ຂ່າວດີ! ລັດຖະບານເຫັນດີປັບຂຶ້ນຄ່າແຮງງານຂັ້ນຕໍ່າພາກເອກະຊົນ ລວມເປັນ 3.4 ລ້ານກີບ/ເດືອນ ເລີ່ມຈັດຕັ້ງປະຕິບັດ 1 ມັງກອນ 2027

AD

AD

AD

ອີງຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 1499/ຫສນຍ, ລົງວັນທີ 21 ຕຸລາ 2026, ໄດ້ມີການແຈ້ງການເຖິງລັດຖະມົນຕີກະຊວງການເງິນ ແລະ ກະຊວງແຮງງານ ແລະ ສະຫວັດດີການສັງຄົມ ກ່ຽວກັບການຕົກລົງເຫັນດີປັບປຸງຄ່າແຮງງານຂັ້ນຕໍ່າສຸດ ແລະ ເງິນອຸດໜູນຄ່າຄອງຊີບ ສຳລັບຜູ້ອອກແຮງງານທີ່ເຮັດວຽກຢູ່ຫົວໜ່ວຍການຜະລິດ, ທຸລະກິດ ແລະ ການບໍລິການ ໃນຂະແໜງການພາກເອກະຊົນ.

ລາຍລະອຽດການປັບຂຶ້ນຄ່າແຮງງານມີດັ່ງນີ້:

ຄ່າແຮງງານຂັ້ນຕໍ່າສຸດ: ປັບຂຶ້ນຈາກ 1,600,000 ກີບ/ຄົນ/ເດືອນ ມາເປັນ 2,000,000 ກີບ/ຄົນ/ເດືອນ.

ເງິນອຸດໜູນຄ່າຄອງຊີບ: ປັບຂຶ້ນຈາກ 900,000 ກີບ/ຄົນ/ເດືອນ ມາເປັນ 1,400,000 ກີບ/ຄົນ/ເດືອນ.

ເມື່ອລວມທັງສອງພາກສ່ວນແລ້ວ ຜູ້ອອກແຮງງານຈະໄດ້ຮັບລາຍຮັບລວມທັງໝົດແມ່ນ 3,400,000 ກີບ/ຄົນ/ເດືອນ.

ທາງຫ້ອງວ່າການສຳນັກງານນາຍົກລັດຖະມົນຕີ ໄດ້ມອບໝາຍໃຫ້ ກະຊວງແຮງງານ ແລະ ສະຫວັດດີການສັງຄົມ ສົມທົບກັບພາກສ່ວນກ່ຽວຂ້ອງ ລົງແຈ້ງການໃຫ້ບັນດາຜູ້ປະກອບການ ແລະ ຫົວໜ່ວຍທຸລະກິດຕ່າງໆໄດ້ຮັບຊາບ ເພື່ອຈັດຕັ້ງປະຕິບັດການຈ່າຍຄ່າແຮງງານໃໝ່ນີ້.

ສຳລັບການຈັດຕັ້ງປະຕິບັດຕົວຈິງ ແມ່ນຈະເລີ່ມບັງຄັບໃຊ້ຢ່າງເປັນທາງການ ນັບຕັ້ງແຕ່ວັນທີ 01 ມັງກອນ ປີ 2027 ເປັນຕົ້ນໄປ.