດາ ປະເທດສະຫະລັດ ເພື່ອປ່ຽນເປັນແຫຼ່ງປະກາລັງທຽມທີ່ໃຫຍ່ທີ່ສຸດໃນໂລກ ພ້ອມເປັນແຫຼ່ງອາໄສຂອງສັດທະເລ ແລະສະຖານທີ່ທ່ອງທ່ຽວດຳນ້ຳແຫ່ງໃໝ່.

ເຮືອ SS United States ມີຄວາມຍາວຫຼາຍກວ່າເຮືອ Titanic ແລະເຄີຍເປັນໜຶ່ງໃນເຮືອໂດຍສານທີ່ມີຊື່ສຽງທີ່ສຸດໃນໂລກ. ເຮືອລຳນີ້ຈອດຢູ່ທີ່ເມືອງຟິລາເດວເຟຍ (Philadelphia) ເປັນເວລາເກືອບ 30 ປີ ກ່ອນຈະຖືກຍ້າຍມາຍັງລັດຟລໍຣິດາ ຫຼັງຈາກອົງການປົກຄອງທ້ອງຖິ່ນໃນລັດດັ່ງກ່າວໄດ້ຈັດຊື້ເຮືອລຳນີ້ ເພື່ອນຳມາຈົມເປັນແຫລ່ງປະກາລັງທຽມ.

ການຈົມເຮືອມີກຳນົດດຳເນີນໃນວັນພຸດ ໂດຍໃຊ້ວິທີຄວບຄຸມການຈົມຢ່າງແມ່ນຍຳ ແລະ ບໍ່ໃຊ້ວັດຖຸລະເບີດ.

ໃນອະດີດ ເຮືອ SS United States ເລີ່ມໃຫ້ບໍລິການຂ້າມມະຫາສະໝຸດແອັດແລນຕິກໃນປີ 1952 ແລະຢຸດໃຫ້ບໍລິການໃນປີ 1969. ຕະຫຼອດໄລຍະການໃຫ້ບໍລິການ ເຮືອລຳນີ້ເຄີຍຕ້ອນຮັບບຸກຄົນສຳຄັນ ແລະ ບັນດາຄົນດັງລະດັບໂລກຈຳນວນຫຼາຍ ລວມທັງອະດີດປະທານາທິບໍດີສະຫະລັດ ແຮຣີ ທຣູແມນ, ດະໄວທ໌ ໄອເຊນຮາວເວີ ແລະ ຈອນ ເອັຟ ເຄນເນດີ.

ນອກນັ້ນ ອະດີດປະທານາທິບໍດີ ບິວ ຄລິນຕັນ ກໍເຄີຍໂດຍສານເຮືອລຳນີ້ຂ້າມມະຫາສະໝຸດແອັດແລນຕິກໃນສະໄໝທີ່ຍັງເປັນໄວລຸ້ນ. ສ່ວນຄົນດັງອື່ນໆ ທີ່ເຄີຍໂດຍສານເຮືອລຳນີ້ ມີທັງ ມາລອນ ແບຣນໂດ, ໂຄໂຄ ຊາແນລ, ດຸກ ເອລລິງຕັນ, ຊັນວາດໍ ດາລີ, ວອລຕ໌ ດິສນີ, ຈູດີ ກາແລນ ແລະ ແຄຣີ ແກຣນ.

ກ່ອນໜ້ານີ້ ເຄີຍມີຄວາມພະຍາຍາມຜັກດັນໃຫ້ອະນຸລັກເຮືອ SS United States ໄວ້ ໂດຍສະເໜີໃຫ້ປັບປຸງເປັນພິພິທະພັນ ຫຼືໂຮງແຮມລອຍນ້ຳ ແຕ່ຂໍ້ສະເໜີຕ່າງໆບໍ່ປະສົບຜົນສຳເລັດ.

ດ້ານກຸ່ມ SS United States Conservancy ເຊິ່ງເປັນອົງການທີ່ພະຍາຍາມອະນຸລັກເຮືອປະຫວັດສາດລຳນີ້ ໄດ້ຕໍ່ສູ້ເພື່ອຮັກສາເຮືອໃຫ້ຄົງຢູ່ເໜືອຜິວນ້ຳມາໂດຍຕະຫຼອດ ແຕ່ສຸດທ້າຍກໍບໍ່ສາມາດປ່ຽນແປງແຜນການໄດ້.

ນາງ ຊູຊານ ກິບສ໌ (Susan Gibbs) ປະທານກຸ່ມ SS United States Conservancy ເຊິ່ງພໍ່ຕູ້ຂອງນາງເປັນໜຶ່ງໃນຜູ້ອອກແບບເຮືອລຳນີ້ ກ່າວວ່າ ນາງຮູ້ສຶກດີໃຈທີ່ເລື່ອງລາວ ແລະຄວາມຊົງຈຳຂອງເຮືອລຳນີ້ຈະຍັງຄົງສືບຕໍ່ໄປ. ນາງມອງວ່າ ເຮືອລຳນີ້ເປັນສັນຍະລັກແຫ່ງຄວາມພາກພູມໃຈຂອງຊາວອາເມລິກາ ທີ່ສາມາດເຊື່ອມໂຍງຜູ້ຄົນຈຳນວນຫຼາຍເຂົ້າດ້ວຍກັນ.

ທັງນີ້ ກ່ອນຈະເດີນທາງສູ່ຊາຍຝັ່ງເມືອງເດສຕິນ (Destin) ລັດຟລໍຣິດາ ເຮືອ SS United States ໄດ້ຖືກຍ້າຍຈາກເມືອງຟິລາເດວເຟຍໄປຍັງລັດແອລາບາມາໃນປີກາຍນີ້ ເພື່ອດຳເນີນການອະນາໄມ ແລະປັບປຸງສະພາບເຮືອ ກ່ອນຈະອອກເດີນທາງສູ່ຈຸດໝາຍປາຍທາງຄັ້ງສຸດທ້າຍ ຄືພື້ນຟູທະເລ.

ທີ່ມາຂ່າວ: BBC