ເຮືອສຳລານ“ວິນລາ ວີ ໂອດິສຊີ”ຈອດລອຍລຳ ຫຼັງຈາກບໍລິສັດຜູ້ໃຫ້ບໍລິການປະກາດໂຈະການເດີນເຮືອຊົ່ວຄາວ ຜູ້ໂດຍສານຕົກຄ້າງຢູ່ກຳປູເຈຍ ເນື່ອງຈາກວິກິດລາຄານ້ຳມັນພຸ່ງສູງຢ່າງຮຸນແຮງ

AD

AD

AD

ຜູ້ໂດຍສານເຮືອສຳລານຫຼູຫຼາ “ວິນລາ ວີ ໂອດິສຊີ” (Villa Vie Odyssey) ເຊິ່ງເປີດໃຫ້ລູກຄ້າພັກອາໄສເທິງເຮືອໃນລະຫວ່າງການເດີນທາງອ້ອມໂລກ ຕ້ອງລົງຈາກເຮືອຢູ່ກຳປູເຈຍ ຫຼັງຈາກບໍລິສັດຜູ້ໃຫ້ບໍລິການປະກາດໂຈະການເດີນເຮືອຊົ່ວຄາວ ເນື່ອງຈາກຕົ້ນທຶນນ້ຳມັນເຊື້ອໄຟພຸ່ງສູງຂຶ້ນຢ່າງຮຸນແຮງ. ໂດຍຄ່ານ້ຳມັນເຊື້ອໄຟຕໍ່ຫ້ອງພັກຕໍ່ເດືອນໃນບາງພື້ນທີ່ຂອງອາຊີ ເພີ່ມຈາກ 1,800 ໂດລາ ເປັນ 8,000 ໂດລາ. ຂະນະທີ່ບໍລິສັດກຳລັງເລັ່ງຈັດຫາທີ່ພັກຊົ່ວຄາວໃຫ້ຜູ້ໂດຍສານ ພ້ອມທັງປັບໂຄງສ້າງທາງການເງິນພາຍໃນ 60 ວັນ ແຕ່ຍັງບໍ່ມີຫຼັກປະກັນວ່າຈະສາມາດກັບມາໃຫ້ບໍລິການໄດ້ອີກຄັ້ງຫຼືບໍ່.

ຜູ້ໂດຍສານເຮືອສຳລານວິນລາ ວີ ໂອດິສຊີ ທີ່ກຳລັງເດີນທາງອ້ອມໂລກໃນໄລຍະຍາວ ຕ້ອງປະເຊີນກັບສະຖານະການທີ່ບໍ່ຄາດຄິດ ຫຼັງຈາກບໍລິສັດ ວິນລາ ວີ ເຣສຊິເດັນສ໌ (Villa Vie Residences) ປະກາດໂຈະການໃຫ້ບໍລິການຊົ່ວຄາວໃນວັນອັງຄານທີ່ຜ່ານມາ (27 ຕຸລາ) ແລະສັ່ງໃຫ້ຜູ້ໂດຍສານລົງຈາກເຮືອ ໃນຂະນະທີ່ເຮືອຈອດທຽບທ່າຢູ່ປະເທດກຳປູເຈຍ ເນື່ອງຈາກບໍລິສັດບໍ່ສາມາດຈັດຫານ້ຳມັນເຊື້ອໄຟໃຫ້ພຽງພໍຕໍ່ການເດີນເຮືອໄດ້.

ບໍລິສັດທີ່ມີສຳນັກງານໃຫຍ່ຢູ່ສະຫະລັດຯ ລະບຸວ່າ ຕົ້ນທຶນນ້ຳມັນເຊື້ອໄຟເພີ່ມສູງຂຶ້ນຢ່າງຫຼວງຫຼາຍ ນັບຕັ້ງແຕ່ສົງຄາມໃນອີຣ່ານເລີ່ມຕົ້ນໃນຊ່ວງທ້າຍເດືອນກຸມພາ. ໂດຍສະເພາະໃນບາງພື້ນທີ່ຂອງອາຊີ ຄ່ານ້ຳມັນເຊື້ອໄຟຕໍ່ຫ້ອງພັກຕໍ່ເດືອນເພີ່ມຈາກປະມານ 1,800 ໂດລາ ເປັນສູງເຖິງ 8,000 ໂດລາ. ສະຖານະການດັ່ງກ່າວເຮັດໃຫ້ຮູບແບບການດຳເນີນທຸລະກິດໃນປັດຈຸບັນປະເຊີນກັບແຮງກົດດັນທາງການເງິນຢ່າງໜັກ ຈົນບໍ່ສາມາດດຳເນີນຕໍ່ໄປໄດ້ຢ່າງຍືນຍົງ.

ບໍລິສັດເປີດເຜີຍວ່າ ໄດ້ພະຍາຍາມຫຼຸດການໃຊ້ນ້ຳມັນເຊື້ອໄຟ ດ້ວຍການຫຼຸດຄວາມໄວໃນການເດີນເຮືອ ແລະເພີ່ມໄລຍະເວລາຈອດທຽບທ່າໃຫ້ດົນຂຶ້ນ ແຕ່ມາດຕະການດັ່ງກ່າວຍັງບໍ່ສາມາດຊົດເຊີຍຕົ້ນທຶນທີ່ເພີ່ມຂຶ້ນໄດ້ຢ່າງພຽງພໍ. ພ້ອມທັງຢືນຢັນວ່າ ການຜັກພາລະຄ່າໃຊ້ຈ່າຍທັງໝົດໃຫ້ຜູ້ພັກອາໄສເທິງເຮືອເປັນຜູ້ຮັບຜິດຊອບ ເປັນສິ່ງທີ່ບໍ່ສາມາດເຮັດໄດ້ໃນທາງປະຕິບັດ.

ລາຍງານລະບຸວ່າ ຜູ້ໂດຍສານໄດ້ຮັບແຈ້ງໃຫ້ລົງຈາກເຮືອພາຍໃນເວລາ 14:00 ໂມງ ຕາມກຳນົດທີ່ບໍລິສັດວາງໄວ້. ສ່ວນລູກເຮືອຈະຍັງປະຈຳຢູ່ເທິງເຮືອ ເພື່ອດູແລຮັກສາຕົວເຮືອ ແລະລະບົບຕ່າງໆ ທີ່ຈຳເປັນ. ສຳລັບຜູ້ໂດຍສານທີ່ຍັງເກັບກະເປົາ ແລະສຳພາລະບໍ່ຄົບ ສາມາດປະສານງານກັບຝ່າຍບໍລິການລູກຄ້າເພື່ອຈັດການຂົນຍ້າຍໄດ້ ໂດຍມີລົດຮັບສົ່ງໃຫ້ບໍລິການຕໍ່ໄປຈົນເຖິງເວລາ 18:00 ໂມງ ຂອງມື້ຖັດໄປ.

ບໍລິສັດລະບຸວ່າ ກຳລັງປະສານງານກັບຜູ້ໂດຍສານ ເພື່ອຈັດການລົງຈາກເຮືອ ແລະຈັດຫາທີ່ພັກຊົ່ວຄາວໃຫ້ແກ່ຜູ້ທີ່ໄດ້ຮັບຜົນກະທົບ. ແນວໃດກໍຕາມ ຍັງບໍ່ມີການເປີດເຜີຍຈຳນວນຜູ້ໂດຍສານທີ່ຢູ່ເທິງເຮືອໃນຂະນະເກີດເຫດຢ່າງເປັນທາງການ. ເຮືອລຳນີ້ສາມາດຮອງຮັບຜູ້ໂດຍສານໄດ້ສູງສຸດປະມານ 650 ຄົນ. ຂະນະທີ່ສຳນັກຂ່າວ Bloomberg ລາຍງານໂດຍອ້າງຄຳກ່າວຂອງຜູ້ກໍ່ຕັ້ງບໍລິສັດວ່າ ໃນເວລາທີ່ມີຄຳສັ່ງໃຫ້ລົງຈາກເຮືອ ມີຜູ້ໂດຍສານຢູ່ເທິງເຮືອປະມານ 200 ຄົນ.

ເຮືອວິນລາ ວີ ໂອດິສຊີ (Villa Vie Odyssey) ເລີ່ມອອກເດີນທາງຈາກເມືອງເບວຟາສ (Belfast) ໃນໄອແລນເໜືອ ໃນເດືອນຕຸລາ 2024 ໂດຍມີແຜນເດີນທາງອ້ອມໂລກຕໍ່ເນື່ອງເປັນເວລາ 3 ປີເຄິ່ງ ຄອບຄຸມເກືອບ 150 ປະເທດ. ແຕ່ໃນທີ່ສຸດ ກໍປະກາດໂຈະການເດີນທາງ ຫຼັງຈາກເດີນເຮືອມາແລ້ວກວ່າ 750 ວັນ.

ບໍລິສັດປະກາດວ່າ ຈະໃຊ້ເວລາ 60 ວັນຕໍ່ຈາກນີ້ ເພື່ອປັບໂຄງສ້າງທຸລະກິດ ແລະເພີ່ມທຶນ ເພື່ອຟື້ນຟູຖານະທາງການເງິນ. ພ້ອມລະບຸວ່າ ກຳລັງໃຫ້ຄວາມສຳຄັນກັບການຊ່ວຍເຫຼືອຜູ້ໂດຍສານ ລູກເຮືອ ແລະພະນັກງານ. ແຕ່ກໍຍອມຮັບວ່າ ຍັງບໍ່ມີຫຼັກປະກັນວ່າຂະບວນການດັ່ງກ່າວຈະປະສົບຜົນສຳເລັດ ຫຼືເຮືອຈະສາມາດກັບມາໃຫ້ບໍລິການໄດ້ອີກເມື່ອໃດ.

ທັງນີ້ ການເດີນທາງນັບຕັ້ງແຕ່ເລີ່ມຕົ້ນເຄີຍປະສົບກັບຄວາມລ່າຊ້າຈາກການສ້ອມແປງເຮືອ ຈົນເຮັດໃຫ້ຜູ້ໂດຍສານບາງສ່ວນຕ້ອງຕົກຄ້າງຢູ່ເມືອງເບວຟາສເປັນເວລາຫຼາຍເດືອນ ແລະສົ່ງຜົນໃຫ້ບໍລິສັດປະສົບຄວາມເສຍຫາຍທາງການເງິນມາແລ້ວ.

ເຮືອລຳນີ້ໃຫ້ບໍລິການທີ່ພັກອາໄສໄລຍະຍາວ ໂດຍຫ້ອງພັກສຳລັບຜູ້ທີ່ຕ້ອງການຊື້ສິດພັກອາໄສແບບຖາວອນ ມີລາຄາຕັ້ງແຕ່ 120,000 ຫາ 440,000 ໂດລາສະຫະລັດ. ສ່ວນຜູ້ທີ່ຕ້ອງການເຊົ່າ ມີລາຄາເລີ່ມຕົ້ນທີ່ 3,500 ໂດລາຕໍ່ເດືອນ.

ພາຍໃນເຮືອມີສິ່ງອຳນວຍຄວາມສະດວກຕ່າງໆ ເຊັ່ນ: ບາ, ຮ້ານອາຫານ, ສະລອຍນ້ຳ ແລະສະໜາມກິລາພິກເຄິລບອນ (Pickleball) ເຊິ່ງເປັນສ່ວນໜຶ່ງຂອງແນວຄິດການໃຊ້ຊີວິດເທິງເຮືອສຳລານ ພ້ອມກັບການເດີນທາງອ້ອມໂລກ.

ທຸລະກິດເຮືອສຳລານທີ່ເນັ້ນການພັກອາໄສໄລຍະຍາວ ໄດ້ຮັບຄວາມສົນໃຈຈາກຜູ້ທີ່ຕ້ອງການໃຊ້ຊີວິດ ແລະເດີນທາງທາງທະເລເປັນເວລາດົນນານ. ແຕ່ທຸລະກິດຮູບແບບນີ້ກໍຖືກຕັ້ງຄຳຖາມກ່ຽວກັບຄວາມຍືນຍົງມາໂດຍຕະຫຼອດ ຫຼັງຈາກຜູ້ປະກອບການຫຼາຍລາຍບໍ່ສາມາດເລີ່ມໃຫ້ບໍລິການໄດ້ຈິງ.

ເຖິງແມ່ນວ່າບໍລິສັດວິນລາ ວີ ຈະສາມາດນຳເຮືອອອກເດີນທາງໄດ້ສຳເລັດ ແລະເຄີຍປະກາດແຜນຈັດຫາເຮືອລຳທີສອງກໍຕາມ ແຕ່ເຫດການລ່າສຸດໄດ້ກະຕຸ້ນໃຫ້ເກີດຄຳຖາມອີກຄັ້ງ ກ່ຽວກັບຄວາມໝັ້ນຄົງທາງການເງິນ ແລະອະນາຄົດຂອງທຸລະກິດຮູບແບບນີ້.

ໃນຂະນະນີ້ ຜູ້ໂດຍສານທີ່ຖືກສັ່ງໃຫ້ລົງຈາກເຮືອໃນກຳປູເຈຍ ຍັງຄົງປະເຊີນກັບຄວາມບໍ່ແນ່ນອນ ທັງໃນເລື່ອງການເດີນທາງຕໍ່ໄປໃນອະນາຄົດ ແລະເງິນທີ່ໄດ້ຈ່າຍໄປເພື່ອຊື້ ຫຼືເຊົ່າທີ່ພັກເທິງເຮືອ. ຂະນະທີ່ບໍລິສັດຍັງບໍ່ໄດ້ລະບຸກຳນົດເວລາທີ່ຊັດເຈນວ່າ ຈະສາມາດກັບມາເປີດໃຫ້ບໍລິການໄດ້ອີກຫຼືບໍ່.

ທີ່ມາ: BBC / Cruise Passenger