ພາຍຸໂບເອໂລ ແລະ ອອສເຕນ ພັດຖະຫຼົ່ມເອີຣົບ ເຮັດໃຫ້ມີຜູ້ເສຍຊີວິດ 1 ຄົນ, ໄຟຟ້າດັບກວ່າ 150,000 ຄົວເຮືອນ, ຖ້ຽວບິນ ແລະ ເຄືອຂ່າຍໂທລະສັບ.

AD

AD

AD

ພາຍຸຮຸນແຮງໄດ້ພັດເຂົ້າຖະຫຼົ່ມພາກເໜືອຂອງເອີຣົບ ໃນວັນອາທິດທີ 25 ຕຸລາ ຕາມເວລາທ້ອງຖິ່ນ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 1 ຄົນ, ມີຫຼາຍກວ່າ 150,000 ຄົວເຮືອນບໍ່ມີໄຟຟ້າໃຊ້ ພ້ອມທັງເກີດຄວາມປັ່ນປ່ວນໃນການເດີນທາງ ແລະ ເຄືອຂ່າຍໂທລະສັບ. ພາຍຸໂບເອໂລ ແລະ ພາຍຸອອສເຕນ ໄດ້ພັດເຂົ້າຖະຫຼົ່ມພື້ນທີ່ຕ່າງໆ ຫ່າງກັນບໍ່ເຖິງ 24 ຊົ່ວໂມງ.

ມີລາຍງານວ່າ ຊາຍຄົນໜຶ່ງເສຍຊີວິດໃນເຂດທາງຕາເວັນຕົກສຽງໃຕ້ຂອງສະກັອດແລນ ຫຼັງຈາກຖືກຕົ້ນໄມ້ຫັກລົ້ມທັບ. ຂະນະທີ່ເມືອງລີລ ທາງພາກເໜືອຂອງຝຣັ່ງ ມີນັກແລ່ນຄົນໜຶ່ງໄດ້ຮັບບາດເຈັບເລັກນ້ອຍ ຈາກຕົ້ນໄມ້ທີ່ຖືກລົມພັດຫັກລົ້ມໃກ້ຈຸດເລີ່ມຕົ້ນການແຂ່ງຂັນແລ່ນມາຣາທອນ ເຊິ່ງຈັດຂຶ້ນເປັນຄັ້ງທຳອິດໃນຮອບ 31 ປີ.

ໜ່ວຍງານທີ່ກ່ຽວຂ້ອງລາຍງານວ່າ ພາຍໃນໄລຍະເວລາ 24 ຊົ່ວໂມງ ມີຄົວເຮືອນໃນສະຫະລາຊະອານາຈັກຫຼາຍກວ່າ 82,000 ຄົວເຮືອນ, ໃນຝຣັ່ງເກືອບ 60,000 ຄົວເຮືອນ ແລະ ໃນເຢຍລະມັນຢ່າງໜ້ອຍ 10,000 ຄົວເຮືອນ ໄດ້ຮັບຜົນກະທົບຈາກໄຟຟ້າດັບ. ຂະນະດຽວກັນ ສະມາຄົມເຄືອຂ່າຍພະລັງງານຂອງສະຫະລາຊະອານາຈັກລະບຸວ່າ ມີຄົວເຮືອນຫຼາຍກວ່າ 400,000 ຄົວເຮືອນ ທີ່ເຄີຍປະສົບບັນຫາໄຟຟ້າດັບໃນຊ່ວງທີ່ພາຍຸພັດຜ່ານ.

ໃນເຂດອາກິວ ແລະ ບິວຕ໌ ທາງຕາເວັນຕົກຂອງສະກັອດແລນ ມີການວັດແທກຄວາມໄວລົມໄດ້ສູງເຖິງ 135 ກິໂລແມັດຕໍ່ຊົ່ວໂມງ. ຕົ້ນໄມ້ ແລະ ສາຍໄຟຟ້າທີ່ຫັກລົ້ມໄດ້ກີດຂວາງຖະໜົນຫົນທາງ ແລະ ເສັ້ນທາງລົດໄຟໃນຫຼາຍພື້ນທີ່ຂອງສະກັອດແລນ ແລະ ພາກເໜືອຂອງອັງກິດ. ຂະນະທີ່ທາງການໄດ້ອອກຄຳເຕືອນຄວາມສ່ຽງນ້ຳຖ້ວມໃນບາງພື້ນທີ່ຂອງສະກັອດແລນ ແລະ ອັງກິດ.

ໄຟຟ້າດັບກະທົບໂຮງໝໍ-ສັນຍານໂທລະສັບມືຖື

ບໍລິສັດພະລັງງານ Enedis ຂອງຝຣັ່ງ ລະບຸວ່າ ໃນຊ່ວງທີ່ພາຍຸອອສເຕນຮຸນແຮງທີ່ສຸດໃນວັນເສົາ ມີຄົວເຮືອນປະມານ 288,000 ຄົວເຮືອນບໍ່ມີໄຟຟ້າໃຊ້. ເຖິງວ່າສະຖານະການຈະເລີ່ມຄີ່ຄາຍລົງ ແຕ່ໃນຕອນທ່ຽງວັນອາທິດ ຍັງມີຄົວເຮືອນປະມານ 59,000 ຄົວເຮືອນທີ່ບໍ່ມີໄຟຟ້າໃຊ້ ໂດຍສ່ວນໃຫຍ່ຢູ່ໃນແຄວ້ນນອກມັງດີ ແລະ ບຣິຕານຍ໌. ບໍລິສັດໄດ້ລະດົມຊ່າງເຕັກນິກ ແລະ ຜູ້ຮັບເໝົາຫຼາຍກວ່າ 2,600 ຄົນ ເພື່ອເລັ່ງສ້ອມແປງລະບົບໄຟຟ້າ.

ສ່ວນໃນເຢຍລະມັນ ພາຍຸເຮັດໃຫ້ຄົວເຮືອນປະມານ 10,000 ຄົວເຮືອນໃນເມືອງໄຟຣບວກອິມໄບຣສ໌ເກົາ ແລະ ພື້ນທີ່ໃກ້ຄຽງທາງຕາເວັນຕົກສຽງໃຕ້ ບໍ່ມີໄຟຟ້າໃຊ້ໃນວັນອາທິດ. ສົ່ງຜົນໃຫ້ໂຮງໝໍຫຼັກຂອງເມືອງຕ້ອງຈຳກັດການໃຫ້ບໍລິການ ໂດຍຮັບສະເພາະຜູ້ປ່ວຍສຸກເສີນ ເນື່ອງຈາກໄຟຟ້າດັບຍັງກະທົບຕໍ່ເຄືອຂ່າຍໂທລະສັບມືຖືອີກດ້ວຍ.

ນອກຈາກນີ້ ໃນວັນເສົາທີ່ຜ່ານມາ ມີຜູ້ໄດ້ຮັບບາດເຈັບສາຫັດ 2 ຄົນ ຈາກໂຄງນັ່ງຮ້ານທີ່ຖືກລົມພັດຈົນພັງຖະຫຼົ່ມ ໃນລະຫວ່າງງານຕະຫຼາດລະດູໃບໄມ້ຫຼົ່ນ ທີ່ເມືອງນາສເຕັດເທັນ. ຂະນະທີ່ສຳນັກງານອຸຕຸນິຍົມເຢຍລະມັນຄາດການວ່າ ຊາຍຝັ່ງທາງພາກເໜືອຂອງປະເທດຈະຍັງຄົງປະເຊີນກັບລົມແຮງຕໍ່ເນື່ອງ ໂດຍຄວາມໄວລົມອາດສູງເຖິງ 100 ກິໂລແມັດຕໍ່ຊົ່ວໂມງ.

ຖ້ຽວບິນຫຼາຍຮ້ອຍຖ້ຽວຖືກຍົກເລີກ-ປ່ຽນເສັ້ນທາງ

ຜົນກະທົບຈາກພາຍຸຍັງແຜ່ຂະຫຍາຍໄປເຖິງເນເທີແລນ ແລະ ແບນຊິກ. ໃນກຸງບຣຸກແຊນ ມີຜູ້ໄດ້ຮັບບາດເຈັບ 4 ຄົນ ຈາກເຫດຕົ້ນໄມ້ລົ້ມໃນວັນເສົາ. ຂະນະດຽວກັນ ຖ້ຽວບິນຫຼາຍຮ້ອຍຖ້ຽວທົ່ວພາກພື້ນເອີຣົບເໜືອຖືກຍົກເລີກ ຫຼື ປ່ຽນເສັ້ນທາງບິນ.

ສະໜາມບິນສະຄິບໂຮລ ໃນກຸງອຳສະເຕີດຳ ເຊິ່ງເປັນໜຶ່ງໃນສູນກາງການບິນທີ່ສຳຄັນທີ່ສຸດຂອງເອີຣົບ ຈຳເປັນຕ້ອງຍົກເລີກຖ້ຽວບິນຫຼາຍສິບຖ້ຽວໃນວັນອາທິດ. ສຳນັກຂ່າວ AFP ກວດສອບຂໍ້ມູນຈາກເວັບໄຊຂອງສະໜາມບິນ ແລະ ພົບວ່າ ມີຖ້ຽວບິນຖືກຍົກເລີກປະມານ 90 ຖ້ຽວ ໂດຍສ່ວນໃຫຍ່ແມ່ນຖ້ຽວບິນໄປຍັງເມືອງຕ່າງໆໃນເອີຣົບ ເຊັ່ນ ປາຣີ, ກຸງໂຣມ ແລະ ດັບລິນ. ນອກນັ້ນ ຍັງມີຖ້ຽວບິນຂາເຂົ້າຖືກຍົກເລີກອີກຫຼາຍສິບຖ້ຽວ. ສ່ວນຖ້ຽວບິນໃນເຂດພາກເໜືອຂອງອັງກິດ ແລະ ສະກັອດແລນ ກໍໄດ້ຮັບຜົນກະທົບເຊັ່ນກັນ.

ຂະນະດຽວກັນ ຊິ້ນສ່ວນຂອງທ່າເຮືອໄບຣຕັນ ບໍລິເວນຊາຍຝັ່ງທາງພາກໃຕ້ຂອງອັງກິດ ເຊິ່ງບໍ່ໄດ້ໃຊ້ງານມາຕັ້ງແຕ່ເກີດເຫດໄຟໄໝ້ໃນປີ 2003 ໄດ້ຖືກລົມພາຍຸອອສເຕນພັດຈົນພັງເສຍຫາຍໃນວັນສຸກທີ່ຜ່ານມາ.

ຜູ້ຊ່ຽວຊານເຕືອນວ່າ ເອີຣົບອາດຈະປະເຊີນກັບສະພາບອາກາດຮຸນແຮງສຸດຂີດຫຼາຍຂຶ້ນ ເນື່ອງຈາກພາວະໂລກຮ້ອນ. ພາຍຸຄັ້ງນີ້ຖືເປັນໜຶ່ງໃນກຸ່ມພາຍຸລະດູໃບໄມ້ຫຼົ່ນຂະໜາດໃຫຍ່ລະລອກທຳອິດໆຂອງປີນີ້ ທີ່ສົ່ງຜົນກະທົບໃນວົງກວ້າງຕໍ່ຫຼາຍປະເທດໃນເອີຣົບ.

ທີ່ມາ: channelnewsasia