ບາຣັກ ໂອບາມາວິຈານລັດຖະບານທຣຳ ປະເດັນສົງຄາມອີຣ່ານ ແລະ ຄ່າຄອງຊີບສູງ ຂະນະທັງສອງພັກເລັ່ງຫາສຽງກ່ອນເລືອກຕັ້ງກາງສະໄໝ

AD

AD

AD

ບາຣັກ ໂອບາມາ ອະດີດປະທານາທິບໍດີສະຫະລັດ ໄດ້ວິຈານລັດຖະບານທຣຳ ກ່ຽວກັບສົງຄາມອີຣ່ານ ແລະລາຄາສິນຄ້າອຸປະໂພກບໍລິໂພກທີ່ສູງຂຶ້ນ ຂະນະທີ່ລົງພື້ນທີ່ຫາສຽງຊ່ວຍພັກເດໂມແຄຣັດ ກ່ອນການເລືອກຕັ້ງກາງສະໄໝຂອງສະຫະລັດ.

ທ່ານ ບາຣັກ ໂອບາມາ ກ່າວວ່າ ການເລືອກຕັ້ງກາງສະໄໝຂອງສະຫະລັດ ເປັນ “ໂອກາດສຳຄັນຄັ້ງສຸດທ້າຍ” ໃນການຢັບຢັ້ງການດຳເນີນງານຂອງລັດຖະບານທຣຳ

ບາຣັກ ໂອບາມາ ລົງພື້ນທີ່ຊ່ວຍພັກເດໂມແຄຣັດຫາສຽງ ກ່ອນການເລືອກຕັ້ງກາງສະໄໝ ໂດຍກ່າວວິຈານ ໂດນັລ ທຣຳ ຢ່າງຮຸນແຮງ ທັງໃນປະເດັນຄ່າຄອງຊີບ, ສົງຄາມອີຣ່ານ ແລະໂຄສະນາຫາສຽງທີ່ກາຍເປັນກະແສວິພາກວິຈານ.

ສຳນັກຂ່າວຕ່າງປະເທດລາຍງານວ່າ ບາຣັກ ໂອບາມາ ອະດີດປະທານາທິບໍດີສະຫະລັດ ໄດ້ລົງພື້ນທີ່ລັດໂອໄຮໂອ ແລະລັດມິຊິແກນ ໃນວັນເສົາທີ 24 ຕຸລາ 2026 ຜ່ານມາ ເພື່ອຊ່ວຍພັກເດໂມແຄຣັດຫາສຽງ ສຳລັບການເລືອກຕັ້ງກາງສະໄໝ ທີ່ຈະຈັດຂຶ້ນໃນວັນທີ 3 ພະຈິກນີ້ ເພື່ອຕັດສິນວ່າພັກໃດຈະໄດ້ຄອງສຽງຂ້າງຫຼາຍໃນສະພາຄອງເກຣສ.

ໃນລະຫວ່າງການປາໄສຫາສຽງ ໂອບາມາໄດ້ວິຈານທຣຳຢ່າງຮຸນແຮງ ທັງປະເດັນຄ່າຄອງຊີບ ແລະ ລາຄາສິນຄ້າທີ່ສູງຂຶ້ນ, ຜົນກະທົບຈາກສົງຄາມອີຣ່ານ, ການປັບປຸງຕົກແຕ່ງທຳນຽບຂາວ ລວມເຖິງການທີ່ພັກຣີພັບລິກັນເຜີຍແຜ່ໂຄສະນາຫາສຽງໂຈມຕີປະເດັນໃນອະດີດຂອງ ເອມີ ແອັກຕັນ ຜູ້ສະໝັກຈາກພັກເດໂມແຄຣັດ ເພື່ອຊິງຕຳແໜ່ງຜູ້ວ່າການລັດໂອໄຮໂອ.

ໂອບາມາກ່າວວ່າ: “ການເລືອກຕັ້ງຄັ້ງນີ້ແມ່ນໂອກາດສຸດທ້າຍທີ່ດີທີ່ສຸດຂອງພວກເຮົາ ໃນການຢັບຢັ້ງການດຳເນີນງານທີ່ຂາດຄວາມວິຈາລະນະຍານຂອງລັດຖະບານຊຸດນີ້.”

ອະດີດປະທານາທິບໍດີກ່າວຕໍ່ວ່າ: “ຫຼັງຈາກສອງປີທີ່ເຕັມໄປດ້ວຍຄວາມວຸ້ນວາຍ, ຄວາມໃຈຮ້າຍໂຫດຮ້າຍ, ການສໍ້ລາດບັງຫຼວງ ແລະຄວາມບໍ່ມີປະສິດທິພາບ ໃນລະດັບທີ່ບໍ່ເຄີຍປາກົດມາກ່ອນໃນຍຸກສະໄໝໃໝ່ ນີ້ຄືໂອກາດທີ່ພວກທ່ານຈະໄດ້ກ່າວວ່າ ‘ພໍໄດ້ແລ້ວ, ມັນຕ້ອງພໍຈັກເທື່ອ!’”

ໂອບາມາຍັງກ່າວວິຈານຕໍ່ວ່າ: “ຖ້າທ່ານຄິດວ່າ ກ່ອນທີ່ ‘ຄົນທີ່ທ່ານກໍຮູ້ວ່າແມ່ນໃຜ’ ໂດຍບໍ່ໄດ້ກ່າວເຖິງຊື່ ຈະເຂົ້າມາ ທຸກຢ່າງກໍແພງເກີນໄປແລ້ວ ແຕ່ຕອນນີ້ທຸກຢ່າງກັບແພງຂຶ້ນກວ່າເກົ່າອີກ.” ຈາກນັ້ນ ໂອບາມາຍັງໄດ້ກ່າວປະຊົດປະຊັນການຕົກແຕ່ງທຳນຽບຂາວຂອງທຣຳ ໂດຍຖາມວ່າ ການໃຊ້ສີຄຳຈຳນວນຫຼາຍນັ້ນແມ່ນຫຍັງ ແລະກ່າວວ່າ ທຣຳໄດ້ຕົກແຕ່ງທຳນຽບຂາວຈົນເບິ່ງຄືກັບວ່າ ຊັດດຳ ຮຸສເຊນ ອະດີດຜູ້ນຳອີຣັກ ມາເປີດຮ້ານຂາຍຊີສເຄັກ Cheesecake Factory.

ນອກຈາກນີ້ ໂອບາມາຍັງກ່າວວິຈານ ວິເວກ ຣາມາສະວາມີ ທີ່ເຜີຍແຜ່ໂຄສະນາຊຶ່ງມີແມ່ຂອງ ເອມີ ແອັກຕັນ ຜູ້ສະໝັກຊິງຕຳແໜ່ງຜູ້ວ່າການລັດໂອໄຮໂອ ອອກມາກ່າວຕຳໜິລູກສາວວ່າເປັນຄົນຕົວະຕົ້ມ. ແຕ່ໂຄສະນາດັ່ງກ່າວບໍ່ໄດ້ລະບຸວ່າ ສາມີໃໝ່ຂອງແມ່ເຄີຍຖືກຕັ້ງຂໍ້ກ່າວຫາວ່າຂົ່ມຂືນແອັກຕັນໃນຕອນທີ່ນາງຍັງເປັນເດັກ ແລະທັງສອງຝ່າຍກໍໄດ້ຕັດຂາດຄວາມສຳພັນກັນມາເປັນເວລາດົນນານແລ້ວ.

ການເລືອກຕັ້ງກາງສະໄໝຂອງສະຫະລັດແມ່ນຫຍັງ? ຄູ່ມືອະທິບາຍແບບເຂົ້າໃຈງ່າຍ

ໃຜຈະເປັນຝ່າຍຊະນະໃນການເລືອກຕັ້ງກາງສະໄໝ?

ທ່ານ ທຣຳ ໄດ້ໄປໃຊ້ສິດປ່ອນບັດທີ່ເມືອງເວສປາມບີຊ ລັດຟລໍຣິດາ ໃນວັນເສົາ ກ່ອນຈະເດີນທາງໄປສະແດງການສະໜັບສະໜູນ ໄມຄ໌ ຄອລລິນສ໌ ຜູ້ສະໝັກຈາກພັກຣີພັບລິກັນ ທີ່ລັດຈໍເຈຍ.

ໃນວັນດຽວກັນ ໂດນັລ ທຣຳ ປະທານາທິບໍດີສະຫະລັດ ກໍໄດ້ຂຶ້ນເວທີປາໄສຫາສຽງທີ່ລັດຈໍເຈຍ ເພື່ອຊູນະໂຍບາຍດ້ານການເຂົ້າເມືອງ ແລະພາສີສິນຄ້າ ພ້ອມທັງໃຫ້ຄຳໝັ້ນສັນຍາກ່ຽວກັບມາດຕະການແຈກເງິນ ຖ້າພັກຣີພັບລິກັນຊະນະການເລືອກຕັ້ງ.

ທຣຳກ່າວວ່າ “ພວກເຮົາກຳລັງຢູ່ໃນຍຸກທອງຄຳຂອງອາເມລິກາ” ພ້ອມທັງຍອມຮັບວ່າ ລາຄານ້ຳມັນກຳລັງ “ສູງຂຶ້ນຊົ່ວຄາວ” ແຕ່ກ່າວວ່າ “ປະເທດຂອງພວກເຮົາກຳລັງເຂັ້ມແຂງຂຶ້ນເລື້ອຍໆ ແລະລາຄານ້ຳມັນຕາມປ້ຳກໍກຳລັງຈະຫຼຸດລົງ” ພ້ອມກ່າວເສີມວ່າ “ພວກເຮົາກຳລັງເກັບລາຍຮັບຈຳນວນມະຫາສານຈາກພາສີສິນຄ້າ”.

ທຣຳຢືນຢັນຄຳໝັ້ນສັນຍາອີກຄັ້ງວ່າ ຈະຈ່າຍເງິນ 5,000 ໂດລາສະຫະລັດ ໃຫ້ແກ່ຊາວອາເມລິກາທີ່ເປັນຜູ້ໃຫຍ່ທຸກຄົນ ຖ້າພັກຣີພັບລິກັນສາມາດຄອງສຽງຂ້າງຫຼາຍໃນທັງສອງສະພາ.

ນອກຈາກນີ້ ລາວຍັງກ່າວຫາພັກເດໂມແຄຣັດວ່າ ຈະ “ປຸ້ນເອົາຊັບສິນຂອງທ່ານ” ແລະ “ທຳລາຍຊາຍແດນຂອງທ່ານຈົນສິ້ນຊາກ”. ທຣຳລະບຸວ່າ ພັກເດໂມແຄຣັດພະຍາຍາມເປີດຮັບຜູ້ອົບພະຍົບຈາກປະເທດທີ່ມີການກໍ່ການຮ້າຍຢ່າງແຜ່ຫຼາຍ ພ້ອມທັງເລົ່າຍ້ອນເຖິງການປະຊຸມກັບສະມາຊິກວຸດທິສະພາໃນຄັ້ງກ່ອນ.

ທຣຳກ່າວວ່າ: “ຂ້ອຍໄດ້ບອກພວກເຂົາວ່າ ‘ເປັນຫຍັງພວກເຮົາຈຶ່ງຕ້ອງຮັບຄົນຈາກປະເທດທີ່ບໍ່ມີປະສິດທິພາບເຫຼົ່ານັ້ນຢູ່ສະເໝີ? ເປັນຫຍັງຈຶ່ງບໍ່ຮັບຄົນຈາກປະເທດຢ່າງເຊັ່ນ: ນໍເວ, ສະວີເດັນ ຫຼື ເດນມາກແທນ?’”

ທຣຳຍັງຢືນຢັນວ່າ ລາວຈັດການກັບສົງຄາມອີຣ່ານ “ໄດ້ຢ່າງມີປະສິດທິຜົນ” ພ້ອມກ່າວເສີມວ່າ “ຂ້ອຍອາດຈະຕ້ອງດຳເນີນການຂັ້ນເດັດຂາດເພື່ອຍຸດຕິສົງຄາມ ຫຼືບາງທີພວກເຂົາອາດຈະຍອມເຮັດຂໍ້ຕົກລົງ ແຕ່ຂ້ອຍກໍຍັງບໍ່ແນ່ໃຈ. ບໍ່ວ່າຈະເປັນທາງໃດ ພວກເຮົາກໍເປັນຝ່າຍຊະນະ.”

ທີ່ມາ: BBC