ເຫດສະຫຼົດໃຈ! ຊາຍອາຍຸ 71 ປີ ຈາກລັດຟລໍຣິດາ ຖືກອາລິເກເຕີຍາວ 3.6 ແມັດ ໂຈມຕີ ແລະລາກລົງນ້ຳຈົນເສຍຊີວິດ ຂະນະທີ່ກຳລັງຢືນຕຶກເບັດຢູ່ແຄມທະເລສາບ.
ຊາຍອາຍຸ 71 ປີ ເສຍຊີວິດຫຼັງຖືກແຂ້ອາລິເກເຕີ (Alligator) ຂະໜາດໃຫຍ່ ຄວາມຍາວເກືອບ 3.6 ແມັດ ໂຈມຕີແລະລາກລົງນ້ຳ ຂະນະທີ່ລາວກຳລັງຢືນຕຶກເບັດຢູ່ແຄມທະເລສາບອາປອບກາ (Lake Apopka) ໃນລັດຟລໍຣິດາ ສະຫະລັດອາເມລິກາ.ເຫດການນີ້ຖືເປັນກໍລະນີທີ 2 ຂອງລັດຟລໍຣິດາໃນປີນີ້ ທີ່ມີຜູ້ເສຍຊີວິດຈາກການຖືກແຂ້ອາລິເກເຕີໂຈມຕີ. ເຈົ້າໜ້າທີ່ໄດ້ຈັບແລະຂ້າແຂ້ທີ່ກໍ່ເຫດແລ້ວ ພ້ອມທັງເຕືອນປະຊາຊົນໃຫ້ເພີ່ມຄວາມລະມັດລະວັງ. ເຫດສະຫຼົດເກີດຂຶ້ນຂະນະຢືນຕຶກເບັດເຈົ້າໜ້າທີ່ລັດຟລໍຣິດາເປີດເຜີຍວ່າ ທ້າວ ສຕີເວັນ ແຮມິລຕັນ (Steven Hamilton) ອາຍຸ 71 ປີ ຈາກເມືອງວິນເຕີກາເດັນ ເສຍຊີວິດຫຼັງຖືກແຂ້ອາລິເກເຕີໂຈມຕີ ຂະນະທີ່ກຳລັງຕົກປາຢູ່ແຄມແຫຼ່ງນ້ຳພາຍໃນສວນສາທາລະນະ ດຣ. ແບຣດຟອດ ເມໂມຣຽວ (Dr. Bradford Memorial Park) ໃນເວລາປະມານ 17:00 ໂມງ ຂອງວັນທີ 16 ຕຸລາ ຕາມເວລາທ້ອງຖິ່ນ.ສວນສາທາລະນະແຫ່ງນີ້ຕັ້ງຢູ່ແຄມທະເລສາບອາປອບກາ ຫ່າງຈາກເມືອງອໍແລນໂດ (Orlando) ໄປທາງຕາເວັນຕົກສຽງເໜືອປະມານ 24 ກິໂລແມັດ.
ເຈົ້າໜ້າທີ່ຄະນະກຳມະການອະນຸລັກປາ ແລະ ສັດປ່າລັດຟລໍຣິດາລະບຸວ່າ ແຮມິລຕັນໄດ້ຮັບບາດເຈັບສາຫັດ ແລະ ເສຍຊີວິດໃນຈຸດເກີດເຫດ. ລາຍງານລະບຸວ່າ ອາລິເກເຕີໂຕດັ່ງກ່າວມີຄວາມຍາວ 11 ຟຸດ 8 ນິ້ວ ຫຼືປະມານ 3.56 ແມັດ ແລະໄດ້ລາກຮ່າງຂອງແຮມິລຕັນລົງໄປໃນນ້ຳ.ເຈົ້າໜ້າທີ່ດັບເພີງຕ້ອງໃຊ້ເວລາປະມານ 2 ຊົ່ວໂມງ ຈຶ່ງສາມາດນຳຮ່າງຂອງລາວຂຶ້ນມາຈາກນ້ຳໄດ້ ເນື່ອງຈາກຍັງມີແຂ້ອາລິເກເຕີໂຕອື່ນໆຢູ່ໃນບໍລິເວນນັ້ນ ເຮັດໃຫ້ການຊ່ວຍເຫຼືອເປັນໄປຢ່າງຫຍຸ້ງຍາກ.
ເຈົ້າໜ້າທີ່ຈັບ ແລະ ຂ້າອາລິເກເຕີທີ່ກໍ່ເຫດຕຳຫຼວດລະບຸວ່າ ເຈົ້າໜ້າທີ່ຈັບສັດໄດ້ເຂົ້າດຳເນີນການຈັບອາລິເກເຕີທີ່ກໍ່ເຫດຂຶ້ນມາ ແລະ ຂ້າມັນແລ້ວ. ເຈົ້າໜ້າທີ່ຄາດວ່າ ອາລິເກເຕີໂຕນີ້ອາດມາຈາກທະເລສາບອາປອບກາທີ່ຢູ່ໃກ້ຄຽງ. ທ່ານ ໄມເຄິລ ເມສັນ (Michael Mason) ນາຍຕຳຫຼວດຂັ້ນກັບຕັນຂອງສະຖານີຕຳຫຼວດວິນເຕີກາເດັນ ກ່າວວ່າ ທະເລສາບແຫ່ງນີ້ມີແຂ້ອາລິເກເຕີອາໄສຢູ່ຈຳນວນຫຼາຍ ດັ່ງນັ້ນ ການພົບເຫັນສັດຊະນິດນີ້ໃນບໍລິເວນດັ່ງກ່າວຈຶ່ງບໍ່ແມ່ນເລື່ອງແປກ.ເມສັນເຕືອນປະຊາຊົນໃຫ້ສັງເກດສະພາບແວດລ້ອມຮອບຕົວ ເຄົາລົບສັດປ່າ ແລະຮັກສາໄລຍະຫ່າງຢ່າງເໝາະສົມ.
ເຖິງແມ່ນວ່າ ອາລິເກເຕີຈະເບິ່ງຄືວ່າຄຸ້ນເຄີຍກັບມະນຸດ ແຕ່ມັນກໍສາມາດເປັນອັນຕະລາຍເຖິງຊີວິດໄດ້. ເຫດຜູ້ເສຍຊີວິດອີກລາຍໃນລັດຟລໍຣິດາເຫດການນີ້ເປັນການໂຈມຕີທີ່ມີຜູ້ເສຍຊີວິດຈາກແຂ້ອາລິເກເຕີໃນລັດຟລໍຣິດາເປັນລາຍທີ 2 ນັບຕັ້ງແຕ່ວັນທີ 28 ມິຖຸນາທີ່ຜ່ານມາ. ກ່ອນໜ້ານີ້ ນາງ ບຣິດທານີ ຄລາກ (Brittany Clark) ອາຍຸ 31 ປີ ຈາກເມືອງອໍແລນໂດ ເສຍຊີວິດຈາກການຖືກແຂ້ອາລິເກເຕີໂຈມຕີຢູ່ບໍລິເວນແມ່ນ້ຳອີຄອນລັອກຮາດຊີ (Econlockhatchee River) ໃກ້ເມືອງໂອວີໂດ ທາງຕາເວັນອອກສຽງເໜືອຂອງອໍແລນໂດ.ລາຍງານລະບຸວ່າ ໃນເວລາເກີດເຫດ ຄລາກກຳລັງຄຸເຂົ່າຢູ່ໃນນ້ຳທີ່ມີຄວາມເລິກປະມານ 90 ຊັງຕີແມັດ. ແຟນໜຸ່ມຂອງນາງສາມາດຊ່ວຍດຶງນາງອອກຈາກປາກຂອງແຂ້ໄດ້ ແຕ່ນາງໄດ້ຮັບບາດເຈັບຮຸນແຮງ ໂດຍແຂນຂ້າງໜຶ່ງຖືກກັດຂາດ ສ່ວນແຂນອີກຂ້າງກໍໄດ້ຮັບບາດເຈັບສາຫັດ. ຕໍ່ມານາງໄດ້ເສຍຊີວິດລະຫວ່າງການນຳສົ່ງໂຮງໝໍ.ຫຼັງເຫດການ ເຈົ້າໜ້າທີ່ໄດ້ຈັບ ແລະ ຂ້າອາລິເກເຕີທີ່ມີຄວາມຍາວປະມານ 4 ແມັດ ຢູ່ຈຸດເກີດເຫດ ແລະຍັງຈັບແຂ້ອີກໂຕໜຶ່ງທີ່ມີຄວາມຍາວປະມານ 3.8 ແມັດ ໄດ້ໃນຈຸດທີ່ຫ່າງອອກໄປປະມານ 800 ແມັດ.
ສະຖິຕິການໂຈມຕີຂອງໂຕອາລິເກເຕີໃນລັດຟລໍຣິດາຂໍ້ມູນຈາກຄະນະກຳມະການອະນຸລັກປາແລະສັດປ່າລັດຟລໍຣິດາລະບຸວ່າ ໃນປີ 2025 ລັດຟລໍຣິດາມີເຫດແຂ້ອາລິເກເຕີໂຈມຕີມະນຸດ 13 ຄັ້ງ ໃນນັ້ນເປັນການໂຈມຕີຮຸນແຮງ 8 ຄັ້ງ ແລະບໍ່ຮຸນແຮງ 5 ຄັ້ງ ໂດຍມີຜູ້ເສຍຊີວິດ 2 ຄົນ.ໂດຍທົ່ວໄປ ລັດຟລໍຣິດາມີລາຍງານເຫດແຂ້ອາລິເກເຕີໂຈມຕີມະນຸດປະມານ 12 ຄັ້ງຕໍ່ປີ. ແຕ່ໃນປີ 2023 ມີລາຍງານການໂຈມຕີເຖິງ 23 ຄັ້ງ ແລະມີຜູ້ເສຍຊີວິດ 2 ຄົນ.ເຖິງແມ່ນວ່າລັດຟລໍຣິດາຈະມີແຂ້ອາລິເກເຕີຫຼາຍກວ່າ 1 ລ້ານໂຕ ແຕ່ເຫດການໂຈມຕີມະນຸດກໍຍັງຖືວ່າເກີດຂຶ້ນບໍ່ບ່ອຍ. ຕາມຂໍ້ມູນຂອງໜ່ວຍງານສັດປ່າປະຈຳລັດ ນັບຕັ້ງແຕ່ປີ 1948 ມີຜູ້ເສຍຊີວິດຈາກການຖືກແຂ້ອາລິເກເຕີໂຈມຕີໃນລັດຟລໍຣິດາລວມ 34 ຄົນ ລວມທັງເຫດການລ່າສຸດໃນປີນີ້.
ທີ່ມາ: The Associated Press
