ຄິມ ຈອງອຶນ ເດີນທາງໄປຈີນ ຢ້ຽມຊົມຂົວຂ້າມຊາຍແດນຈີນ-ເກົາຫຼີເໜືອ

AD

AD

AD

ທ່ານ ຄິມ ຈອງອຶນ ຜູ້ນຳສູງສຸດຂອງເກົາຫຼີເໜືອ ໄດ້ເດີນທາງໄປເມືອງຕານຕົ່ງ ເມືອງຊາຍແດນຂອງຈີນ ໃນວັນທີ 24 ຕຸລາຜ່ານມາ ໂດຍທ່ານໄດ້ເດີນຂ້າມຂົວແຫ່ງໃໝ່ທີ່ຂ້າມແມ່ນ້ຳຢາລູ ເຊື່ອມຕໍ່ຊາຍແດນລະຫວ່າງຈີນກັບເກົາຫຼີເໜືອ ເຊິ່ງຫາກໍ່ເປີດໃຊ້ງານ. ການເຄື່ອນໄຫວຄັ້ງນີ້ຖືເປັນສັນຍານເຊີງສັນຍະລັກ ທີ່ສະທ້ອນໃຫ້ເຫັນເຖິງຄວາມພະຍາຍາມຂອງລັດຖະບານຈີນ ແລະ ເກົາຫຼີເໜືອ ໃນການຂະຫຍາຍສາຍພົວພັນດ້ານການຄ້າລະຫວ່າງກັນ.

ສຳນັກຂ່າວຊິນຫົວຂອງຈີນລາຍງານວ່າ ທ່ານ ຄິມ ເດີນທາງພ້ອມກັບທ່ານ ຫວັງ ຫູໜິງ ເຈົ້າໜ້າທີ່ລະດັບສູງອັນດັບ 4 ຂອງຈີນ ເຊິ່ງໄດ້ຖ່າຍທອດຄຳທັກທາຍຈາກທ່ານ ສີ ຈິ້ນຜິງ ປະທານປະເທດຈີນ ເຖິງຜູ້ນຳເກົາຫຼີເໜືອ.

ນອກຈາກນີ້ ຜູ້ນຳເກົາຫຼີເໜືອຍັງໄດ້ເຂົ້າຮ່ວມພິທີລະນຶກເພື່ອສະແດງຄວາມເຄົາລົບຕໍ່ທະຫານຂອງກອງທັບອາສາສະໝັກປະຊາຊົນຈີນ (Chinese People’s Volunteer Army) ທີ່ເສຍຊີວິດໃນສົງຄາມເກົາຫຼີ. ທ່ານຍັງໄດ້ເດີນທາງໄປຢ້ຽມຊົມໂຮງງານຜະລິດລົດຍົນ ແລະ ເຂົ້າຮ່ວມການປະຊຸມກັບທ່ານ ຫວັງ ຫູໜິງ.

ຄາດວ່າຂົວແຫ່ງໃໝ່ນີ້ຈະຊ່ວຍອຳນວຍຄວາມສະດວກໃນການຂົນສົ່ງເຄື່ອງຈັກ ແລະ ອຸປະກອນຂະໜາດໃຫຍ່ ວັດຖຸດິບ ລວມເຖິງຜະລິດຕະພັນດ້ານພະລັງງານ ທີ່ເກົາຫຼີເໜືອຕ້ອງການສຳລັບການພັດທະນາປະເທດ. ການເປີດໃຊ້ຂົວຢ່າງເປັນທາງການຈຶ່ງຖືເປັນສັນຍານທີ່ສະທ້ອນວ່າ ສາຍພົວພັນລະຫວ່າງຈີນກັບເກົາຫຼີເໜືອກຳລັງດີຂຶ້ນ ຫຼັງຈາກຜູ້ນຳຂອງທັງສອງປະເທດໄດ້ຈັດການປະຊຸມສຸດຍອດຮ່ວມກັນເຖິງ 2 ຄັ້ງ ໃນໄລຍະ 13 ເດືອນຜ່ານມາ.

ການເດີນທາງໄປຈີນຄັ້ງຫຼ້າສຸດຂອງທ່ານ ຄິມ ຈອງອຶນ ທີ່ມີຂໍ້ມູນຢືນຢັນ ແມ່ນໃນເດືອນກັນຍາ 2025 ເພື່ອເຂົ້າຮ່ວມພິທີສະຫຼອງຄົບຮອບ 80 ປີ ແຫ່ງໄຊຊະນະ ທີ່ກຸງປັກກິ່ງ. ໃນໂອກາດນັ້ນ ທ່ານໄດ້ພົບປະຫາລືສຸດຍອດກັບທ່ານ ສີ ຈິ້ນຜິງ ປະທານປະເທດຈີນ. ຂະນະທີ່ທ່ານ ສີ ຈິ້ນຜິງ ໄດ້ເດີນທາງໄປຢ້ຽມຢາມເກົາຫຼີເໜືອຢ່າງເປັນທາງການໃນເດືອນມິຖຸນາທີ່ຜ່ານມາ.