ແຂວງຊຽງຂວາງ ພົບການລັກລອບຂຸດຄົ້ນແຮ່ຄຳ ຢູ່ຫ້ວຍນໍ້າພານ ເມືອງຄູນ ກັກຕົວໄດ້ 3 ຄົນ
ວັນທີ 10 ຕຸລາ 2026 ໜ່ວຍງານຄະນະສະເພາະກິດ ກອງບັນຊາການທະຫານແຂວງຊຽງຂວາງ, ໄດ້ຮັບແຈ້ງຈາກພົນລະເມືອງດີວ່າ: ຢູ່ຫ້ວຍນໍ້າພານ, ບ້ານຄັງໂຮງ, ເມືອງຄູນ, ແຂວງຊຽງຂວາງ ມີການລັກລອບດຳເນີນການຂຸດຄົ້ນແຮ່ຄຳໂດຍບໍ່ໄດ້ຮັບອະນຸຍາດ ແລະ ບໍ່ຖືກຕ້ອງຕາມລະບຽບກົດໝາຍ. ສະນັ້ນ, ຈຶ່ງໄດ້ນໍາໜ່ວຍງານຄະນະສະເພາະກິດລົງກວດການພື້ນທີ່ຕົວຈິງ.
ຜ່ານການລົງກວດກາຕົວຈິງຢູ່ໃນສະໜາມຂອງໜ່ວຍງານຄະນະສະເພາະກິດ ພົບເຫັນການລັກລອບດຳເນີນການຂຸດຄົ້ນແຮ່ຄຳໂດຍບໍ່ໄດ້ຮັບອະນຸຍາດ ແລະ ບໍ່ຖືກຕ້ອງຕາມລະບຽບກົດໝາຍ ສາມາດກັກຕົວຜູ້ລັກລອບໄດ້ 3 ຄົນ ຄື:
1. ນາງ ແກ້ວ ມະນີ ຢູ່ບ້ານດ່ານຊ້າງ, ເມືອງໄຊທານີ, ນະຄອນຫຼວງວຽງຈັນ (ເປັນເຈົ້າຂອງ).
2. ທ້າວ ວົງ ພອນວິໄລ ຢູ່ບ້ານໜອງພະຍາ, ເມືອງໄຊທານີ, ນະຄອນຫຼວງວຽງຈັນ (ເປັນເຈົ້າຂອງ).
3. ທ້າວ ຫລ້າ ຢູ່ບ້ານ ໂພນສະອາດ, ເມືອງແປກ, ແຂວງຊຽງຂວາງ (ເປັນຜູ້ຊ່ວຍວຽກໃນພາກສະ ໜາມ).
ສາມາດກວດຢຶດອຸປະກອນ ແລະ ເຄື່ອງມືທີ່ໃຊ້ເຂົ້າໃນການຂຸດຄົ້ນແຮ່ທາດ ຄື: ລົດຈົກ 6 ຄັນ, ເຄື່ອງດູດນ້ຳ 5 ເຄື່ອງ, ຕະແກງຮ່ອນຄໍາ 3 ເຄື່ອງ, ລົດຈັກ 1 ຄັນ, ເຄື່ອງປັ່ນໄຟ 1 ເຄື່ອງ ແລະ ເຄື່ອງມືອື່ນໆ ທີ່ນໍາໃຊ້ເຂົ້າໃນການລັກລອບ ຂຸດຄົ້ນແຮ່ທາດ.
ຕໍ່ກັບເຫດການດັ່ງກ່າວ, ໜ່ວຍງານຄະນະສະເພາະກິດ, ກອງບັນຊາການທະຫານແຂວງຊຽງຂວາງ ໄດ້ຢຸດຕິທຸກກິດຈະກຳການຂຸດຄົ້ນໃນທັນທີ, ພ້ອມທັງເຮັດບົດບັນທຶກກວດຢຶດສັບສິນເປັນຂອງກາງ ແລະ ເປັນຫລັກຖານນຳສົ່ງໃຫ້ເຈົ້າໜ້າທີ່ ທີ່ກ່ຽວຂ້ອງ ດຳເນີນຄະດີຕາມລະບຽບກົດໝາຍຢ່າງເຂັ້ມງວດ.
