ລາຄານ້ຳມັນໂລກປັບຕົວຫຼຸດລົງ ຫຼັງຂຶ້ນໃກ້ລະດັບສູງສຸດໃນຮອບ 6 ເດືອນ

AD

AD

AD

ລາຄານ້ຳມັນໂລກປັບຕົວຫຼຸດລົງໃນວັນຈັນ ຫຼັງຈາກພຸ່ງຂຶ້ນໃກ້ລະດັບສູງສຸດໃນຮອບເກືອບ 6 ເດືອນ ໃນຊ່ວງທ້າຍອາທິດຜ່ານມາ ເຖິງແມ່ນວ່າກຸ່ມຮູຕີຍັງຄົງໂຈມຕີຊາອຸດິອາຣະເບຍຢ່າງຕໍ່ເນື່ອງ ເຮັດໃຫ້ເກີດຄວາມກັງວົນຕໍ່ການສະໜອງພະລັງງານຂອງໂລກ

ລາຄານ້ຳມັນໂລກປັບຕົວຫຼຸດລົງໃນວັນຈັນທີ 26 ຕຸລາ ຫຼັງຈາກພຸ່ງຂຶ້ນໃກ້ລະດັບສູງສຸດໃນຮອບເກືອບ 6 ເດືອນ ໃນຊ່ວງທ້າຍອາທິດກ່ອນໜ້ານີ້. ແນວໃດກໍຕາມ ຄວາມກັງວົນກ່ຽວກັບການສະໜອງນ້ຳມັນຍັງຄົງມີຢູ່ ຫຼັງຈາກກຸ່ມຮູຕີເດີນໜ້າໂຈມຕີຊາອຸດິອາຣະເບຍ ເຊິ່ງເປັນໜຶ່ງໃນປະເທດຜູ້ສົ່ງອອກນ້ຳມັນລາຍໃຫຍ່ຂອງໂລກ

ຂໍ້ມູນໃນເວລາ 00:18 ໂມງ ຕາມເວລາມາດຕະຖານກຣີນິດ (GMT) ລາຄາສັນຍານ້ຳມັນດິບເວສເທັກຊັສ (WTI) ຂອງສະຫະລັດ ຫຼຸດລົງ 1.60 ໂດລາ ຫຼື 1.55% ມາຢູ່ທີ່ 101.67 ໂດລາຕໍ່ບາເຣວ ຂະນະທີ່ລາຄານ້ຳມັນດິບເບຣນ (Brent) ຫຼຸດລົງ 1.56 ໂດລາ ຫຼື 1.34% ມາຢູ່ທີ່ 115.16 ໂດລາຕໍ່ບາເຣວ

ກ່ອນໜ້ານີ້ ລາຄານ້ຳມັນໄດ້ປິດຕະຫຼາດໃນວັນສຸກໂດຍເພີ່ມຂຶ້ນເກືອບ 3 ໂດລາຕໍ່ບາເຣວ ຫຼັງຈາກກຸ່ມຮູຕີໂຈມຕີເປົ້າໝາຍຫຼາຍແຫ່ງໃນຊາອຸດິອາຣະເບຍ ສົ່ງຜົນໃຫ້ຕະຫຼາດກັງວົນວ່າຄວາມຂັດແຍ່ງອາດສົ່ງຜົນກະທົບຕໍ່ການຈັດຫາພະລັງງານ. ຕະຫຼອດອາທິດຜ່ານມາ ລາຄານ້ຳມັນເບຣນເພີ່ມຂຶ້ນ 6% ສ່ວນນ້ຳມັນ WTI ເພີ່ມຂຶ້ນ 2.3%

ສະຖານະການຍັງຄົງຕຶງຄຽດຕໍ່ເນື່ອງໃນຊ່ວງທ້າຍອາທິດຜ່ານມາ ໂດຍກຸ່ມຮູຕີລະບຸວ່າ ໄດ້ໂຈມຕີສະໜາມບິນ ແລະ ສະຖານປະກອບການດ້ານນ້ຳມັນຂອງຊາອຸດິອາຣະເບຍໃນວັນເສົາ ຂະນະທີ່ທາງການຊາອຸດິອາຣະເບຍເປີດເຜີຍໃນວັນອາທິດວ່າ ສາມາດສະກັດກັ້ນຂີປະນາວຸດ ແລະ ໂດຣນໄດ້ເພີ່ມເຕີມ

ຫຼ້າສຸດ ຊາອຸດິອາຣະເບຍໄດ້ກັບມາເປີດດຳເນີນງານບາງສ່ວນທີ່ສະໜາມບິນຫຼັກໃນວັນອາທິດ ຫຼັງຈາກໄດ້ຮັບຄວາມເສຍຫາຍຈາກການໂຈມຕີລະລອກກ່ອນໜ້ານີ້. ແນວໃດກໍຕາມ ກຸ່ມຮູຕີປະກາດວ່າ ຈະຍັງຄົງແນເປົ້າໂຈມຕີສະໜາມບິນດັ່ງກ່າວຕໍ່ໄປ ເຮັດໃຫ້ຕະຫຼາດຍັງຕ້ອງຈັບຕາຄວາມສ່ຽງຕໍ່ການສະໜອງນ້ຳມັນ ແລະ ພະລັງງານໃນໄລຍະຕໍ່ໄປ

ທີ່ມາ: Channel News Asia