ເປີດບົດລົງໂທດ “ເຮຊຸສ ໂອໂວໂນ” ຫຼັງປະທະກັບ “ເຮຊຸສ ເດ ມິເກລ” ກອງໜ້າເຕເນຣິເຟ ຈົນເສຍຊີວິດ

AD

AD

AD

ຈາກເຫດການສຸດສະເທືອນໃຈວົງການບານເຕະສະເປນ ເມື່ອ ເຮຊຸສ ເດ ມິເກລ ກອງໜ້າອາຍຸ 30 ປີຂອງທີມ ເຕເນຣິເຟ ເສຍຊີວິດ ຫຼັງໄດ້ຮັບບາດເຈັບຈາກຈັງຫວະປະທະຢ່າງຮຸນແຮງກັບ ເຮຊຸສ ໂອໂວໂນ ຜູ້ຮັກສາປະຕູຂອງທີມ ເອັຟຊີ ອັນດໍຣາ ໃນການແຂ່ງຂັນລີກເຊກຸນດາ ດິວິຊັນ ຂອງສະເປນ ຈົນຜູ້ຕັດສິນຕ້ອງຢຸດການແຂ່ງຂັນກ່ອນໝົດເວລາພຽງ 2 ນາທີ.

ລ່າສຸດ ມີລາຍງານວ່າ ໂອໂວໂນ ອາດຕ້ອງປະເຊີນກັບບົດລົງໂທດຢ່າງໜັກ ທັງໃນດ້ານກິລາບານເຕະ ແລະທາງກົດໝາຍ ໂດຍມີຄວາມສ່ຽງຖືກຫ້າມລົງແຂ່ງຂັນສູງສຸດ 8 ນັດ

ລາຍງານຈາກ Mundo Deportivo ສື່ຂອງສະເປນ ລະບຸວ່າ ຕາມມາດຕາ 130 ຂອງປະມວນວິໄນກິລາ ການຫຼິ້ນທີ່ກໍ່ໃຫ້ເກີດອັນຕະລາຍຕໍ່ຄູ່ແຂ່ງ ອາດມີໂທດຫ້າມລົງແຂ່ງຂັນ 1-3 ນັດ. ແຕ່ຖ້າເປັນກໍລະນີທີ່ມີຄວາມຮຸນແຮງເປັນພິເສດ ຄະນະກຳມະການວິໄນອາດພິຈາລະນາລົງໂທດຕາມມາດຕາ 102 ເຊິ່ງກຳນົດໂທດຫ້າມລົງແຂ່ງຂັນຕັ້ງແຕ່ 4-12 ນັດ. ດັ່ງນັ້ນ ຈຶ່ງມີການປະເມີນວ່າ ໂອໂວໂນ ອາດຖືກລົງໂທດຫ້າມລົງແຂ່ງຂັນສູງເຖິງ 8 ນັດ

ນອກຈາກນີ້ ເຫດການດັ່ງກ່າວອາດລຸກລາມໄປເຖິງຄະດີອາຍາ ເຊິ່ງອາດມີໂທດຈຳຄຸກສູງສຸດ 4 ປີ. ສື່ກິລາຊື່ດັງຂອງສະເປນ Sport ເປີດເຜີຍປະເດັນດ້ານກົດໝາຍວ່າ ເຫດການນີ້ອາດບໍ່ຈົບພຽງບົດລົງໂທດທາງບານເຕະ ແຕ່ອາດຂະຫຍາຍໄປສູ່ຂະບວນການຍຸຕິທຳອີກດ້ວຍ

ເນື່ອງຈາກປະມວນກົດໝາຍອາຍາຂອງສະເປນ ມາດຕາ 142 ລະບຸວ່າ ຜູ້ທີ່ກະທຳການໂດຍປະໝາດເລິນເລີ່ຢ່າງຮ້າຍແຮງ ຈົນເປັນເຫດໃຫ້ຜູ້ອື່ນເສຍຊີວິດ ອາດຕ້ອງຮັບໂທດຈຳຄຸກຕັ້ງແຕ່ 1-4 ປີ

ແນວໃດກໍຕາມ ການດຳເນີນຄະດີອາຍາຈະຕ້ອງພິຈາລະນາວ່າ ຈັງຫວະປະທະດັ່ງກ່າວເປັນການກະທຳທີ່ເກີນຂອບເຂດຄວາມສ່ຽງຕາມປົກກະຕິຂອງການແຂ່ງຂັນກິລາຫຼືບໍ່. ໂດຍຈະຕ້ອງກວດສອບຫຼັກຖານຕ່າງໆ ປະກອບການພິຈາລະນາ ທັງພາບວິດີໂອ, ລັກສະນະການເຂົ້າປະທະ, ຕຳແໜ່ງຂອງບານ ແລະລາຍງານທາງການແພດ ຖ້າຫາກຄອບຄົວຂອງຜູ້ເສຍຊີວິດຕັດສິນໃຈດຳເນີນຄະດີ

ດ້ານ ໂອໂວໂນ ກຳລັງຢູ່ໃນສະພາບຈິດໃຈທີ່ຍ່ຳແຍ່ຢ່າງໜັກ ຈາກເຫດການທີ່ເກີດຂຶ້ນ ໂດຍເຈົ້າຕົວມີຄວາມປະສົງທີ່ຈະເຂົ້າພົບ ແລະກ່າວຂໍໂທດຄອບຄົວຂອງ ເດ ມິເກລ ດ້ວຍຕົນເອງ ທ່າມກາງຄວາມໂສກເສົ້າຂອງວົງການບານເຕະສະເປນ ຕໍ່ການສູນເສຍໃນຄັ້ງນີ້