ອັດຕະປື ຈູດທຳລາຍຊີ້ນສ່ວນສັດປ່າ ພ້ອມປ່ອຍສັດປ່າ ທີ່ຍັງມີຊີວິດຄືນສູ່ທຳມະຊາດ

AD

AD

AD

ກອງກວດກາຊັບພະຍາກອນທຳມະຊາດ ແລະ ສິ່ງແວດລ້ອມ ພະແນກກະສິກຳ ແລະ ສິ່ງແວດລ້ອມແຂວງອັດຕະປື ໄດ້ຈັດພິທີຈູດທຳລາຍຊີ້ນສ່ວນສັດປ່າ ພ້ອມທັງໄດ້ປ່ອຍສັດປ່າ ທີ່ຍັງມີຊີວິດຈໍານວນໜຶ່ງກັບຄືນສູ່ທຳມະຊາດ, ສັດປ່າດັ່ງກ່າວແມ່ນຂອງກາງທີ່ເຈົ້າໜ້າທີ່ຢຶດໄດ້ຈາກປະຊາຊົນ ທີ່ໂຄສະນາຂາຍຜ່ານເຟສບຸກ ແລະ ນຳມາວາງຂາຍຕາມຕະຫຼາດ ຫຼັກ 3 ເມືອງສາມັກຄີໄຊ, ຕະຫຼາດຊາວບ້ານຫາດຊາຍຂາວ ເມືອງໄຊເສດຖາ, ບ້ານສະໝອງໃໝ່ ແລະ ບ້ານມິດສຳພັນ ເມືອງສະໜາມໄຊ.

ສຳລັບສັດປ່າທີ່ຢຶດໄດ້ ມີທັງໝົດ 6 ຊະນິດ ຈໍານວນ 8 ໂຕ, ນ້ຳໜັກລວມ 27 ກິໂລກຣາມ. ໃນນັ້ນ, ສັດທີ່ຍັງມີຊີວິດມີ 3 ໂຕ, ນ້ຳໜັກລວມ 6.1 ກິໂລກຣາມ ປະກອບມີ: ແລນ 2 ໂຕ ນ້ຳໜັກ 2.6 ກິ ໂລກຣາມ ແລະ ຫຼີ່ນ 1 ໂຕ ນ້ຳໜັກ 3.5 ກິໂລກຣາມ, ເຊິ່ງໄດ້ນຳປ່ອຍກັບຄືນສູ່ທຳມະຊາດ. ສໍາລັບຊີ້ນສ່ວນສັດປ່າທີ່ຕາຍແລ້ວມີ 5 ໂຕ, ນ້ຳໜັກລວມ 20.9 ກິໂລກຣາມ, ປະກອບມີ: ເຫງັນ 3 ໂຕ ນ້ຳໜັກ 4.5 ກິໂລກ ຣາມ, ໝູປ່າ ນ້ຳໜັກ 2.4 ກິໂລກຣາມ, ໄກ້ 1 ໂຕ ນ້ຳໜັກ 1 ກິໂລກຣາມ ແລະ ເໝັ້ນ 1 ໂຕ ນ້ຳໜັກ 13 ກິໂລກຣາມ, ໂດຍໄດ້ນຳໄປຈູດທຳລາຍຖິ້ມຕາມລະບຽບການ. ພ້ອມນີ້, ເຈົ້າໜ້າທີ່ຍັງໄດ້ມີການເຮັດບົດບັນທຶກສຶກສາອົບຮົມປະຊາຊົນ ຜູ້ກະທຳຜິດຈຳ ນວນ 7 ຄົນ ເພື່ອສ້າງຄວາມຮັບຮູ້ກ່ຽວກັບການອະນຸລັກສັດປ່າ ແລະ ຊັບພະຍາກອນທຳມະ ຊາດ.

ພິທີຈູດທໍາລາຍ ຊີ້ນສ່ວນສັດປ່າ ແລະ ປ່ອຍສັດປ່າ ທີ່ຍັງມີຊີວິດກັບຄືນສູ່ທໍາມະຊາດ ໄດ້ຈັດຂື້ນໃນວັນທີ 26 ຕຸລາ 2026 ທີ່ວັດກຳມະຖານ, ບ້ານລະຍາວ, ເມືອງສາມັກຄີໄຊ, ໂດຍມີທ່ານ ບຸນລົບ ສີດາວົງ ຫົວ ໜ້າກອງກວດກາຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ພ້ອມດ້ວຍພະ ນັກງານ, ເຈົ້າໜ້າທີ່, ຄະນະປົກຄອງບ້ານລະຍາວ ແລະ ພະສົງວັດກຳມະຖານເຂົ້າຮ່ວມເປັນສັກຂີພິຍານ.

ທັງນີ້ ກໍ່ເພື່ອເປັນການສະແດງເຖິງຄວາມເຂັ້ມງວດໃນການກວດກາ ແລະ ຄວບ ຄຸມການຄ້າສັດປ່າ, ພ້ອມທັງສົ່ງເສີມການອະນຸລັກສັດປ່າ ແລະ ຮັກສາຄວາມສົມດຸນຂອງລະບົບນິເວດ.

ຂ່າວ: ວັດທະນາ