ຄວາມຕຶງຄຽດໃນແຫຼມເກົາຫຼີສູງຂຶ້ນ! ເກົາຫຼີເໜືອຮ້ອງຮຽນຕໍ່ UN ພ້ອມປະຈຳການປືນໃຫຍ່ໃກ້ຊາຍແດນ

AD

AD

AD

ສະຖານະການຄວາມຕຶງຄຽດລະຫວ່າງເກົາຫຼີເໜືອ ແລະ ເກົາຫຼີໃຕ້ເພີ່ມສູງຂຶ້ນໃນອາທິດນີ້ ຫຼັງຈາກທາງການເກົາຫຼີເໜືອສົ່ງໜັງສືເຖິງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ (UNSC) ເພື່ອຢືນຢັນຂໍ້ກ່າວຫາເດີມວ່າ ເກົາຫຼີໃຕ້ກ່າວອ້າງເຫດການທຸ່ນລະເບີດໃນເດືອນກັນຍາຜ່ານມາຂຶ້ນມາເອງ ຂະນະດຽວກັນ ມີລາຍງານວ່າ ພົບປືນໃຫຍ່ຮາວອິດເຊີ (Howitzer) ຂະໜາດ 122 ມິນລິແມັດ ຂອງເກົາຫຼີເໜືອປະຈຳການຢູ່ໃກ້ເຂດຊາຍແດນ.

ສຳນັກຂ່າວ KCNA ຂອງທາງການເກົາຫຼີເໜືອລາຍງານວ່າ ໃນໜັງສືທີ່ສົ່ງເຖິງຄະນະມົນຕີຄວາມໝັ້ນຄົງແຫ່ງສະຫະປະຊາຊາດໃນວັນທີ 25 ຕຸລາຜ່ານມາ ຜູ້ແທນເກົາຫຼີເໜືອປະຈຳ UN ລະບຸວ່າ ເກົາຫຼີໃຕ້ກຳລັງນຳເອົາເຫດການທຸ່ນລະເບີດດັ່ງກ່າວມາເປັນຂໍ້ອ້າງ ເພື່ອກ່າວຫາວ່າ ການກໍ່ສ້າງແນວຊາຍແດນຂອງເກົາຫຼີເໜືອເປັນການຮຸກລ້ຳທາງທະຫານ.

ເກົາຫຼີເໜືອຍັງເຕືອນໃນໜັງສືສະບັບນີ້ວ່າ ການລະເມີດອະທິປະໄຕຂອງປະເທດ ອາດເຮັດໃຫ້ເກົາຫຼີເໜືອຕ້ອງໃຊ້ມາດຕະການປ້ອງກັນຕົນເອງ ພ້ອມລະບຸວ່າ ເກົາຫຼີໃຕ້ຈະຕ້ອງຮັບຜິດຊອບຢ່າງເຕັມທີ່ຕໍ່ຜົນທີ່ຕາມມາທັງໝົດ.

ຕໍ່ມາ ໂຄສົກກະຊວງລວມຊາດຂອງເກົາຫຼີໃຕ້ກ່າວໃນວັນທີ 26 ຕຸລາວ່າ ໜັງສືຂອງເກົາຫຼີເໜືອເບິ່ງຄືວ່າເປັນການຢ້ຳຈຸດຢືນເດີມຂອງລັດຖະບານເກົາຫຼີເໜືອ ແລະ ພະຍາຍາມສ້າງຄວາມຊອບທຳໃຫ້ກັບສິ່ງທີ່ເກົາຫຼີເໜືອເອີ້ນວ່າ ການກຳນົດແນວຊາຍແດນ. ສ່ວນທາງການເກົາຫຼີໃຕ້ບໍ່ໄດ້ສະແດງຄວາມເຫັນເພີ່ມເຕີມກ່ຽວກັບການນຳປືນໃຫຍ່ເຂົ້າປະຈຳການໃກ້ຊາຍແດນ ແຕ່ໄດ້ສະເໜີໃຫ້ເກົາຫຼີເໜືອເປີດການເຈລະຈາ ເພື່ອຫຼຸດຜ່ອນຄວາມຕຶງຄຽດຕາມແນວຊາຍແດນແລ້ວ.

ສຳນັກຂ່າວ Reuters ລາຍງານວ່າ ນັກຂ່າວຂອງຕົນທີ່ປະຈຳຢູ່ຈຸດຊົມວິວບໍລິເວນຊາຍແດນລະຫວ່າງເກົາຫຼີໃຕ້ ແລະ ເກົາຫຼີເໜືອ ພົບວ່າ ຝັ່ງເກົາຫຼີເໜືອມີການວາງກຳລັງທະຫານຢ່າງໜາແໜ້ນ. ນອກຈາກນັ້ນ ປືນໃຫຍ່ທີ່ພົບຍັງຕັ້ງຢູ່ໃນຈຸດທີ່ສາມາດເຫັນໄດ້ຢ່າງຊັດເຈນໃກ້ແນວຊາຍແດນ. ການນຳປືນໃຫຍ່ປະເພດນີ້ມາປະຈຳການໃກ້ຊາຍແດນ ແລະ ເປີດເຜີຍໃຫ້ເຫັນຢ່າງຊັດເຈນ ຖືເປັນເຫດການທີ່ບໍ່ຄ່ອຍເກີດຂຶ້ນ.

Reuters ຍັງລາຍງານວ່າ ນອກຈາກປືນໃຫຍ່ແລ້ວ ຍັງພົບລົດຫຸ້ມເກາະຂອງເກົາຫຼີເໜືອ 3 ຄັນ ໂດຍຫັນປາກກະບອກປືນໄປທາງທິດໃຕ້ ພ້ອມທັງພົບທະຫານເກົາຫຼີເໜືອປະມານ 20-30 ຄົນ ກຳລັງດຳເນີນວຽກຕິດຕັ້ງຮົ້ວພາຍໃນເຂດປອດທະຫານ (DMZ).

ທ່ານ ອິມ ອຶນຊອນ ສາດສະດາຈານຈາກມະຫາວິທະຍາໄລຄຽງນຳ ໃນກຸງໂຊລ ກ່າວວ່າ ການທີ່ເກົາຫຼີເໜືອເປີດເຜີຍຕຳແໜ່ງຂອງປືນໃຫຍ່ອັດຕະຈອນຂອງຕົນຢ່າງຊັດເຈນເຊັ່ນນີ້ ແມ່ນ “ເປັນເລື່ອງຜິດປົກກະຕິຢ່າງຍິ່ງ”. ທ່ານກ່າວຕໍ່ວ່າ ການຈົງໃຈສະແດງອາວຸດດັ່ງກ່າວ ເປັນການສົ່ງສັນຍານຜ່ານການກະທຳ ບໍ່ແມ່ນຄຳເວົ້າ ວ່າເກົາຫຼີເໜືອຕັ້ງໃຈບັງຄັບໃຊ້ມາດຕະການຄວບຄຸມຊາຍແດນດ້ວຍກຳລັງ ແທນທີ່ຈະໃຊ້ການເຈລະຈາ ຫຼື ການພົບປະຫາລື. ທ່ານຍັງລະບຸວ່າ ການເຄື່ອນໄຫວນີ້ເປັນການເຕືອນເກົາຫຼີໃຕ້ໃຫ້ໃຊ້ຄວາມລະມັດລະວັງ ເພື່ອບໍ່ໃຫ້ຄວາມຂັດແຍ່ງຕາມແນວຊາຍແດນຮຸນແຮງຂຶ້ນ ໂດຍມີເປົ້າໝາຍປ້ອງກັນບໍ່ໃຫ້ເກີດການປະທະກັນໂດຍບັງເອີນ.

ຢ່າງໃດກໍຕາມ ໜັງສືຂອງເກົາຫຼີເໜືອທີ່ສົ່ງເຖິງ UNSC ສະບັບນີ້ ເປັນການຕອບໂຕ້ໜັງສືທີ່ເກົາຫຼີໃຕ້ສົ່ງເຖິງຄະນະມົນຕີຄວາມໝັ້ນຄົງແຫ່ງສະຫະປະຊາຊາດໃນອາທິດກ່ອນ. ໂດຍເກົາຫຼີໃຕ້ລະບຸວ່າ ເຫດລະເບີດໃນວັນທີ 21 ກັນຍາຜ່ານມາ ພາຍໃນເຂດປອດທະຫານ ເກີດຈາກທຸ່ນລະເບີດທີ່ທະຫານເກົາຫຼີເໜືອວາງໄວ້ ແລະ ຖືເປັນການລະເມີດຂໍ້ຕົກລົງສະຫງົບເສິກສົງຄາມເກົາຫຼີ.

ທັງນີ້ ກອງບັນຊາການສະຫະປະຊາຊາດ (UN Command) ເຊິ່ງກຳກັບດູແລເຂດປອດທະຫານ ລະບຸວ່າ ການວາງທຸ່ນລະເບີດຂອງເກົາຫຼີເໜືອຂ້າມເສັ້ນແບ່ງເຂດ ຖືເປັນການລະເມີດຂໍ້ຕົກລົງສະຫງົບເສິກ ແຕ່ເກົາຫຼີເໜືອປະຕິເສດຄວາມຮັບຜິດຊອບຕໍ່ເຫດການດັ່ງກ່າວ