ເກີດເຫດກາດຍິງຢູ່ໂຮງຮຽນປະຖົມສະຫະລັດ ເສຍຊີວິດຢ່າງໜ້ອຍ 4 ຄົນ ໃນນັ້ນເປັນນັກຮຽນ 3 ຄົນ

ເກີດເຫດຍິງກາດຢູ່ໂຮງຮຽນປະຖົມໃນລັດອໍຣີກອນຂອງສະຫະລັດ ມີລາຍງານຜູ້ເສຍຊີວິດ 4 ລາຍ ເປັນເດັກນ້ອຍ 3 ຄົນ ແລະ ຜູ້ໃຫຍ່ 1 ຄົນ ສ່ວນຜູ້ຕ້ອງສົງໄສເສຍຊີວິດຢູ່ໃນທີ່ເກີດເຫດ ຕຳຫຼວດກຳລັງເລ່ງກວດສອບຂໍ້ເທັດຈິງຮ່ວມກັບເອຟບີໄອ (FBI).

ເກີດເຫດຍິງກາດຂຶ້ນພາຍໃນໂຮງຮຽນປະຖົມຊິລເວີເຣລ (Silver Rail Elementary School) ໃນເມືອງເບນ, ລັດອໍຣີກອນຂອງສະຫະລັດ ເມື່ອວັນທີ 15 ຕຸລາ ຕາມເວລາທ້ອງຖິ່ນ ມີລາຍງານຜູ້ເສຍຊີວິດ 4 ລາຍ ປະກອບມີເດັກນ້ອຍ 3 ຄົນ ແລະ ຜູ້ໃຫຍ່ 1 ຄົນ ຂະນະທີ່ຜູ້ຕ້ອງສົງໄສທີ່ກໍ່ເຫດມີອາຍຸປະມານ 15-16 ປີ ກໍເສຍຊີວິດດ້ວຍເຊັ່ນກັນ ຢ່າງໃດກໍຕາມ ຕົວເລກຜູ້ເສຍຊີວິດຍັງເປັນຂໍ້ມູນເບື້ອງຕົ້ນ ແລະ ອາດມີການປ່ຽນແປງໄດ້.

ຕຳຫຼວດເມືອງເບນເປີດເຜີຍວ່າ ໄດ້ຮັບແຈ້ງເຫດຄັ້ງທຳອິດເມື່ອເວລາປະມານ 13:00 ໂມງ ຕາມເວລາທ້ອງຖິ່ນ ຫຼັງຈາກມີລາຍງານວ່າຊາຍຄົນໜຶ່ງໃຊ້ອາວຸດປືນຍິງໃສ່ລົດຍົນຢູ່ບໍລິເວນໂຮງຮຽນ ກ່ອນທີ່ຈະມີຜູ້ໂທແຈ້ງເຫດສຸກເສີນເພີ່ມເຕີມວ່າ ຜູ້ກໍ່ເຫດໄດ້ເຂົ້າໄປໃນອາຄານຮຽນແລ້ວເປີດສາກຍິງ.

ເມື່ອເຈົ້າໜ້າທີ່ຕຳຫຼວດໄປເຖິງ ກໍພົບຜູ້ຕ້ອງສົງໄສຖືກຍິງເສຍຊີວິດຢູ່ພາຍໃນອາຄານໂຮງຮຽນ ແຕ່ໃນຂະນະນີ້ຍັງບໍ່ທັນຊາບແນ່ຊັດວ່າແມ່ນໃຜເປັນຜູ້ຍິງຜູ້ຕ້ອງສົງໄສ ໂດຍມີລາຍງານຜູ້ໄດ້ຮັບບາດເຈັບຫຼາຍຄົນ ແລະ ຢ່າງໜ້ອຍ 2 ຄົນຖືກນຳຕົວສົ່ງໂຮງໝໍ ສ່ວນອາການນັ້ນຍັງບໍ່ມີການເປີດເຜີຍຢ່າງຈະແຈ້ງ.

ຫຼັງຈາກເກີດເຫດ ເຈົ້າໜ້າທີ່ໄດ້ເລ່ງອົບພະຍົບຜູ້ທີ່ຢູ່ພາຍໃນໂຮງຮຽນອອກຈາກອາຄານ ໂດຍກວດສອບຫ້ອງຮຽນເທື່ອລະຫ້ອງ ຂະນະທີ່ສຳນັກງານສືບສວນກາງສະຫະລັດ ຫຼື ເອຟບີໄອ (FBI) ໄດ້ສົ່ງເຈົ້າໜ້າທີ່ເຂົ້າຊ່ວຍເຫຼືອໜ່ວຍງານທ້ອງຖິ່ນໃນການສືບສວນ-ສອບສວນເຫດການໃນຄັ້ງນີ້.

ທາງດ້ານເຂດການສຶກສາເບນ-ລາໄພນ໌ ໄດ້ປະກາດປິດໂຮງຮຽນທຸກແຫ່ງໃນສັງກັດໃນວັນສຸກ ເພື່ອຮັບມືກັບເຫດການສະເທືອນຂວັນດັ່ງກ່າວ ໂດຍເຈົ້າໜ້າທີ່ຍັງຄົງເລ່ງສືບສວນຫາສາເຫດ ແລະ ລາຍລະອຽດເພີ່ມເຕີມຂອງການຍິງກາດໃນຄັ້ງນີ້.

ທີ່ມາ: BBC