ອີລອນ ມັສກ໌ ເປີດໂຕ Tesla Roadster ລົດໄຟຟ້າສຸດລ້ຳ ສາມາດລອຍຕົວຂຶ້ນຈາກພື້ນໄດ້ໃນໄລຍະສັ້ນ ແລະ ໝຸນຕີລັງກາກາງອາກາດໄດ້.

ສ້າງຄວາມຮືຮາໃນວົງການອຸດສາຫະກຳຍານຍົນ ຫຼັງຈາກ Tesla ເປີດຕົວລົດຍົນໄຟຟ້າໂສມໃໝ່ “Roadster” ທີ່ມາພ້ອມລະບົບຂັບດັນລັກສະນະຄ້າຍຈະຫຼວດ ແລະລະບຸວ່າຈະເລີ່ມຜະລິດລົດຮຸ່ນນີ້ໃນປີ 2028 ຫຼືຫຼັງຈາກທີ່ບໍລິສັດເປີດໂຕລົດຕົ້ນແບບ Roadster ເຈເນີເຣຊັນໃໝ່ເປັນຄັ້ງທຳອິດມາແລ້ວກວ່າ 10 ປີ.

ລົດສະປອດໄຟຟ້າສີຂາວແບບ 2 ບ່ອນນັ່ງຮຸ່ນນີ້ ໄດ້ຮ່ວມພັດທະນາກັບ SpaceX ບໍລິສັດດ້ານອະວະກາດຂອງ Elon Musk. ໃນລະຫວ່າງການສາທິດ Roadster ສາມາດຂັບຂຶ້ນທາງລາດ ແລະສາມາດຢູ່ໃນທ່າ ກັບຫົວ ໄດ້ດ້ວຍລະບົບສ້າງແຮງດູດ ກ່ອນຈະໝຸນຕົວກາງອາກາດ ແລະກັບລົງສູ່ພື້ນດິນ ໂດຍໃຊ້ລະບົບຂັບດັນທີ່ຕິດຕັ້ງຢູ່ພາຍໃນຕົວລົດ.

ຕໍ່ມາ ໃນການເປີດຕົວ ລົດຍັງໃຊ້ລະບົບຂັບດັນເພື່ອ ກະໂດດຂ້າມລົດບັນທຸກ ແລະລົດຄັນອື່ນໆ ພ້ອມກັບໝຸນຕົວກາງອາກາດໃນຂະນະເຄື່ອນທີ່.

ການຮ່ວມມືລະຫວ່າງ Tesla ກັບ SpaceX ເຮັດໃຫ້ຜູ້ຕິດຕາມບາງສ່ວນມອງວ່າ ອາດເປັນອີກສັນຍານໜຶ່ງທີ່ສະທ້ອນເຖິງຄວາມເຊື່ອມໂຍງລະຫວ່າງສອງບໍລິສັດຂະໜາດໃຫຍ່ທີ່ຢູ່ພາຍໃຕ້ການຄວບຄຸມຂອງ Elon Musk ຫຼັງຈາກທີ່ລາວເຄີຍກ່າວເຖິງຂອບເຂດທີ່ທັງສອງບໍລິສັດສາມາດຮ່ວມມືກັນໄດ້.

ດ້ານຈີນ ມັນສະເຕີ (Gene Munster) ຜູ້ຮ່ວມຫຸ້ນສ່ວນຜູ້ຈັດການຂອງ Deepwater Asset Management ເຊິ່ງເປັນນັກລົງທຶນໃນ Tesla ໄດ້ສະແດງຄວາມຄິດເຫັນຜ່ານແພລດຟອມ X ວ່າ ການສາທິດຄັ້ງນີ້ເປັນການສະແດງຄວາມສາມາດດ້ານວິສະວະກຳ ແຕ່ແທບຈະບໍ່ມີມູນຄ່າທາງການຄ້າ ນອກຈາກການສະແດງໃຫ້ເຫັນວ່າ ມີສິ່ງໃດແດ່ທີ່ຜູ້ຜະລິດລົດຍົນແບບດັ້ງເດີມຍັງບໍ່ສາມາດເຮັດໄດ້.

ອີກທັງລາວຍັງເບິ່ງວ່າ ງານເປີດຕົວ Roadster ເປັນອີກຕົວຢ່າງໜຶ່ງທີ່ສະທ້ອນໃຫ້ເຫັນວ່າ ເປັນຫຍັງ Elon Musk ຈຶ່ງສົນໃຈທີ່ຈະນຳ Tesla ແລະ SpaceX ເຂົ້າມາເຊື່ອມໂຍງ ແລະຮ່ວມມືກັນໃຫ້ໃກ້ຊິດຫຼາຍຂຶ້ນ.

ແນວໃດກໍຕາມ Musk ເອງເຄີຍຫຼຸດຄວາມສຳຄັນຂອງ Roadster ຕໍ່ສະຖານະທາງການເງິນຂອງ Tesla ໂດຍໃນປີ 2023 ລາວເອີ້ນລົດຮຸ່ນນີ້ວ່າເປັນເລື່ອງເລັກນ້ອຍ ແລະກ່າວວ່າ ມັນຈະບໍ່ສ້າງຄວາມປ່ຽນແປງຄັ້ງໃຫຍ່ຕໍ່ຖານະການເງິນຂອງບໍລິສັດ.

ເຖິງແມ່ນວ່າຍອດຂາຍຂອງ Roadster ອາດບໍ່ມີນ້ຳໜັກຫຼາຍຕໍ່ທຸລະກິດໂດຍລວມ ແຕ່ລົດຮຸ່ນນີ້ຍັງມີຄວາມສຳຄັນໃນດ້ານພາບລັກຂອງບໍລິສັດ. Seth Goldstein ນັກວິເຄາະຈາກ Morningstar ລະບຸວ່າ ປັດຈຸບັນ Tesla ຍັງບໍ່ມີສິ່ງທີ່ວົງການລົດຍົນເອີ້ນວ່າ “Halo Car” ຫຼືລົດສະມັດຖະນະສູງລະດັບເຮືອທຸງ ທີ່ສ້າງຂຶ້ນເພື່ອສະແດງຂີດຄວາມສາມາດສູງສຸດດ້ານວິສະວະກຳ ແລະເຕັກໂນໂລຊີຂອງຜູ້ຜະລິດ.

ສະເປັກເບື້ອງຕົ້ນຂອງ Tesla Roadster

Lars Moravy ຫົວໜ້າຝ່າຍວິສະວະກຳຍານຍົນຂອງ Tesla ເປີດເຜີຍວ່າ Roadster ສາມາດເລັ່ງຄວາມໄວຈາກ 0–60 ໄມຕໍ່ຊົ່ວໂມງ ຫຼືປະມານ 97 ກິໂລແມັດຕໍ່ຊົ່ວໂມງ ໄດ້ໃນເວລາບໍ່ຮອດ 1 ວິນາທີ.

ສ່ວນຄວາມໄວສູງສຸດຢູ່ທີ່ຫຼາຍກວ່າ 230 ໄມຕໍ່ຊົ່ວໂມງ ຫຼືປະມານ 370 ກິໂລແມັດຕໍ່ຊົ່ວໂມງ. ແນວໃດກໍຕາມ Elon Musk ກ່າວເສີມດ້ວຍຄວາມຕື່ນເຕັ້ນວ່າ ລົດຄັນນີ້ນ່າຈະເຮັດຄວາມໄວໄດ້ສູງກວ່ານັ້ນຫຼາຍ ພ້ອມກ່າວວ່າ Roadster ຕ້ອງເຮັດຄວາມໄວໃຫ້ໄດ້ເຖິງເຄິ່ງໜຶ່ງຂອງຄວາມໄວສຽງ.

Roadster ຍັງສາມາດແລ່ນໄດ້ໄກກວ່າ 300 ໄມ ຫຼືປະມານ 480 ກິໂລແມັດ ຕໍ່ການສາກໄຟໜຶ່ງຄັ້ງ. ແນວໃດກໍຕາມ ຕົວເລກນີ້ຍັງຕ່ຳກວ່າທີ່ Musk ເຄີຍກ່າວໄວ້ໃນປີ 2017 ຫຼາຍກວ່າເຄິ່ງໜຶ່ງ.

ໃນຄັ້ງນັ້ນ Tesla ໄດ້ເປີດຕົວລົດຕົ້ນແບບ Roadster ເຈເນີເຣຊັນທີ 2 ແລະເຄີຍປະກາດວ່າຈະເລີ່ມສົ່ງມອບລົດໃນປີ 2020 ແຕ່ກຳນົດການດັ່ງກ່າວກໍຖືກເລື່ອນອອກໄປຫຼາຍປີ.

Tesla Roadster ໃຊ້ຖັງອາກາດແຮງດັນສູງ ເພື່ອປ່ອຍອາກາດຜ່ານຫົວສີດຫຼາຍຈຸດ ສ້າງແຮງຜັກດັນທີ່ມີລັກສະນະຄ້າຍກັບລະບົບຄວບຄຸມທິດທາງຂອງຈະຫຼວດ. ຂະນະດຽວກັນ ພັດລົມທີ່ຕິດຕັ້ງຢູ່ໃຕ້ທ້ອງລົດຊ່ວຍສ້າງແຮງດູດ ເຮັດໃຫ້ລົດຍຶດເກາະພື້ນໄດ້ດີກວ່າລົດທົ່ວໄປ. ລະບົບທັງສອງນີ້ຊ່ວຍໃຫ້ Roadster ສາມາດຍົກຕົວຂຶ້ນ, ກະໂດດ, ໝຸນຕົວກາງອາກາດ ແລະກັບລົງຈອດໄດ້.

ພັດລົມຈະສ້າງແຮງດູດໃຫ້ລົດຖືກກົດເຂົ້າຫາພື້ນຜິວ ຊ່ວຍເພີ່ມແຮງຍຶດເກາະໃນຂະນະທີ່ລົດເຄື່ອນທີ່ເທິງທາງລາດໃນທ່າກັບຫົວ. ທັງນີ້ ຕ້ອງອາໄສການອອກແບບພື້ນຜິວ ແລະລະບົບຄວບຄຸມທີ່ເໝາະສົມ.

ຈາກນັ້ນ ລົດຈະໃຊ້ຖັງອາກາດແຮງດັນສູງ ແລະຫົວສີດທີ່ຕິດຕັ້ງໄວ້ຫຼາຍຕຳແໜ່ງ ເພື່ອສ້າງແຮງຂັບ ແລະຄວບຄຸມທິດທາງ. ດັ່ງນັ້ນ ການຍົກຕົວລົດຂຶ້ນຈາກພື້ນຈຶ່ງບໍ່ໄດ້ອາໄສພຽງແຕ່ມໍເຕີທີ່ຂັບເຄື່ອນລໍ້ເທົ່ານັ້ນ.